କନକ ବ୍ୟୁରୋ : ବିଏମସି କର୍ମଚାରୀଙ୍କୁ ବିଜେପି ନେତା ଆକ୍ରମଣ କରିବା ଘଟଣା ମନରୁ ନଯାଉଣୁ, କେନ୍ଦ୍ରପଡା ରାଜନଗରରୁ ଆସିଛି ସାଂଘାତିକ ଅଭିଯୋଗ । ମହିଳା ବିଡିଓଙ୍କୁ ବିଜେପି ନେତା ଲଳିତ ବେହେରା ଲାପଟପ୍ ଉଠାଇ ଆକ୍ରମଣ କରିବା ପରେ ଉତ୍ତେଜନା ପ୍ରକାଶ ପାଇଛି । ବିଜେପି ନେତାଙ୍କ ଏଭଳି କାର୍ଯ୍ୟର ପ୍ରତିବାଦରେ ରାସ୍ତାରୋକ କରିଛି ବିଜେଡି । ଅନ୍ୟପଟେ ବିଜେପି କହିଛି, ଘଟଣାର ତଦନ୍ତ କରାଯାଇ ଆଇନ ଅନୁଯାୟୀ ଯିଏ ଦୋଷୀ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

Advertisment

ମହିଳା ବିଡିଓଙ୍କୁ ଆକ୍ରମଣ ସମୟର ଭିଡ଼ିଓ ସାମନାକୁ ଆସିବା ପରେ ଅଶାନ୍ତ ହୋଇଛି ରାଜନଗର । ଏଭଳି ଘଟଣାକୁ ନିନ୍ଦା କରି ରାସ୍ତାକୁ ଓହ୍ଲାଇଛି ବିଜେଡି । ଏଭଳି କାଣ୍ଡ ଘଟଣାଇଥିବା ବିଜେପି ନେତା ଲଳିତ ବେହେରା ଓ ତାଙ୍କ ସମର୍ଥକଙ୍କ ଗିରଫ ଦାବିରେ କଟକକୁ ସଂଯୋଗ କରୁଥିବା ମୁଖ୍ୟ ରାସ୍ତା ଅବରୋଧ କରିଛନ୍ତି । ଏଥିସହ ରାଜ୍ୟରେ ମହିଳା ଅସୁରକ୍ଷିତ ଅଭିଯୋଗ ଆଣି ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ରାଜନଗର ବିଧାୟକ ।

ଅଧିକ ପଢ଼ନ୍ତୁ : ନିଷ୍ପତ୍ତି ହୋଇଥିଲା, ମୋହର ବାଜିଲା : ବଢ଼ିଲା ବିଡିଓଙ୍କ ଆର୍ଥିକ କ୍ଷମତା

ବିଡିଓ ତିଳୋତମା ପୃଷ୍ଟିଙ୍କ ଚ୍ୟାମ୍ବରରେ ପହଁଚିଥିଲେ ବିଜେପି ନେତା ଲଳିତ ବେହେରା ଓ ତାଙ୍କ ସମର୍ଥକ । ବିଡିଓଙ୍କ ସହ କୌଣସି କଥାକୁ ନେଇ ଲଳିତ ଓ ଅନ୍ୟମାନଙ୍କର ଯୁକ୍ତିତର୍କ ହୋଇଥିଲା । ତାପରେ ଉତକ୍ଷିପ୍ତ ହୋଇ ଲଳିତ ଟେବୁଲ ଉପରେ ଥିବା ଲାପଟପ୍ ଉଠାଇ ଆକ୍ରମଣ ଉଦ୍ୟମ କରିଥିଲେ । ସେହି ସମୟର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ବିଡ଼ିଓ ଏନେଇ ଜିଲ୍ଲାପାଳଙ୍କୁ ଜଣାଇଛନ୍ତି । ଏହି ଘଟଣା ପରେ ବ୍ଲକରେ ଅଚଳାବସ୍ଥା ସୃଷ୍ଟି ହୋଇଛି ।

ମହିଳା ବିଡିଓଙ୍କ ଆକ୍ରମଣକୁ ନେଇ ରାଜନୀତି ତେଜୁଥିବାବେଳେ ନିଜ ଆଡୁ ତଦନ୍ତ ଆରମ୍ଭ କରିଛି ପୁଲିସ୍ । ସେଦିନ କଣ ହୋଇଥିଲା, ତାର ସବିଶେଷ ତଥ୍ୟ ସଂଗ୍ରହ କରୁଛି । ସେପଟେ ବିଜେପି ବିଧାୟକ କହିଛନ୍ତି, ଘଟଣାର ତଦନ୍ତ କରାଯାଇ ଆଇନ ଅନୁଯାୟୀ ଯିଏ ଦୋଷୀ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ଏବେ ଅପେକ୍ଷା ଏହି ମାମଲାର ତଦନ୍ତ ନିରପେକ୍ଷତାର ସହ ହେଉଛି, ନା ଚାପରେ ଚପି ଯିବ ?