ଦୁବାଇରେ ପୁଣି ଆଟାକ୍ କଲା ଇରାନ : ଡ୍ରୋନ୍ ଆକ୍ରମଣରେ ଅଧା ଭାଙ୍ଗିଲା ମରିନା ଟାୱାର , ଜଣେ ଡ୍ରାଇଭରଙ୍କ ମୃତ

କନକ ବ୍ୟୁରୋ : ଇରାନ ରାଷ୍ଟ୍ରପତି ମାସୁଦ ପେଜେଶକିୟାନ ପଡ଼ୋଶୀ ଦେଶଗୁଡ଼ିକ ଉପରେ ଆକ୍ରମଣ ପାଇଁ କ୍ଷମା ପ୍ରାର୍ଥନା କରିବାର କିଛି ସମୟ ହେଇନି ଇରାନ ପୁଣିଥରେ ଉପସାଗରୀୟ ଆରବ ଦେଶଗୁଡ଼ିକ ଉପରେ କ୍ଷେପଣାସ୍ତ୍ର ଏବଂ ଡ୍ରୋନ ମାଡ଼ କରିଛି । ପୁଣି ଥରେ ଦୁବାଇ ଉପରେ ଆକ୍ରମଣ କରିଛି ଇରାନ୍ ଯେଉଁଥିରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି । ଦୁବାଇ ସରକାର ଏହି ଘଟଣାକୁ ନିଶ୍ଚିତ କରି କହିଛନ୍ତି ଯେ ଏୟାର ଡିଫେନ୍ସ ସିଷ୍ଟମ୍ ଆସୁଥିବା ପ୍ରକ୍ଷେପଣକୁ ସଫଳତାର ସହ ଅବରୋଧ କରାଯାଇଛି କିନ୍ତୁ ଭଗ୍ନାବଶେଷ ପଡ଼ି ମାରିନାରେ ଏକ ଟାୱାରର ବାହାର ଅଂଶକୁ କ୍ଷତି ପହଞ୍ଚିଛି । ସଂଯୁକ୍ତ ଆରବ ଏମିରେଟ୍ସର ଅଧିକାରୀମାନେ କହିଛନ୍ତି ଯେ ଦୁବାଇରେ ହୋଇଥିବା କ୍ଷେପଣାସ୍ତ୍ର ଆକ୍ରମଣର ଭଗ୍ନାବଶେଷରେ ଜଣେ ବ୍ୟକ୍ତି ଆଘାତ ପାଇଛି । ଦୁବାଇ ମିଡିଆ ଅଫିସ୍ ଅନୁଯାୟୀ ମୃତକ ଜଣେ ଏସୀୟ ନାଗରିକ ଥିଲେ ଏବଂ ପ୍ରମୁଖ ଉପସାଗରୀୟ ସହରର ଅଲ୍ ବର୍ଶା ଅଞ୍ଚଳରେ ଗାଡ଼ି ଚଲାଉଥିବା ସମୟରେ ତାଙ୍କର ମୃତ୍ୟୁ ହୋଇଥିଲା ।

ଆଗକୁ ପଢ଼ନ୍ତୁ : ସବୁଦିନ ସ୍ବାହା ହେଉଛି ୯୦୦୦ କୋଟି ; ଇରାନ ସହ ପଙ୍ଗା ନେଇ ଭୁଲ୍ କଲେ କି ? ଫସିଗଲେଣି ଆମେରିକା-ଇସ୍ରାଏଲ୍ ?

ସଂଯୁକ୍ତ ଆରବ ଏମିରେଟ୍ସର ଦୁବାଇ ଗଣମାଧ୍ୟମ ରିପୋର୍ଟ କରିଛି ଯେ ଇରାନୀ ପ୍ରକ୍ଷେପଣ ବାଧାପ୍ରାପ୍ତ ହେବା ଫଳରେ ଦୁବାଇ ମାରିନାର ଏକ ଟାୱାରର ସମ୍ମୁଖ ଭାଗକୁ ସାମାନ୍ୟ କ୍ଷତି ପହଞ୍ଚାଇଛି ଯାହା ଫଳରେ ଭଗ୍ନାବଶେଷ ସେହି ଅଞ୍ଚଳରେ ପଡ଼ିଛି ଯେଉଁଠାରେ ଅନେକ ବିଳାସପୂର୍ଣ୍ଣ କୋଠା ରହିଥିଲା । ଏହା ମଧ୍ୟ ରିପୋର୍ଟ ହୋଇଛି ଯେ ବିମାନ ଆକ୍ରମଣର ଭଗ୍ନାବଶେଷ ମାରିନା ଟାୱାର ନିକଟରେ ଗୋଟିଏ ଗାଡ଼ି ଉପରେ ପଡ଼ିଥିଲା ଯେଉଁଥିରେ ଜଣେ ଡ୍ରାଇଭରଙ୍କର ମୃତ୍ୟୁ ହୋଇଛି । ତେବେ ୟୁଏଇରେ ଯୁଦ୍ଧ ଆରମ୍ଭ ହେବା ପରଠାରୁ ମୃତ୍ୟୁ ସଂଖ୍ୟା ଚାରିକୁ ବୃଦ୍ଧି ପାଇଛି । ଅଧିକାରୀମାନେ କହିଛନ୍ତି ଯେ ସମସ୍ତ ମୃତକ ବିଦେଶୀ ନାଗରିକ । ଦୁବାଇ ସରକାରଙ୍କ ସରକାରୀ ମିଡିଆ ହ୍ୟାଣ୍ଡେଲ ଏକ୍ସରେ ପୋଷ୍ଟ କରିଛି ଯେ କର୍ତ୍ତୃପକ୍ଷ ନିଶ୍ଚିତ କରିଛନ୍ତି ଯେ ଏକ ସଫଳ ପ୍ରତିବନ୍ଧକ ଯୋଗୁଁ ହୋଇଥିବା ଭଗ୍ନାବଶେଷ ଦୁବାଇ ମାରିନାର ଏକ ଟାୱାର ସମ୍ମୁଖରେ ଏହି ଛୋଟ ଘଟଣା ଘଟାଇଛି । ପରିସ୍ଥିତିକୁ ନିୟନ୍ତ୍ରଣ କରାଯାଇଛି । ପୂର୍ବରୁ UAE ପ୍ରତିରକ୍ଷା ମନ୍ତ୍ରଣାଳୟ ପୋଷ୍ଟ କରି କହିଛି ଯେ ବାୟୁ ପ୍ରତିରକ୍ଷା ବର୍ତ୍ତମାନ ଇରାନରୁ ସୃଷ୍ଟି ହେଉଥିବା କ୍ଷେପଣାସ୍ତ୍ର ଏବଂ ଡ୍ରୋନ୍ ବିପଦର ଜବାବ ଦେଉଛି । ଇରାନ ଉପସାଗରୀୟ ଆରବ ଦେଶଗୁଡ଼ିକ ଆଡ଼କୁ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଡ଼ ଜାରି ରଖିଥିବା ସତ୍ତ୍ୱେ ପଡ଼ୋଶୀ ଦେଶଗୁଡ଼ିକ ଉପରେ ଆକ୍ରମଣ ପାଇଁ ଇରାନ ରାଷ୍ଟ୍ରପତି ମାସୁଦ ପେଜେଶକିୟାନ ଶନିବାର କ୍ଷମା ପ୍ରାର୍ଥନା କରିଛନ୍ତି । ଏହା ସୂଚାଇ ଦିଏ ଯେ ତେହେରାନର ରାଜନୈତିକ ନେତୃତ୍ୱର ଇରାନର ସଶସ୍ତ୍ର ବାହିନୀ ଉପରେ ପୂର୍ଣ୍ଣ ନିୟନ୍ତ୍ରଣ ନାହିଁ । ପେଜେଶକିୟାନ ମଧ୍ୟ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆତ୍ମସମର୍ପଣ ପାଇଁ ବାରମ୍ବାର ଦାବିକୁ ପ୍ରତ୍ୟାଖ୍ୟାନ କରିଛନ୍ତି ।

ପେଜେସ୍କିଆନଙ୍କ ବାର୍ତ୍ତାର କିଛି ସମୟ ପରେ ଟ୍ରମ୍ପ ଶନିବାର ଏକ ସୋସିଆଲ ମିଡିଆ ପୋଷ୍ଟରେ ଚେତାବନୀ ଦେଇଥିଲେ ଯେ ଯୁଦ୍ଧରେ ଅଧିକ ଇରାନୀ ଅଧିକାରୀଙ୍କୁ ଟାର୍ଗେଟ କରାଯିବ । ସେ ଲେଖିଛନ୍ତି, "ଆଜି ଇରାନ କଡ଼ା ଆଘାତ ପାଇବ ।" ଟ୍ରମ୍ପ ତାଙ୍କ ୱେବସାଇଟ୍ ଟ୍ରୁଥ୍ ସୋସିଆଲରେ ଏହି ମନ୍ତବ୍ୟ ଦେଇଛନ୍ତି ଯେଉଁଥିରେ ସେ ତେହେରାନର ଆକ୍ରମଣ ପାଇଁ ଇରାନୀ ରାଷ୍ଟ୍ରପତି ମାସୁଦ ପେଜେସ୍କିଆନଙ୍କ ପଡ଼ୋଶୀ ଦେଶମାନଙ୍କୁ କ୍ଷମା ପ୍ରାର୍ଥନା କଥା ଉଠାଇଛନ୍ତି । ସେ ଲେଖିଛନ୍ତି ଯେ ଇରାନର ଖରାପ ଆଚରଣ ଯୋଗୁଁ ପୂର୍ବରୁ ଟାର୍ଗେଟ କରିବା ପାଇଁ ବିଚାର କରାଯାଇ ନଥିବା ଅଞ୍ଚଳ ଏବଂ ଲୋକଙ୍କ ଗୋଷ୍ଠୀକୁ ଟାର୍ଗେଟ କରିବା ପାଇଁ ଏବେ ଗମ୍ଭୀରତାର ସହ ବିଚାର କରାଯାଉଛି । ଇରାନ ରାଷ୍ଟ୍ରପତି ଆକ୍ରମଣକୁ ନେଇ ଉପସାଗରୀୟ ଆରବ ଦେଶଗୁଡ଼ିକରେ ବଢ଼ୁଥିବା କ୍ରୋଧକୁ ଶାନ୍ତ କରିବାକୁ ଚେଷ୍ଟା କରିଥିଲେ । କିଛି ଘଣ୍ଟା ପୂର୍ବରୁ କ୍ଷେପଣାସ୍ତ୍ର ଏବଂ ଡ୍ରୋନ୍ ଆକ୍ରମଣ ଦୁବାଇ ଅନ୍ତର୍ଜାତୀୟ ବିମାନବନ୍ଦରରେ ବିମାନ ଉଡ଼ାଣ ବାଧାପ୍ରାପ୍ତ କରିଥିଲା । ସାଉଦି ଆରବର ଗୋଟିଏ ପ୍ରମୁଖ ତେଲ କ୍ଷେତ୍ରକୁ ଟାର୍ଗେଟ କରଯାଇଥିଲା ଏବଂ ଅନେକ ଲୋକଙ୍କୁ ବାହାରିନରେ ଜୀବନ ବଞ୍ଚାଇ ଅନ୍ୟତ୍ର ପଳାଇବାକୁ ବାଧ୍ୟ କରିଥିଲା । ପେଜେସ୍କିଆନ ଟ୍ରମ୍ପଙ୍କ ଦ୍ୱାରା କୁହାଯାଇଥିବା କଥାକୁ ମଧ୍ୟ ଦୋହରାଇଥିଲେ । ସେ କହିଥିଲେ ଯେ ଆମେରିକା ନିକଟରେ ନିଃସର୍ତ୍ତ ଆତ୍ମସମର୍ପଣ କରିବାକୁ ଇରାନକୁ କୁହାଯାଇଛି ଏହି ସ୍ବପ୍ନକୁ କବରକୁ ନେଇ ଯାଉ ଆମେରିକା । ପେଜେସ୍କିଆନ କହିଥିଲେ, "ମୁଁ ଇରାନ ଦ୍ୱାରା ଆକ୍ରମଣ ହୋଇଥିବା ପଡ଼ୋଶୀ ଦେଶମାନଙ୍କ ନିକଟରେ କ୍ଷମା ମାଗିବି । ଏବେଠାରୁ ସେମାନେ ପଡ଼ୋଶୀ ଦେଶ ଉପରେ ଆକ୍ରମଣ କରିବା କିମ୍ବା ସେମାନଙ୍କ ଉପରେ କ୍ଷେପଣାସ୍ତ୍ର ମାଡ଼ କରିବା ଉଚିତ୍ ନୁହେଁ । ମୁଁ ବିଶ୍ୱାସ କରେ ଆମେ କୂଟନୀତି ମାଧ୍ୟମରେ ଏହି ସମସ୍ୟାର ସମାଧାନ କରିବା ଉଚିତ ।"