କନକ ବ୍ୟୁରୋ : ରାଜନୀତିର ହଟଚମଟ ଭିତରେ କିଛି ସମ୍ପର୍କର ଗଭୀରତା ଓ ତ୍ୟାଗ ଏପରି ଭାବରେ ସାମ୍ନାକୁ ଆସେ ଯାହା ସମସ୍ତଙ୍କ ହୃଦୟକୁ ଛୁଇଁଯାଏ । ସେହିପରି ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ଝିଅ ରୋହିଣୀଙ୍କ ଏକ ହୃଦୟସ୍ପର୍ଶୀ ପୋଷ୍ଟ ଏବେ ଚର୍ଚ୍ଚାର ବିଷୟ ପାଲଟିଛି । ରାଜନୈତିକ କଟାକ୍ଷ ଏବଂ ବାଦ ବିବାଦଠାରୁ ଦୂରରେ ରହି ସେ ନିଜ ପରିବାର ପ୍ରତି ଥିବା ଗଭୀର ଭଲପାଇବା ନେଇ ନିଜର ଭାବନାକୁ ବ୍ୟକ୍ତ କରିଛନ୍ତି । ବିହାର ନିର୍ବାଚନ ଫଳାଫଳ ପରେ ଆରଜେଡି ସୁପ୍ରିମୋ ଲାଲୁ ଯାଦବଙ୍କ ପରିବାରରେ ଚାଲିଥିବା ବିବାଦ ମଧ୍ୟରେ ରୋହିଣୀ ଆଚାର୍ଯ୍ୟଙ୍କ ନୂଆ X ପୋଷ୍ଟ ସାମ୍ନାକୁ ଆସିଛି, ଯାହା ରାଜନୈତିକ ହଲଚଲକୁ ତୀବ୍ର କରିଛି । କିଛି ଦିନ ପୂର୍ବରୁ ସେ ରାଜନୀତି ଛାଡ଼ିବା ଏବଂ ପରିବାର ସହିତ ସମ୍ପର୍କ ଛିନ୍ନ କରିବାକୁ ଘୋଷଣା କରିଥିଲେ । ବର୍ତ୍ତମାନ ସେ ତାଙ୍କର ସଦ୍ୟତମ ପୋଷ୍ଟରେ ଯେଉଁଭଳି ଭାବରେ ନିଜର ଦୁଃଖ ବର୍ଣ୍ଣନା କରିଛନ୍ତି, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

Advertisment

ରୋହିଣୀ ନିଜ ପୋଷ୍ଟରେ ଲେଖିଛନ୍ତି- " ଜଣେ ଝିଅ, ଜଣେ ଭଉଣୀ, ଜଣେ ବିବାହିତା ମହିଳା, ଜଣେ ମାଆକୁ ଅପମାନିତ କରାଗଲା, ଅଶ୍ଳୀଳ ଗାଳି ଦିଆଗଲା, ମାରିବା ପାଇଁ ଚପଲ ଉଠାଗଲା । ମୁଁ କେବେହେଲେ ମୋର ଆତ୍ମସମ୍ମାନ ସହିତ ସାଲିସ କରିନାହିଁ, ସତ୍ୟକୁ ସମର୍ପଣ କରିନାହିଁ, କେବଳ ଏହି କାରଣରୁ ହିଁ ମୋତେ ଅପମାନ ସହିବାକୁ ପଡ଼ିଲା । କାଲି ଜଣେ ଝିଅ ବାଧ୍ୟ ହୋଇ ନିଜର କାନ୍ଦୁଥିବା ମାଆ-ବାପା ଭଉଣୀମାନଙ୍କୁ ଛାଡ଼ି ଆସିଲା, ମୋର ବାପଘର ଛଡ଼ାଗଲା.. ମୋତେ ଅନାଥ କରିଦିଆଗଲା । କେହି ବି ମୋ ରାସ୍ତାରେ ଚାଲନ୍ତୁ ନାହିଁ, କୌଣସି ଘରେ ରୋହିଣୀ ଭଳି ଝିଅ-ଭଉଣୀ ଜନ୍ମ ନିଅନ୍ତୁ ନାହିଁ ।"

ଅଧିକ ପଢନ୍ତୁ... ପୁରୀ ଭଳି କେନ୍ଦ୍ରାପଡ଼ାରେ ହେବ ବଳଦେବଜୀଉଙ୍କ ପରିକ୍ରମା ପ୍ରକଳ୍ପ; ଖର୍ଚ୍ଚ ହେବ ୧୦୦ କୋଟି

ଖାଲି ସେତିକି ନୁହେଁ ,ରୋହିଣୀ ଆଚାର୍ଯ୍ୟ X ରେ ପୋଷ୍ଟ କରି ରାଜନୀତି ଛାଡ଼ିବା ଏବଂ ନିଜ ପରିବାର ସହିତ ସମ୍ପର୍କ ଛିନ୍ନ କରିବା କଥା କହିଛନ୍ତି । ତାଙ୍କର ଏହି ନିଷ୍ପତ୍ତି ରାଜନୈତିକ ଜଗତରେ ନୂଆ ଚର୍ଚ୍ଚା ସୃଷ୍ଟି କରିଛି । ସବୁବେଳେ ପିତା ଲାଲୁ ପ୍ରସାଦଙ୍କ ସହିତ ଠିଆ ହେଉଥିବା ରୋହିଣୀଙ୍କ ଏହି ପଦକ୍ଷେପ ପରିବାର ଭିତରେ ଅତ୍ୟଧିକ ତିକ୍ତତା ଥିବା ଦର୍ଶାଉଛି । ରୋହିଣୀଙ୍କ ଏହି ଭାବପ୍ରବଣ ପୋଷ୍ଟ ପରେ ଲୋକମାନେ ପଚାରୁଛନ୍ତି ଯେ ଶେଷରେ ପରିବାର ଭିତରେ ଏଭଳି ପରିସ୍ଥିତି କାହିଁକି ଆସିଲା? ବିଶେଷ କରି ଆରଜେଡି କ୍ୟାମ୍ପ କିମ୍ବା ଲାଲୁ ପରିବାର ପକ୍ଷରୁ ଏପର୍ଯ୍ୟନ୍ତ ଏନେଇ କୌଣସି ଆଧିକାରିକ ପ୍ରତିକ୍ରିୟା ଆସିନାହିଁ ।

ରାଜନୈତିକ ବିଶେଷଜ୍ଞମାନେ ମତ ଦେଉଛନ୍ତି ଯେ ନିର୍ବାଚନ ଫଳାଫଳରୁ ସୃଷ୍ଟି ହୋଇଥିବା ନିରାଶା ଏବଂ ପରିବାର ଭିତରେ ଚାଲିଥିବା ବିବାଦର ପ୍ରଭାବ ବର୍ତ୍ତମାନ ସ୍ପଷ୍ଟ ଭାବରେ ଦେଖାଯାଉଛି । ଆରଜେଡି ପୂର୍ବରୁ ହିଁ ନିର୍ବାଚନୀ ଝଟ୍‌କାରୁ ମୁକୁଳିବାକୁ ଚେଷ୍ଟା କରୁଛି, ଏଭଳି ପରିସ୍ଥିତିରେ ପରିବାରର ଏହି କଳହ ଦଳ ପାଇଁ ଏକ ନୂଆ ଚ୍ୟାଲେଞ୍ଜ ସୃଷ୍ଟି କରିପାରେ ।