ଦିଲ୍ଲୀ-ଏନସିଆରରେ ଘନ କୁହୁଡ଼ି ଓ ପ୍ରଦୂଷଣର ଚାଦର: ଦିଶିଲାନି ବାଟଘାଟ, ଲୋକେ ହନ୍ତସନ୍ତ

କନକ ବ୍ୟୁରୋ: ଦେଶର ରାଜଧାନୀ ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳ (NCR) ବର୍ତ୍ତମାନ ପ୍ରଦୂଷଣ ଏବଂ ଘନ କୁହୁଡ଼ିର ଏକ ଭୟଙ୍କର ସ୍ଥିତି ଦେଇ ଗତି କରୁଛି । ସୋମବାର ସକାଳେ ଦିଲ୍ଲୀର ରାସ୍ତାଘାଟ ସମ୍ପୂର୍ଣ୍ଣ ରୂପେ ଧୁଆଁ ଏବଂ କୁହୁଡ଼ିରେ ବୁଡ଼ି ରହିଥିଲା । ପରିସ୍ଥିତି ଏତେ ସଙ୍ଗୀନ ଥିଲା ଯେ ଦିନ ବେଳେ ମଧ୍ୟ ଅନ୍ଧାର ଭଳି ଅନୁଭବ ହେଉଥିଲା ।
 
ଦିଲ୍ଲୀର ବାୟୁ ଗୁଣବତ୍ତା ସୂଚକାଙ୍କ ବା ଏୟାର କ୍ୱାଲିଟି ଇଣ୍ଡେକ୍ସ  ପୁଣି ଥରେ ବିପଜ୍ଜନକ ସୀମା ପାର କରିଛି । ବିଶେଷକରି ଅକ୍ଷରଧାମ ଅଞ୍ଚଳରେ ସକାଳ ସମୟରେ AQI ୪୯୩ ରେକର୍ଡ କରାଯାଇଛି, ଯାହା "ଗୁରୁତର ପ୍ଲସ୍" (Severe Plus) ଶ୍ରେଣୀରେ ଆସେ । କେବଳ ଅକ୍ଷରଧାମ ନୁହେଁ, ଆନନ୍ଦ ବିହାର, ଅଶୋକ ବିହାର, ବୱାନା, ଏବଂ ଦ୍ୱାରକା ଭଳି ଅନେକ ଅଞ୍ଚଳରେ AQI ୪୫୦ରୁ ୫୦୦ ମଧ୍ୟରେ ରହିଛି। ଏହି ସ୍ତରର ପ୍ରଦୂଷଣ ସୁସ୍ଥ ଲୋକଙ୍କ ପାଇଁ ମଧ୍ୟ କ୍ଷତିକାରକ ଏବଂ ରୋଗୀଙ୍କ ପାଇଁ ପ୍ରାଣଘାତୀ ହୋଇପାରେ ।

ଅଧିକ ପଢନ୍ତୁ: ଦିଲ୍ଲୀରେ ପ୍ରଦୂଷଣ କଟକଣା: ଅଳିଆ ପୋଡ଼ିଲେ ୫୦୦୦ ଜରିମାନା

ପ୍ରଦୂଷଣର ଧୁଆଁ ଏବଂ ଶୀତଦିନର କୁହୁଡ଼ି ମିଶି "ସ୍ମଗ୍" ସୃଷ୍ଟି କରିଛି । ଏହାର ପ୍ରଭାବରେ ଦୃଶ୍ୟମାନ କ୍ଷମତା ବା ଭିଜିବିଲିଟି ଏତେ କମିଯାଇଛି ଯେ କିଛି ମିଟର ଦୂରରେ ଥିବା ଜିନିଷ ମଧ୍ୟ ଦେଖାଯାଉ ନାହିଁ। ଦିଲ୍ଲୀର ସଫଦରଜଙ୍ଗ ଏବଂ ପାଲମ ଅଞ୍ଚଳରେ ଭିଜିବିଲିଟି ଶୂନ (୦) ମିଟରକୁ ଖସି ଆସିଥିଲା । ରାସ୍ତାରେ ଯାଉଥିବା ଗାଡ଼ିଚାଳକମାନେ ବାଧ୍ୟ ହୋଇ ହେଡ୍ ଲାଇଟ୍ ଏବଂ ଇଣ୍ଡିକେଟର ଜଳାଇ ଅତି ଧୀର ଗତିରେ ଗାଡ଼ି ଚଳାଉଛନ୍ତି । ଭିଜିବିଲିଟି କମିବା କାରଣରୁ ବିମାନ ଏବଂ ରେଳ ସେବା ଉପରେ ଗୁରୁତର ପ୍ରଭାବ ପଡ଼ିଛି ।