ଶୋଷ ମେଣ୍ଟାଉଛି ଚୁଆ ପାଣି ; ବାରମ୍ବାର ଅଭିଯୋଗ ପରେ ବି ଶୁଣୁନି ପ୍ରଶାସନ

କନକ ବ୍ୟୁରୋ : ସ୍ୱାଭିମାନ ଅଞ୍ଚଳରେ ଗ୍ରାମବାସୀଙ୍କ ଶୋଷ ମେଣ୍ଟାଉଛି ଚୁଆ ପାଣି । ଟୋପାଏ ପାଣି ପାଇଁ ସକାଳୁ ସକାଳୁ ଗାଁ ଠାରୁ ଦୁଇ କିଲୋମିଟର ଦୂରରେ ଥିବା ଚୁଆ ପାଖରେ ଲାଗୁଛି ମହିଳାଙ୍କ ଭିଡ଼ । ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ସ୍ୱାଭିମାନ ଅଞ୍ଚଳ ସ୍ଥିତ ଲୁଚାପାନୀ ଗ୍ରାମର ଖବର । ଏଠି ପିଇବା ପାଣି ପାଇଁ ଯିବାକୁ ପଡ଼େ ଦୁଇ କିଲୋମିଟର । ସକାଳୁ ସକାଳୁ ଗ୍ରାମର ମହିଳା ମାନେ ଦୁଇ କିଲୋମିଟର ପାହାଡ଼ ତଳେ ଥିବା ଚୁଆ ପାଖକୁ ଯାଇ ସଂଗ୍ରହ କରନ୍ତି ପାଣି । ଯିଏ ପ୍ରଥମେ ଚୁଆ ପାଖରେ ପହଞ୍ଚେ ସିଏ ପାଏ ସଫା ପାଣି । ଆଉ ଯିଏ ଶେଷରେ ପହଞ୍ଚେ ତାକୁ ଗୋଳିଆ ପାଣି ଭରସା । ବର୍ଷ ବର୍ଷ ଧରି ଗ୍ରାମବାସୀ ଏଭଳି ସମସ୍ୟା ଭୋଗି ଆସୁଥିବା ବେଳେ ଏହାରି ଉପରେ ପଡ଼ୁନି ପ୍ରଶାସନର ନଜର। ଯାହାକୁ ନେଇ ଏବେ କ୍ଷୋଭ ପ୍ରକାଶ କରିଛନ୍ତି ଗ୍ରାମବାସୀ । 

ଦୁଇ ବର୍ଷ ତଳେ ଗ୍ରାମରେ ପାନୀୟଜଳ ଯୋଗାଇ ଦେବା ପାଇଁ ଏକ ବୋରୱେଲ ଖୋଳି ସୋଲାର ବେସ୍‌ ପମ୍ପ ସାହାଯ୍ୟରେ ଗ୍ରାମବାସୀଙ୍କ ପାଇଁ ପାନୀୟଜଳ ବ୍ୟବସ୍ଥା କରିଥିଲା ପ୍ରଶାସନ । କିନ୍ତୁ ତାହା ଗତ ୬ମାସ ଧରି ଅଚଳ ଅବସ୍ଥାରେ ପଡ଼ି ରହିଛି । ବାରମ୍ବାର ଅଭିଯୋଗ ପରେ ମଧ୍ୟ କେହି ସଜାଡ଼ୁ ନଥିବା ହୋଇଛି ଅଭିଯୋଗ । ସେଭଳି ଚୁଆ ପାଣି ପିଇବା ଦ୍ଵାରା କାଛୁ କୁଣ୍ଡିଆ, ଜ୍ବର, କାଶ ଆଦି ନାନା ସମସ୍ୟାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ଅନେକ ଥର ଏହି ସମସ୍ୟା ନେଇ ପଞ୍ଚାୟତ କାର୍ଯ୍ୟାଳୟ ଠାରୁ ଆରମ୍ଭ କରି ବ୍ଲକ ପ୍ରଶାସନକୁ ଜଣାଇ ଆସୁଥିଲେ ମଧ୍ୟ କେହି ଶୁଣୁନଥିବା କହିଛନ୍ତି ଗ୍ରାମବାସୀ ।

ଅଧିକ ପଢନ୍ତୁ :  ପୁରୀ ସାକ୍ଷୀଗୋପାଳରେ ପିଇବା ପାଣିକୁ ନେଇ ଗଣ୍ଡଗୋଳ : ୪ଗୁରୁତର