ବସନ୍ତ ପଞ୍ଚମୀରେ ଘରକୁ ଆଣନ୍ତୁ ୫ ଜିନିଷ : କୃପା କରିବେ ମା’ ବୀଣାପାଣି,ରହିବନି ଧନର ଅଭାବ

ଯା କୁନ୍ଦେନ୍ଦୁ ତୁଷାର ହାର ଧବଳା, ଯା ଶୁଭ୍ର ବସ୍ତ୍ରବୃତ୍ତା, 
ଯା ବୀଣା ବରଦଣ୍ଡ ମଣ୍ଡିତକରା,ଯା ଶ୍ୱେତ ପଦ୍ମାସନା ll
ଯା ବ୍ରହ୍ମାଚ୍ୟୁତ ଶଙ୍କର ପ୍ରଭୃତିଭିଃ ଦେବୈ ସଦାବନ୍ଦିତା, 
ସା ମାଂ ପାତୁ ସରସ୍ବତୀ ଭଗବତୀ ନିଃଶେଷ ଜାଡ଼୍ୟାପହା l

କନକ ବ୍ୟୁରୋ : ପବିତ୍ର ବସନ୍ତ ପଞ୍ଚମୀରେ ବିଦ୍ୟାଦାତ୍ରୀ ମା’ ସରସ୍ବତୀଙ୍କୁ ଆରାଧନା କରାଯାଏ । ପ୍ରତିବର୍ଷ ମାଘ ମାସ ଶୁକ୍ଳ ପକ୍ଷର ପଞ୍ଚମୀ ତିଥିରେ ମା’ ବାଗଦେବୀ ବିଦ୍ୟାର୍ଥୀଙ୍କୁ ଆଶୀର୍ବାଦ ଦେବାକୁ ଧରାପୃଷ୍ଠକୁ ଓହ୍ଲାଇ ଆସନ୍ତି । ହିନ୍ଦୁ ବିଶ୍ୱାସ ଅନୁସାରେ ମାଘ ମାସର ଶୁକ୍ଳ ପକ୍ଷ ପଞ୍ଚମ ଦିନରେ ମା’ବୀଣାପାଣି ଆବିର୍ଭାବ ହୋଇଥିଲେ । ବସନ୍ତ ପଞ୍ଚମୀ କେବଳ ଏକ ପର୍ବ ନୁହେଁ ବରଂ ବର୍ଷର ଏକ ଶୁଭ ସମୟ । ଯେଉଁଥିପାଇଁ ଏହି ଦିନ କିଛି ଜିନିଷ ଘରକୁ ଆଣିବା ବହୁତ ଶୁଭ ବୋଲି କୁହାଯାଏ । ତେବେ ବସନ୍ତ ପଞ୍ଚମୀରେ କେଉଁ କେଉଁ ଜିନିଷ ଘରକୁ ଆଣିଲେ ଶୁଭ ହେବ ଆସନ୍ତୁ ଜାଣିବା । ହିନ୍ଦୁ କ୍ୟାଲେଣ୍ଡର ଅନୁସାରେ ୨୦୨୬ ମସିହା ମାଘ ମାସର ଶୁକ୍ଳ ପକ୍ଷର ପଞ୍ଚମୀ ତିଥି ସରସ୍ବତୀ ପୂଜାର ପୂର୍ବଦିନ ସନ୍ଧ୍ୟା ୬.୧୫ ରେ ଆରମ୍ଭ ହେଉଛି । ଏହି ଦିନ ଘରକୁ ୫ ଟି ଜିନିଷ ଆଣିବା ଅତ୍ୟନ୍ତ ଶୁଭ । ଯେଉଁଥିରେ ପ୍ରଥମେ ଆସେ -

ହଳଦିଆ କାଉଡି

ବସନ୍ତ ପଞ୍ଚମୀରେ ଘରକୁ ପାଞ୍ଚଟି ହଳଦିଆ କଉଡ଼ି ଆଣନ୍ତୁ । ଏହି କଉଡ଼ିକୁ ଦେବୀ ଲକ୍ଷ୍ମୀଙ୍କ ପାଦ ତଳେ ରଖନ୍ତୁ ଏବଂ ଧନ,ସମୃଦ୍ଧି ପାଇଁ ପ୍ରାର୍ଥନା କରନ୍ତୁ । ତା'ପରେ କଉଡ଼ିଗୁଡ଼ିକୁ ସିନ୍ଦୁରରେ ବାନ୍ଧି ରଖନ୍ତୁ । ଏହା ଘରେ ସମୃଦ୍ଧିର ଦ୍ବାରକୁ ଖୋଲିବ ଏବଂ ଘରେ ନିରନ୍ତର ଟଙ୍କା ପ୍ରବାହ ସୁନିଶ୍ଚିତ କରିବ ।

ଆଗକୁ ପଢ଼ନ୍ତୁ : କେମିତି ହୋଇଥିଲା ମା’ ବଗଳାମୁଖୀଙ୍କ ଉତ୍ପତ୍ତି ? କ’ଣ କୁହେ ପୌରାଣିକ ଗାଥା ?

ବିବାହ ସହ ଜଡ଼ିତ ଜିନିଷ

ବସନ୍ତ ପଞ୍ଚମୀ ଦିନ ବିବାହ ସମ୍ବନ୍ଧୀୟ ଜିନିଷପତ୍ର କିଣିବା ଉଚିତ । ଯଦି ନିର୍ବନ୍ଧ କିମ୍ବା ବିବାହ ହେବାକୁ ଯାଉଥାଏ ତେବେ ବସନ୍ତ ପଞ୍ଚମୀରେ ସେହି ସମ୍ବନ୍ଧୀୟ ଜିନିଷପତ୍ର କିଣିବା ଉଚିତ । ଏହା କରିବା ଦ୍ୱାରା ବୈବାହିକ ଜୀବନରେ କୌଣସି ସମସ୍ୟା ସୃଷ୍ଟି ହୁଏ ନାହିଁ ଏବଂ ସମ୍ପର୍କରେ ମଧୁରତା ବଜାୟ ରୁହେ ବୋଲି ମାନ୍ୟତା ରହିଛି ।

ହଳଦିଆ ଫୁଲ

ପବିତ୍ର ବସନ୍ତ ପଞ୍ଚମୀରେ ହଳଦିଆ ରଙ୍ଗର ବିଶେଷ ମହତ୍ତ୍ୱ ରହିଛି । ଏହି ରଙ୍ଗ ବସନ୍ତ ଋତୁ ଏବଂ ଦେବୀ ବୀଣାପାଣି ଉଭୟଙ୍କ ପାଇଁ ପ୍ରିୟ ବୋଲି କୁହାଯାଏ । ମା’ ବାଗଦେବୀଙ୍କୁ ହଳଦିଆ ଫୁଲ କିମ୍ବା ହଳଦିଆ ଫୁଲର ମାଳା ଅର୍ପଣ କରିବା ଭାରି ଶୁଭ । ଏହା କରିବା ଦ୍ୱାରା ଘରେ ସକାରାତ୍ମକ ଶକ୍ତିର ପ୍ରବାହ ବୃଦ୍ଧି ପାଏ ଏବଂ ଅଧ୍ୟୟନ କରୁଥିବା ଲୋକଙ୍କ ଏକାଗ୍ରତା ବୃଦ୍ଧି ପାଏ ।

ମୟୂର ପର

ବାସ୍ତୁଶାସ୍ତ୍ରରେ ମୟୂର ପରକୁ ଶୁଭ ବୋଲି କୁହାଯାଏ । ବସନ୍ତ ପଞ୍ଚମୀରେ ଯୋଡ଼ା ମୟୂର ପର ଘରକୁ ଆଣିବା ଉଚିତ । ଏହାକୁ ଡ୍ରଇଂ ରୁମରେ କିମ୍ବା ମୁଖ୍ୟ ପ୍ରବେଶ ଦ୍ୱାର ପାଖରେ ରଖାଯାଇପାରିବ । ମୟୂର ପର ଘରକୁ ଆଣିବା ଦ୍ୱାରା ପିଲାମାନଙ୍କର ଏକାଗ୍ରତା ବୃଦ୍ଧି ପାଏ ବୋଲି ବିଶ୍ୱାସ କରାଯାଏ ।

ଦେବୀ ସରସ୍ୱତୀଙ୍କ ମୂର୍ତ୍ତି

ବସନ୍ତ ପଞ୍ଚମୀରେ ଦେବୀ ସରସ୍ୱତୀଙ୍କ ମୂର୍ତ୍ତି ଘରକୁ ଆଣିବା ଅତ୍ୟନ୍ତ ଶୁଭ । ବାସ୍ତୁ ଅନୁସାରେ ମୂର୍ତ୍ତିକୁ ଉତ୍ତର-ପୂର୍ବ ଦିଗରେ ରଖିବା ଉଚିତ । ଏହା ଘରେ ସକାରାତ୍ମକ ଶକ୍ତି ବଜାୟ ରଖିବାରେ ସାହାଯ୍ୟ କରେ ।