Delhi Blast: ଦିଲ୍ଲୀ ବିସ୍ଫୋରଣ ଘଟଣାରେ ନୂଆ ସୁରାକ୍ ! EcoSport କାର୍ ଖୋଜୁଛି ପୁଲିସ

କନକ ବ୍ୟୁରୋ: ଦିଲ୍ଲୀ କାର୍ ବିସ୍ଫୋରଣ ସମ୍ପର୍କରେ ଏକ ବଡ଼ ଖବର ସାମ୍ନାକୁ ଆସିଛି। ଦିଲ୍ଲୀ ପୁଲିସ ଏକ କାର ସମ୍ପର୍କରେ ସତର୍କ ସୂଚନା ଜାରି କରିଛି, ଯାହାକୁ ସାରା ଦିଲ୍ଲୀରେ ଖୋଜା ଚାଲିଛି। ସନ୍ଦିଗ୍ଧ କାରଟି ହେଉଛି ଏକ ଲାଲ ରଙ୍ଗର ଇକୋ-ସ୍ପୋର୍ଟ ଯାହାର ନମ୍ବର DL10CK0458 ଏବଂ ଏହା ଉମର ନାମରେ ପଞ୍ଜିକୃତ ଅଛି । ପାଞ୍ଚଟି ପୁଲିସ ଦଳ କାରଟିକୁ ଖୋଜୁଛନ୍ତି । ତଦନ୍ତରୁ ଜଣାପଡିଛି ଯେ ସନ୍ଦିଗ୍ଧ ବ୍ୟକ୍ତିଙ୍କ ପାଖରେ i20 ବ୍ୟତୀତ ଏକ ଲାଲ ରଙ୍ଗର ଇକୋସ୍ପୋର୍ଟ ମଧ୍ୟ ଥିଲା। 

ଲାଲ ରଙ୍ଗର ଇକୋସ୍ପୋର୍ଟ କାର ଖୋଜିବା ପାଇଁ ଦିଲ୍ଲୀର ସମସ୍ତ ପୁଲିସ ଷ୍ଟେସନ, ପୁଲିସ ପୋଷ୍ଟ ଏବଂ ସୀମାନ୍ତ ଚେକ୍ ପୋଷ୍ଟଗୁଡ଼ିକୁ ସତର୍କ କରାଯାଇଛି। ଏହି ଲାଲ ରଙ୍ଗର କାର ସମ୍ପର୍କରେ ଉତ୍ତର ପ୍ରଦେଶ ଏବଂ ହରିୟାଣାର ପୁଲିସକୁ ମଧ୍ୟ ସତର୍କ କରାଯାଇଛି। ଦିଲ୍ଲୀ ପୁଲିସର ସୂଚନା ଅନୁଯାୟୀ, ଆତଙ୍କୀଙ୍କ ସହିତ ଏକ ଲାଲ ରଙ୍ଗର ଇକୋସ୍ପୋର୍ଟ କାର ଥାଇପାରେ ବୋଲି ଏକ ସତର୍କ ସୂଚନା ମିଳିଥିଲା। ଏହାପରେ ପୁଲିସ ଯାଞ୍ଚ କରିଥିଲା। ତେବେ ଏହି କାରଟି i-20 ସହିତ କୌଣସି ସ୍ଥାନରେ ଦେଖାଯାଇ ନାହିଁ, ପୋଲିସ ଏବେ ବି ଏହାକୁ ଖୋଜୁଛି।

ଆହୁରି ପଢ଼ନ୍ତୁ : ସୁବର୍ଣ୍ଣପୁରରେ ୪ କୋଟିର ଗଞ୍ଜେଇ ଜବତ, ୩ ଗିରଫ

ଅଲ ଫାଲାହ ବିଶ୍ୱବିଦ୍ୟାଳୟର ବଡ଼ ବୟାନ

ସେପଟେ ଦିଲ୍ଲୀ କାର ବିସ୍ଫୋରଣ ଘଟଣାକୁ ନେଇ  ଅଲ୍ ଫଲାହ ବିଶ୍ୱବିଦ୍ୟାଳୟ ଏକ ବଡ଼ ବିବୃତ୍ତି ଜାରି କରିଛି। ବିଶ୍ୱବିଦ୍ୟାଳୟ କହିଛି ଯେ ଗିରଫ ହୋଇଥିବା ଦୁଇ ଡାକ୍ତର ଏବଂ ବିସ୍ଫୋରଣ ମାମଲାର ମୁଖ୍ୟ ସନ୍ଦିଗ୍ଧ ବ୍ୟକ୍ତିଙ୍କ ସହ ଏହାର କୌଣସି ସମ୍ପର୍କ ନାହିଁ, କେବଳ ସେମାନେ ବିଶ୍ୱବିଦ୍ୟାଳୟରେ ନିଜ ନିଜ ପଦବୀରେ କାର୍ଯ୍ୟ କରିଥିଲେ। ବିଶ୍ୱବିଦ୍ୟାଳୟର କୁଳପତି ଭୂପିନ୍ଦର କୌର ଆନନ୍ଦ କହିଛନ୍ତି, "ଆମେ ଗଭୀର ଦୁଃଖିତ ଏବଂ ଏହି ଘଟଣାର ନିନ୍ଦା କରୁଛୁ। ଘଟଣା ଦ୍ୱାରା ପ୍ରଭାବିତ ନିର୍ଦ୍ଦୋଷ ଲୋକଙ୍କ ସହିତ ଆମର ସମବେଦନା ରହିଛି।"

ସେ କହିଛନ୍ତି, "ବିଶ୍ୱବିଦ୍ୟାଳୟ ସହିତ ଜଡିତ ଦୁଇ ଜଣ ଡାକ୍ତରଙ୍କୁ ଏଜେନ୍ସିଗୁଡ଼ିକ ଦ୍ୱାରା ଅଟକ ରଖାଯାଇଛି। ଆମେ ସ୍ପଷ୍ଟ କରିବାକୁ ଚାହୁଁଛୁ ଯେ ବିଶ୍ୱବିଦ୍ୟାଳୟର ଏହି ବ୍ୟକ୍ତିମାନଙ୍କ ସହିତ କୌଣସି ସମ୍ପର୍କ ନାହିଁ, କେବଳ ଏତିକି ଯେ, ସେମାନେ ସରକାରୀ ସ୍ତରରେ କାର୍ଯ୍ୟ କରୁଥିଲେ। ବିଶ୍ୱବିଦ୍ୟାଳୟ ତଦନ୍ତକାରୀ କର୍ତ୍ତୃପକ୍ଷଙ୍କ ସହିତ ସହଯୋଗ କରୁଛି ଯାହା ଦ୍ୱାରା ସେମାନେ ଜାତୀୟ ସୁରକ୍ଷା ସହିତ ଜଡିତ ଏହି ମାମଲାରେ ଏକ ନିରପେକ୍ଷ ଏବଂ ନିର୍ଣ୍ଣାୟକ ନିଷ୍ପତ୍ତି ନେଇପାରିବେ।"

ଆହୁରି ପଢ଼ନ୍ତୁ : ଭୂଟାନରୁ ଫେରିବା ପରେ ସିଧା LNJP ହସ୍ପିଟାଲରେ ପହଞ୍ଚିଲେ ପ୍ରଧାନମନ୍ତ୍ରୀ : ଆହତଙ୍କୁ ଭେଟି ସ୍ବାସ୍ଥ୍ୟାବସ୍ଥା ପଚାରିବୁଝିଲେ ନରେନ୍ଦ୍ର ମୋଦୀ

ଜାଣିରଖିବା ଉଚିତ ଯେ,  ଅଲ୍ ଫଲାହ ବିଶ୍ୱବିଦ୍ୟାଳୟରେ କାର୍ୟ୍ୟରତ ଜଣେ କାଶ୍ମୀର ଡାକ୍ତରଙ୍କ ଦ୍ୱାରା ଭଡ଼ା ନିଆଯାଇଥିବା ଦୁଇଟି କୋଠରୀରୁ ୨,୯୦୦ କିଲୋଗ୍ରାମ ବିସ୍ଫୋରକ ଉଦ୍ଧାର କରାଯାଇଥିଲା । ଡକ୍ଟର ମୁଜାମ୍ମିଲଙ୍କଠାରୁ ବିସ୍ଫୋରକ ଏବଂ ଅସ୍ତ୍ରଶସ୍ତ୍ର ଉଦ୍ଧାର କରାଯାଇଥିଲା । ତାଙ୍କୁ ଅକ୍ଟୋବର ୩୦ ତାରିଖରେ ଗିରଫ କରାଯାଇଥିଲା ।