ବଡ଼ମ୍ବା ଓ ନରସିଂହପୁରର ବିଭିନ୍ନ ରେଞ୍ଜରେ ହାତୀ ଓ ମଣିଷ ମୁହାଁମୁହିଁ

କନକ ବ୍ୟୁରୋ: ଆଠଗଡ଼ ବନଖଣ୍ଡ ବଡମ୍ବା ଓ ନରସିଂହପୁରର ବିଭିନ୍ନ ରେଞ୍ଜରେ ହାତୀ ଓ ମଣିଷ ଉଭୟ ମୁହାଁମୁହିଁ ପରିସ୍ଥିତି । ସନ୍ଧ୍ୟା ହେଲେ ଟର୍ଚ୍ଚ ଲାଇଟ ଓ ଟିଣ ହିଁ ସହାରା ହେଉଛି । କିଏ କେଉଁଠି ନିଆଁ ଜାଳି ହାତୀ ଘଉଡ଼ାଇଲାଣି ତ ଆଉ କିଏ ଟିଣ ବାଡ଼େଇ ମଞ୍ଚା ତଳେ ବସି ହାତୀ ଘଉଡ଼ାଇଲାଣି । ତା ସତ୍ତ୍ୱେ ହାତୀ ଧାନ ଫସଲ ନଷ୍ଟ କରୁଛନ୍ତି । ଦିନ ତମାମ ଜଙ୍ଗଲରେ ରହୁଥିବା ବେଳେ ରାତି ହେଲେ ଜନବସତି ଆଡକୁ ଆସି ଧନ ଜୀବନ ନଷ୍ଟ କରିବା ସହିତ ଫସଲ ନଷ୍ଟ କରୁଛନ୍ତି । ପାଖାପାଖି ୨୫ ଏକରରୁ ଅଧିକ ଧାନ ଫସଲ ନଷ୍ଟ କରିଥିବା ଅଭିଯୋଗ ହୋଇଛି । 

ଅଧିକ ପଢନ୍ତୁ:  ୨୪ ଘଣ୍ଟାର ସଂଘର୍ଷ ପରେ ଆଖି ବୁଜିଲା ମାକେନା ହାତୀ

ଏପଟେ ହାତୀ ଜଗିବାକୁ ବନ ବିଭାଗ ପକ୍ଷରୁ ହାତୀସାଥି, ଫରେଷ୍ଟ ଗାର୍ଡ, ନିଯୁକ୍ତି ହୋଇଥିଲେ ମଧ୍ୟ କେହି ବି ଚାଷୀଙ୍କୁ ସାଥ୍‌ ଦେଉନଥିବା ଅଭିଯୋଗ ହୋଇଛି । ଏପଟେ କ୍ଷତିଗ୍ରସ୍ତ ଚାଷୀଙ୍କୁକୁ କ୍ଷତିପୂରଣ ଯୋଗାଇ ଦେବାକୁ ରାଜ୍ୟ ସରକାର 'ଅନୁକମ୍ପା' ଆପ୍ଲିକେସନ ମାଧ୍ୟମରେ ଆବେଦନ କରିପାରିବେ । ଆବେଦନ କରିଥିବା ଚାଷୀଙ୍କୁ ଅଗ୍ରାଧିକାର ଦିଆଯାଉଛି । ନରସିଂହପୁର ପୂର୍ବ ବନାଞ୍ଚଳ ଅନ୍ତର୍ଗତ ସାଗର, ପାଞ୍ଚଗୋଛିଆ, ରଙ୍ଗଡ଼ାବ ଆଦି ଅଞ୍ଚଳରେ ଏବେ ବି ଅନୁକମ୍ପା ରାଶି ପାଇବାରେ ବିଫଳ ହୋଇଛନ୍ତି । ପୂର୍ବ ବନାଞ୍ଚଳରେ ହାତୀ ଉପଦ୍ରବ ବଢ଼ୁଛି । ଏହାର କୌଣସି ସ୍ଥାୟୀ ପ୍ରତିକାର ହେଉନଥିବାରୁ ଚାଷୀ ସମେତ ଅଞ୍ଚଳବାସୀଙ୍କ ମଧ୍ୟରେ ବନ ବିଭାଗ ବିରୋଧରେ ଅସନ୍ତୋଷ ବୃଦ୍ଧି ପାଉଛି। ଖବର ମିଳିବା ପରେ ବନ ବିଭାଗର ଅଧିକାରୀ ଓ କର୍ମଚାରୀ ମାନେ ଘଟଣାସ୍ଥଳକୁ ପରିଦର୍ଶନ କରିଛନ୍ତି ।