ଭଦ୍ରକ ଚାନ୍ଦବାଲି ବିଫଳ ଗ୍ରାମାଞ୍ଚଳ ବିକାଶ, ଆଜି ବି ସବୁ ସ୍ଥାନକୁ ନାହିଁ ଗମନାଗମନ ସୁବିଧା

କନକ  ବ୍ୟୁରୋ:  ଭଦ୍ରକ ଜିଲ୍ଲା ଚାନ୍ଦବାଲି ବିକାଶର ପୂର୍ବାକାଶରେ ଧାମରା ବନ୍ଦର ବେଶ ପରିଚିତ । ମାତ୍ର ଚାନ୍ଦବାଲି ବିକାଶ ଅଟକିଛି ନଦୀ ଘାଟରେ । ଯାତାୟାତ ପାଇଁ ରାସ୍ତା ନଥିବାରୁ ଲୋକେ ବିପଦପୂର୍ଣ୍ଣ ଭାବେ ଡଙ୍ଗାରେ ନଦୀ ପାରି ହେଉଛନ୍ତି । ବୈତରଣୀ ନଦୀରେ ବାଂଶଡା ଠାରେ ବ୍ରିଜ ଅଛି ମାତ୍ର ରାସ୍ତା ଅବସ୍ଥା ଭଲନାହିଁ । ଅନ୍ୟବାଟ ଦେଇ ଗଲେ ବହୁତ ବୁଲାଣି ପଡ଼ୁଛି । ତେଣୁ ନଦୀର ଚୋଧୁରୀ ଘାଟ, ହାବେଳୀ ଘାଟ ଉପରେ ନିର୍ଭର କରୁଛନ୍ତି ହଜାର ହଜାର ଲୋକ ।

ଘାଟରେ ଭଲ ଜେଟି ଟିଏ ନାହିଁ । ଡଙ୍ଗାରେ ଭରା ଲୋକ। ଯାତ୍ରୀ ଭର୍ତ୍ତି ଡଙ୍ଗାକୁ ବାହି ନେଉଛନ୍ତି ନାଉରିଆ । ପର୍ବପର୍ବାଣୀ ଆସିଲେ ଏ ଚିତ୍ର ଆହୁରି ସାଂଘାତିକ ହୋଇପଡ଼େ । ଭିଡ଼ ବଢ଼ିଯାଏ। ଆଉ ପ୍ରତିଦିନ ଏମିତି ଯାତାୟାତ କରିଥାନ୍ତି ଧାମରା ଏବଂ ଚାନ୍ଦବାଲି ଅଞ୍ଚଳର ଲୋକେ । ଜୁଆର ଏବଂ ଭଟା ସମୟରେ ନୌଯାତ୍ରାର ଯନ୍ତ୍ରଣା ବଢ଼ିଯାଏ । କେତେବେଳେ ବାଇକ୍‌ ନଦୀକୁ ଖସି ପଡ଼େ ତ ପୁଣି କେବେ ଡଙ୍ଗାରୁ ଖସିପଡ଼ନ୍ତି ଯାତ୍ରୀ ।

ଅଧିକ ପଢନ୍ତୁ : ଦେବୀ ମୁହାଣରେ କେମିତି ବଢ଼ିବେ ମାଛ? ଡଙ୍ଗାରେ ଜାଲ ବାନ୍ଧି ଜାଆଁଳ ଛାଣି ନେଉଛନ୍ତି ମାଫିଆ

ଏହେଉଛି ଚାନ୍ଦବାଲି-ଧାମରାକୁ ବିଛେଦ କରିଥିବା ମନ୍ତେଇ ନଦୀ ହାବେଳି ଘାଟର ଦୃଶ୍ୟ । ଏହି ଘାଟଟି ନିକଟ ହୋଇଥିବାରୁ ଲୋକେ ଏହିଠାରୁ ଡଙ୍ଗାରେ ଚଢ଼ିଥାନ୍ତି । ଆଉ ଏଥିପାଇଁ ବାର୍ଷିକ ଲକ୍ଷଲକ୍ଷ ଟଙ୍କାରେ ନିଲାମ ହୁଏ ହାବେଳି ଘାଟ ।  ଧାମରା ବନ୍ଦର ହେଉ ବା ବ୍ଲକ ମୁଖ୍ୟାଳୟ, ଯେ କୌଣସି ସ୍ଥାନକୁ ଯିବାକୁ ହେଲେ ନଦୀପାରି ହେବାକୁ ପଡ଼େ । ତେଣୁ ଏଠାରେ ପୋଲଟିଏ କରିବାକୁ ବାରମ୍ବାର ବ୍ଲକ ପ୍ରଶାସନ ଠାରୁ ଜନ ପ୍ରତିନିଧିଙ୍କୁ ଅବଗତ କରାଇଛନ୍ତି ସ୍ଥାନୀୟ ବାସିନ୍ଦା । ହେଲେ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି ।  ମକର ସଂକ୍ରାନ୍ତିରେ ଧାମରାର ମାଆ ଧାମରାଇଙ୍କ ପୀଠରେ ପ୍ରସିଦ୍ଧ ମକର ଯାତ୍ରା ଅନୁଷ୍ଠିତ ହୋଇଥାଏ । ସେହି ସମୟରେ ହଜାରହଜାର ଲୋକଙ୍କ ସମାଗମ ହୋଇଥାଏ । ପ୍ରାୟ ସବୁ ଲୋକ ଡଙ୍ଗାରେ ନଈପାରି ହୋଇ ମାଆଙ୍କ ପୀଠରେ ପହଞ୍ଚିଥାନ୍ତି ।