ଲକ୍ଷ୍ନୌ ଟି-୨୦ ବାତିଲରୁ ଶିକ୍ଷା ପାଇଲା BCCI; ପାଗ ଦେଖି ପ୍ରସ୍ତୁତ ହେବ କାର୍ଯ୍ୟସୂଚୀ

କନକ ବ୍ୟୁରୋ : ଲକ୍ଷ୍ନୌରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବାକୁ ଥିବା ଚତୁର୍ଥ ଟି-୨୦ ମ୍ୟାଚ୍ ଘନ କୁହୁଡ଼ି ଯୋଗୁଁ ବାତିଲ ହୋଇଯାଇଛି । କୁହୁଡ଼ି ଏତେ ଅଧିକ ଥିଲା ଯେ ଟସ୍ ମଧ୍ୟ ପଡ଼ିପାରି ନଥିଲା । ମ୍ୟାଚ୍ ବାତିଲ ହେବା ପରେ ଷ୍ଟାଡିୟମରେ ଉପସ୍ଥିତ ଥିବା ହଜାର ହଜାର ପ୍ରଶଂସକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଏହି ଘଟଣା ପରେ ଏବେ ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (BCCI) ଏକ ବଡ଼ ନିଷ୍ପତ୍ତି ନେବାକୁ ଯାଉଛି । ଭବିଷ୍ୟତରେ ମ୍ୟାଚ୍ ସିଡ୍ୟୁଲ୍ ବା କାର୍ଯ୍ୟସୂଚୀ ପ୍ରସ୍ତୁତ କଲାବେଳେ ବୋର୍ଡ ପାଗ ଏବଂ ପ୍ରଦୂଷଣକୁ ଗୁରୁତ୍ୱର ସହ ବିଚାର କରିବ ବୋଲି କହିଛି ।

ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା ଏକ ସାକ୍ଷାତକାରରେ କହିଛନ୍ତି ଯେ ମ୍ୟାଚ୍ ବାତିଲ ହେବା ଅତ୍ୟନ୍ତ ନିରାଶାଜନକ । ସେ କହିଛନ୍ତି, "ସମସ୍ତ ପ୍ରସ୍ତୁତି ଶେଷ ହୋଇଥିଲା ଏବଂ ଶେଷ ମୁହୂର୍ତ୍ତ ପର୍ଯ୍ୟନ୍ତ ନିରୀକ୍ଷଣ କରାଯାଇଥିଲା, କିନ୍ତୁ ଘନ କୁହୁଡ଼ି ଯୋଗୁଁ ଖେଳ ବାତିଲ କରିବାକୁ ପଡିଲା ।" ଏହି ମ୍ୟାଚ୍ ଅଟଳ ବିହାରୀ ବାଜପେୟୀ ଇକାନା ଷ୍ଟାଡିୟମରେ ସନ୍ଧ୍ୟା ୭ଟାରେ ଆରମ୍ଭ ହେବାର ଥିଲା, କିନ୍ତୁ ଖରାପ ଭିଜିବିଲିଟି କାରଣରୁ ରାତି ୯:୩୦ ରେ ଅଧିକାରୀମାନେ ଖେଳ ବାତିଲ କରିଥିଲେ । ରାଜୀବ ଶୁକ୍ଲା ସ୍ୱୀକାର କରିଛନ୍ତି ଯେ ଡିସେମ୍ବର ୧୫ ରୁ ଜାନୁଆରୀ ୧୫ ମଧ୍ୟରେ ଉତ୍ତର ଭାରତରେ କୁହୁଡ଼ି ଏକ ବଡ଼ ସମସ୍ୟା ପାଲଟିଥାଏ । ତେଣୁ ଆଗାମୀ ଦିନରେ କାର୍ଯ୍ୟସୂଚୀ ପ୍ରସ୍ତୁତ କରିବା ସମୟରେ ଏହି ଦିଗ ପ୍ରତି ଧ୍ୟାନ ଦେବା ଜରୁରୀ ।

ଅଧିକ ପଢ଼ନ୍ତୁ---ରାଗିଗଲେ ବୁମରା ; ଫୋପାଡ଼ିଲେ ଫ୍ୟାନ୍ସଙ୍କ ଫୋନ୍

କେବଳ କୁହୁଡ଼ି ନୁହେଁ, ପ୍ରଦୂଷଣ ମଧ୍ୟ ଏକ ବଡ଼ ସମସ୍ୟା । ଦିଲ୍ଲୀ-ଏନସିଆର ଏବଂ ଉତ୍ତରପ୍ରଦେଶର ଅନେକ ସ୍ଥାନରେ ବାୟୁର ଗୁଣବତ୍ତା ଖରାପ ରହୁଛି, ଯାହା ଖେଳାଳିଙ୍କ ପାଇଁ କଷ୍ଟକର ପରିସ୍ଥିତି ସୃଷ୍ଟି କରୁଛି । ସୋସିଆଲ ମିଡିଆରେ ମଧ୍ୟ ପ୍ରଶଂସକମାନେ ପ୍ରଶ୍ନ ଉଠାଇଛନ୍ତି ଯେ ଶୀତଦିନେ ଉତ୍ତର ଭାରତରେ ମ୍ୟାଚ୍ ଆୟୋଜନ ପୂର୍ବରୁ ବିକଳ୍ପ ବ୍ୟବସ୍ଥା କାହିଁକି କରାଯାଇନଥିଲା ? ଏହି ଘଟଣା ପରେ ଏହା ସ୍ପଷ୍ଟ ହୋଇଛି ଯେ ଆଗାମୀ ସମୟରେ ବିସିସିଆଇକୁ ଉତ୍ତର ଭାରତରେ ଶୀତକାଳୀନ ମ୍ୟାଚ୍ ଆୟୋଜନ ନେଇ ଅଧିକ ସତର୍କ ରହିବାକୁ ପଡିବ ।