ବାବୁଙ୍କ ସମ୍ପତ୍ତି ତାଲିକାକୁ ନେଇ କଠୋର ସରକାର, ସମ୍ପତ୍ତି ତାଲିକା ନଦେଲେ ହେବନି ପଦୋନ୍ନତି

କନକ ବ୍ୟୁରୋ: ବାବୁଙ୍କ ସମ୍ପତ୍ତି ତାଲିକାକୁ ନେଇ କଠୋର ହେଲେ ସରକାର । ସମ୍ପତ୍ତି ତାଲିକା ନଦେଲେ ସରକାରୀ ବାବୁଙ୍କର ହେବନାହିଁ ପଦୋନ୍ନତି । ସାଧାରଣ ପ୍ରଶାସନ ବିଭାଗ ପକ୍ଷରୁ ଏନେଇ ଜାରି ହୋଇଛି ଚିଠି । ଅତିରିକ୍ତ ମୁଖ୍ୟ ଶାସନ ସଚିବ ସବୁ ବିଭାଗକୁ ଚିଠି ଲେଖିଛନ୍ତି । ଜାନୁଆରି ସୁଦ୍ଧା ସମ୍ପତ୍ତି ତାଲିକା ଦେବାକୁ ପୂର୍ବରୁ ନିର୍ଦ୍ଦେଶ ଦିଆଯାଇଥିଲା । ଏହା ପୂର୍ବରୁ ବହୁବାର ଜିଏ ବିଭାଗ ପକ୍ଷରୁ ସମ୍ପତ୍ତି ତାଲିକା ଦେବାକୁ ଚିଠି ଲେଖାଯାଇଥିଲା । ହେଲେ ଅନେକ ବାବୁ ଦେଇନାହାନ୍ତି ସମ୍ପତ୍ତି ତାଲିକା  । ଯେଉଁଥିରେ ସରକାର ଏବେ କଠୋର ହୋଇଛନ୍ତି ।

 ଅଧିକ ପଢନ୍ତି ; ସରକାରଙ୍କ କଥାକୁ ଫୁ କରିଦେଉଛନ୍ତି ବଡ ବାବୁ ; ଦେଉନାହାନ୍ତି ସମ୍ପତ୍ତି ତାଲିକା

ସମ୍ପତ୍ତି ତାଲିକା ଦାଖଲ କରିବାରେ ସରକାରୀ ବାବୁଙ୍କ ଏତେ ସଙ୍କୋଚ କାହିଁକି ?  ମାସ ମାସ ଧରି ସରକାରୀ ବାବୁ ନିର୍ଦ୍ଦେଶକୁ ବେଖାତିର କରୁଥିଲେ ବି କାର୍ଯ୍ୟାନୁଷ୍ଠାନ ନେବାକୁ ସାହସ ଜୁଟାଇ ପାରୁନାହାନ୍ତି ସରକାର ।  ତାରିଖ ପରେ ତାରିଖ ବଦଳୁଛି । ହେଲେ ସମ୍ପତ୍ତି ତାଲିକା ଦେବାକୁ ବାବୁଙ୍କର ହାତ ଯାଉନି । ସବୁ ବିଭାଗର ମୁଖ୍ୟ, ଆରଡିସି ଓ ଜିଲ୍ଲାପାଳଙ୍କୁ ଚିଠି ଲେଖି ବିଭାଗୱାରୀ ବାବୁଙ୍କର ସମ୍ପତ୍ତି କେତେ ତାହା ଏଚଆରଏମଏସ ପୋର୍ଟାଲରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି ।

ଆଉ ଏଥିପାଇଁ ମେ ୩୧କୁ ଡେଡଲାଇନ ରଖାଯାଇଛି । ତେବେ ଏ ଡେଡଲାଇନ ଦୀର୍ଘ ୬ ମାସ ହେବ ଅଳସୁଆ ବାବୁଙ୍କ ପାଇଁ ଘୁଞ୍ଚି ଘୁଞ୍ଚି ଚାଲିଛି । ସର୍ଭିସ ରୁଲ ଅନୁସାରେ ପ୍ରତ୍ୟେକ ବର୍ଷ ଉପରୁ ତଳ ଯାଏଁ ସରକାରୀ ଅଧିକାରୀ ସମ୍ପତ୍ତି ତାଲିକାର ଦାଖଲ କରିବାର ନିୟମ ରହିଛି । ହେଲେ ସମ୍ପତ୍ତି ତାଲିକା ଦାଖଲ କରିବାକୁ ଅନେକ ବଡ ବଡିଆ ଅମଙ୍ଗ ।  ଗତ କିଛି ଦିନ ହେବ ପୂର୍ବରୁ ପଶ୍ଚିମ, ଉତ୍ତରରୁ ଦକ୍ଷିଣ ଭିଜିଲାନ୍ସରେ ପଞ୍ଝାରେ ଅନେକ ସରକାରୀ ବାବୁ ପଡିଥିବାର ନଜିର ରହିଛି । ମୁଖ୍ୟମନ୍ତ୍ରୀ ମୋହନ ମାଝୀ ଏକଥା ସ୍ପଷ୍ଟ କରିଛନ୍ତି, ଦୁର୍ନୀତିଖୋର ବାବୁଙ୍କୁ ନିସ୍ତାର ନାହିଁ । ତେଣୁ ସେହି ଭୟରେ ସମ୍ପତ୍ତି ତାଲିକା ଦେବାରେ ପଛଘୁଞ୍ଚା ଦେଉନାହାନ୍ତି ତ ଅଧିକାରୀ ?