ଖୁସି ଖବର : କମିଲା ସୁନା ଦର

କନକବ୍ୟୁରୋ : ଆଗକୁ ବାହା ବଜାର ଆସୁଥିବା ବେଳେ ଗ୍ରାହକଙ୍କ ପାଇଁ ଖୁସି ଖବର। ଆକାଶଛୁଆଁ ପାଲଟିଥିବା ସୁନା ଓ ରୁପା ଦର ସାମାନ୍ୟ ହ୍ରାସ ପାଇଥିବା ଦେଖିବାକୁ ମିଳୁଛି ।  ଶୁକ୍ରବାର ସକାଳ ତୁଳନାରେ ସନ୍ଧ୍ୟା ସୁଦ୍ଧା ସୁନା ଏବଂ ରୁପା ମୂଲ୍ୟ ହ୍ରାସ ପାଇଛି ।  ବିଶ୍ୱ ଏବଂ ଏସୀୟ ବଜାରରେ ମଧ୍ୟ ଏହି ହ୍ରାସ ସ୍ପଷ୍ଟ ହୋଇଛି। ଇଣ୍ଡିଆନ୍ ବୁଲିଅନ୍ ଏବଂ ଜୁଏଲାରି ଆସୋସିଏସନ୍ ଅନୁଯାୟୀ, ଅକ୍ଟୋବର ୨୩ ସନ୍ଧ୍ୟା  ତୁଳନାରେ ୨୪ ତାରିଖ ସନ୍ଧ୍ୟା ୫ଟାରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରାୟ ୨ ହଜାର ଟଙ୍କା ହ୍ରାସ ପାଇ ୧୦ ଗ୍ରାମ ପିଛା ୧,୨୧,୫୧୮ରେ ପହଞ୍ଚିଛି ।  ଏହି ସମୟରେ, ୨୩ କ୍ୟାରେଟ୍ ସୁନାର ମୂଲ୍ୟ ୧,୮୦୦ ଟଙ୍କ‌େ ହ୍ରାସ ପାଇ ବର୍ତ୍ତମାନ ପ୍ରତି ୧୦ ଗ୍ରାମକୁ ଦର ୧,୨୦୦,୮୬୦ ରହିଛି । 

ବନ୍ୟା ମୁକାବିଲା ପାଇଁ ନଈକୂଳିଆଙ୍କୁ ତାଲିମ,  ପ୍ରଶିକ୍ଷଣ ଦେଲେ ଏନ୍‌ଡିଆର୍‌ଏଫ୍‌ ଯବାନ

 ଅଧିକ ପଢନ୍ତୁ ..... 

ତେବେ, ୨୨ କ୍ୟାରେଟ୍ ସୁନା ପ୍ରାୟ ୧,୭୦୦ ଟଙ୍କା ହ୍ରାସ ପାଇଛି। ଏହା ବର୍ତ୍ତମାନ ପ୍ରତି ୧୦ ଗ୍ରାମ ୧, ୧୧, ୩୧୦ ଟଙ୍କାରେ ଉପଲବ୍ଧ। ଆଜି ସନ୍ଧ୍ୟାରେ ୧୮ କ୍ୟାରେଟ୍ ସୁନାର ମୂଲ୍ୟ ୧୦ ଗ୍ରାମ୍‌ ପିଛା ୯୧,୧୩୯ ଟଙ୍କା ଏବଂ ୧୪ କ୍ୟାରେଟ୍ ସୁନାର ମୂଲ୍ୟ ୭୧, ୦୮୮ ଟଙ୍କାରେ ଉପଲବ୍ଧ। ଏହା ୨୪ ଅକ୍ଟୋବର ସକାଳ ତୁଳନାରେ ୧,୦୦୦ ଟଙ୍କା ହ୍ରାସକୁ ଦର୍ଶାଉଛି ।

ସୂଚନା ଅନୁଯାୟୀ  ସେପଟେ ଏକ ରିପୋର୍ଟ ଅନୁଯାୟୀ ଭାରତୀୟମାନେ ସୁନା ପ୍ରିୟ । ‌ସୁନା କିଣିବାରେ‌ ସେମାନେ ଅବହେଳା କରନ୍ତି ନାହିଁ। ଗହଣା ଭାବେ ହେଉ କିମ୍ବା କଏନ୍ ହେଉ, ସୁନାକୁ ସେମାନେ ବିଭିନ୍ନ ରୂପରେ କିଣି ଘରେ ରଖିଛନ୍ତି। ଲୋକଙ୍କ ଘରେ ଏବେ ୩୪,୬୦୦ ଟନ୍ ସୁନା ରହିଥିବା ଆକଳନ କରାଯାଇଛି। ଏହା ଦେଶର ମୋଟ ଘରୋଇ ଉତ୍ପାଦ (ଜିଡିପି)ର ୮୮.୮ ପ୍ରତିଶତ ।

ଲୋକଙ୍କ ଘରେ ଥିବା ସୁନାର ଓଜନ ୬୦୦୦ଟି ହାତୀର ଓଜନଠାରୁ ଅଧିକ। ଏହି ସୁନାର ଦାମ୍‌ ୩.୮ ଟ୍ରିଲିୟନ୍ ଡଲାର (୩୩୭ ଲକ୍ଷ କୋଟି ଟଙ୍କାରୁ ଅଧିକ) ବୋଲି ମର୍ଗାନ୍‌ ଷ୍ଟାନ୍‌ଲେ ପକ୍ଷରୁ ଆକଳନ କରାଯାଇଛି। ୨୦୨୩ ଜୁଲାଇରେ ଭାରତୀୟ ଲୋକଙ୍କ ଘରେ ୨୫ ହଜାର ଟନ୍ ସୁନା ଥିବ ବୋଲି ବିଶ୍ବ ସୁନା ପରିଷଦ (ଡବ୍ଲ୍ୟୁଜିସି) ଆକଳନ କରିଥିଲା। ସେହି ସଂଖ୍ୟାକୁ ଦେଖିଲେ ବର୍ତ୍ତମାନର ଗଚ୍ଛିତ ସୁନା ୯୬୦୦ ଟନ୍ ବଢ଼ିଛି।  

ସୁନା ମୂଲ୍ୟ ଅନ୍ତର୍ଜାତୀୟ ବଜାରରେ ଏବେ ରେକର୍ଡ ସ୍ତରରେ ରହିଛି। ଆଉନ୍ସ ପିଛା ଦର ୪୦୫୬ ଡଲାର ପାଖାପାଖି କାରବାର ହେଉଛି। ସେହିଭଳି ଦେଶରେ ମଧ୍ୟ ସୁନା ଦର ନୂଆ ରେକର୍ଡ କରୁଛି। ୧୦ ଗ୍ରାମ୍‌ ସୁନା ଦର ପ୍ରାୟ ୧,୨୭,୩୦୦ ଟଙ୍କା ସ୍ତରରେ ରହିଛି। ଚଳିତବର୍ଷ ବର୍ତ୍ତମାନ ସୁଦ୍ଧା ସୁନା ଦର ଆମେରିକୀୟ ଡଲାର ମୂଲ୍ୟରେ ୫୪.୬ ପ୍ରତିଶତ ଏବଂ ଭାରତୀୟ ଟଙ୍କା ମୂଲ୍ୟରେ ୬୧.୮ ପ୍ରତିଶତ ବୃଦ୍ଧି ଘଟିଛି ବୋଲି ରିପୋର୍ଟରେ କୁହାଯାଇଛି। ବିଶ୍ବରେ ଭାରତ ଦ୍ବିତୀୟ ବୃହତ୍ ସୁନା ବ୍ୟବହାରକାରୀ ଦେଶ ।

ଭାରତରେ ସୁନା ଚାହିଦା ବିଶ୍ବ ଚାହିଦାର ପ୍ରାୟ ୨୬ ପ୍ରତିଶତ ।  ୨୮ ପ୍ରତିଶତ ଚାହିଦା ସହ ଚୀନ ପ୍ରଥମ ସ୍ଥାନରେ ରହିଛି। ଭାରତୀୟ ରିଜର୍ଭ ବ୍ୟାଙ୍କ ନିକଟରେ ମଧ୍ୟ ସୁନା ମହଜୁଦ ପରିମାଣ ବଢ଼ିବାରେ ଲାଗିଛି। ୨୦୨୪ଠାରୁ ବର୍ତ୍ତମାନ ସୁଦ୍ଧା ରିଜର୍ଭ ବ୍ୟାଙ୍କ ସୁନା ପରିମାଣ ପ୍ରାୟ ୭୫ ଟନ୍‌ ବୃଦ୍ଧି କରିଛି । ଏହା ପାଖରେ ମୋଟ ୮୮୦ ଟନ୍‌ ସୁନା ରହିଛି। ଭାରତର ମୋଟ ବିଦେଶୀ ମୁଦ୍ରା ଭଣ୍ଡାରରେ ସୁନାର ଅଂଶ ପ୍ରାୟ ୧୪ ପ୍ରତିଶତ ବୋଲି ରିପୋର୍ଟରେ କୁହାଯାଇଛି ।