କନକ ବ୍ୟୁରୋ : ରୁଷ ଓ ଭାରତ ମଧ୍ୟରେ ବାଣିଜ୍ୟକୁ ସୁଗମ ଏବଂ ତ୍ୱରାନ୍ୱିତ କରିବା ପାଇଁ ଏକ ନୂତନ ସମୁଦ୍ର ପଥ ବିକଶିତ କରାଯାଉଛି। ଏହାକୁ ଚେନ୍ନାଇ-ଭ୍ଲାଡିଭୋସ୍ତକ୍ ସାମୁଦ୍ରିକ କରିଡର କୁହାଯାଉଛି। ଏହି ମାର୍ଗ ଦକ୍ଷିଣ ଭାରତର ଚେନ୍ନାଇ ବନ୍ଦରକୁ ରୁଷର ଦୂର ପୂର୍ବ ସହର ଭ୍ଲାଡିଭୋସ୍ତକ୍ ସହିତ ସଂଯୋଗ କରିବ। ଏହି କରିଡର ଖୋଲିବା ଦ୍ୱାରା ଦୁଇ ଦେଶ ମଧ୍ୟରେ ସାମଗ୍ରୀ ପରିବହନ ପାଇଁ ଲାଗୁଥିବା ସମୟ ହ୍ରାସ ପାଇବ।

Advertisment

ମାଲ୍‌ ପରିବହନ ପାଇଁ ଲାଗିବ ୨୪ ଦିନ
ବର୍ତ୍ତମାନ, ଭାରତରୁ ରୁଷକୁ ସମୁଦ୍ର ପଥରେ ସାମଗ୍ରୀ ପରିବହନ କରିବାକୁ ୪୦ ଦିନ କିମ୍ବା ତା’ଠାରୁ ଅଧିକ ସମୟ ଲାଗୁଛି। ନୂତନ ଚେନ୍ନାଇ-ଭ୍ଲାଡିଭୋସ୍ତକ୍ କରିଡର ଏହି ସମୟକୁ ପ୍ରାୟ ୨୪ ଦିନକୁ ହ୍ରାସ କରିପାରିବ ବୋଲି କୁହାଯାଉଛି। ଏହାର ଅର୍ଥ ହେଉଛି ପୂର୍ବ ଅପେକ୍ଷା ପ୍ରାୟ ଦୁଇ ସପ୍ତାହ ଶୀଘ୍ର ସାମଗ୍ରୀ ପରିବହନ ହୋଇପାରିବ।। ଏହା ବାଣିଜ୍ୟ କମ୍ପାନିଗୁଡ଼ିକୁ ଯଥେଷ୍ଟ ଲାଭ ଦେବ। ସାମଗ୍ରୀଗୁଡ଼ିକ କମ୍ ସମୟ ପାଇଁ ଗୋଦାମରେ ରହିବ, ଯାହା ଫଳରେ ସଂରକ୍ଷଣ ଖର୍ଚ୍ଚ ହ୍ରାସ ପାଇବ।

ଅଧିକ ପଢ଼ନ୍ତୁ : ଭାରତ ଯେକୌଣସି ଦେଶରୁ ତୈଳ କିଣିବାକୁ ମୁକ୍ତ: ରୁଷ୍‌ ଭେନେଜୁଏଲାରୁ ତୈଳ କିଣିବାକୁ ନେଇ ଟ୍ରମ୍ପଙ୍କ ଦାବି ପରେ କ୍ରେମଲିନ୍‌ ପକ୍ଷରୁ ବୟାନ ଜାରି

କରିଡର କେବେ ଆରମ୍ଭ ହେବ?
ଚେନ୍ନାଇରେ ରୁଷ କନସଲ ଜେନେରାଲ ଭାଲେରି ଖୋଡଜାଏଭ କହିଛନ୍ତି ଯେ, ଏହି ସମୁଦ୍ର କରିଡର ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ। ଯେ ରୁଷ ଏହି ମାର୍ଗକୁ କାର୍ୟ୍ୟକ୍ଷମ କରିବା ପାଇଁ ନିରନ୍ତର କାର୍ୟ୍ୟ କରୁଛି। ଯଦିଓ ଏହି କାମ ରାତାରାତି ସମାପ୍ତ ହେବ ନାହିଁ, ଏହାକୁ କାର୍ୟ୍ୟକାରୀ କରିବା ଅତ୍ୟନ୍ତ ଜରୁରୀ। ରୁଷ ଭାରତ ସହିତ ବାଣିଜ୍ୟକୁ ଅଧିକ ସନ୍ତୁଳିତ କରିବାକୁ ଚାହୁଁଛି। ବିଶେଷକରି ଭାରତର ଦକ୍ଷିଣ ଅଞ୍ଚଳ ଏଥିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବେ। ଦକ୍ଷିଣ ଭାରତର ରାଜ୍ୟଗୁଡ଼ିକରେ ଏକ ଦୃଢ଼ ଶିଳ୍ପ ଭିତ୍ତିଭୂମି ଅଛି। ସେଠାରେ ଅନେକ ପ୍ରମୁଖ ଇଞ୍ଜିନିୟରିଂ, ଔଷଧ, ପ୍ରକ୍ରିୟାକରଣ ଓ ଉତ୍ପାଦନ କେନ୍ଦ୍ର ରହିଛି। ଏହି ନୂତନ ବନ୍ଦର-ବନ୍ଦର ସମୁଦ୍ର ପଥ ଲଜିଷ୍ଟିକ୍ସ କମ୍ପାନିଗୁଡ଼ିକ ପାଇଁ ଅତ୍ୟନ୍ତ ଲାଭଦାୟକ ବୋଲି ବିବେଚନା କରାଯାଉଛି। 

ଅଧିକ ପଢ଼ନ୍ତୁ : ଭାରତ, ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ଆମେ ମଧ୍ୟସ୍ଥି ନୁହଁ: ବିବାଦରୁ ନିଜକୁ ଦୂରେଇ ରଖିଲା ରୁଷ

ଏହି କରିଡର ଦ୍ବାରା କ’ଣ ଲାଭ ହେବ?
ଏହି ନୂତନ ସମୁଦ୍ର ପଥ ଅତ୍ୟଧିକ ଲମ୍ବା ଓ ଭିଡ଼ ଥିବା ପୁରୁଣା ରୁଟ୍‌ର ଏକ ବିକଳ୍ପ ଭାବେ କାର୍ୟ୍ୟ କରିବ। କମ ଦୂରତା ଓ କମ ସମୟ ଯୋଗୁ କମ୍ପାନିଗୁଡ଼ିକ ପାଇଁ ଖର୍ଚ୍ଚ ନିୟନ୍ତ୍ରଣ କରିବା ସହଜ ହେବ। ସ୍ଥିର ମୂଲ୍ୟ ଓ ବାଣିଜ୍ୟରେ ସମୟାନୁସାରେ ବିତରଣକୁ ସୁନିଶ୍ଚିତ କରିବ। ତେବେ ଏହି କରିଡର ସଫଳ ହେବା ପାଇଁ, ନିୟମିତ ପରିବହନ ଓ ନିର୍ଦ୍ଧାରିତ ପରିବହନ ତଥା କାର୍ଗୋ ଜରୁରୀ। ଯଦି ଏହି କରିଡର ସ୍ଥାୟୀ ଭାବରେ କାର୍ୟ୍ୟକ୍ଷମ ହୁଏ, ତେବେ ଏହା ଭାରତ ଓ ରୁଷ ମଧ୍ୟରେ ବାଣିଜ୍ୟକୁ ତ୍ୱରାନ୍ୱିତ କରିବାରେ ତଥା ଲଜିଷ୍ଟିକ୍ସ ବିପଦକୁ ହ୍ରାସ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ।