ଭାରତ ବିନା ମରିଯିବ ବାଂଲାଦେଶ ! ରପ୍ତାନୀ ଅଟକିଲେ ଆସିବ ବଡ଼ ସଙ୍କଟ

କନକ ବ୍ୟୁରୋ : ବାଂଲାଦେଶ ପୁଣି ଥରେ ଚର୍ଚ୍ଚାରେ ଅଛି ଏବଂ ଦେଶରେ ଗତ କିଛି ଦିନ ହେବ ହିଂସା ଜାରି ରହିଛି । ବିଶେଷ କରି ହିନ୍ଦୁମାନଙ୍କ ଉପରେ ହେଉଥିବା ଅତ୍ୟାଚାରକୁ ସାରା ବିଶ୍ୱରେ ନିନ୍ଦା କରାଯାଉଛି । ଏହି ଜାରି ରହିଥିବା ହଟ୍ଟଗୋଳ ମଧ୍ୟରେ ଭାରତ ବିରୋଧୀ ପ୍ରଦର୍ଶନ ମଧ୍ୟ ଦେଖିବାକୁ ମିଳିଛି । କିନ୍ତୁ ଆପଣ ଜାଣନ୍ତି କି, ବାଂଲାଦେଶରେ ଭାରତ ବିରୋଧୀ ପ୍ରଦର୍ଶନ ହେଉଥିଲେ ମଧ୍ୟ ଏହି ପଡ଼ୋଶୀ ଦେଶ ବହୁ ପରିମାଣରେ ଭାରତ ଉପରେ ନିର୍ଭରଶୀଳ ଏବଂ ଅନେକ ଜରୁରୀ ସାମଗ୍ରୀ ଭାରତରୁ କିଣିଥାଏ । ଯଦି ଏହି ସାମଗ୍ରୀର ରପ୍ତାନି ବନ୍ଦ ହୋଇଯାଏ, ତେବେ ବାଂଲାଦେଶ ଏକ ବଡ଼ ସଙ୍କଟରେ ପଡ଼ିଯିବ ଏବଂ ଦେଶରେ ଦୁର୍ଭିକ୍ଷ ବା ଭୋକଶୋଷର ସ୍ଥିତି ସୃଷ୍ଟି ହୋଇପାରେ । ଆସନ୍ତୁ ଜାଣିବା ସେହି ସାମଗ୍ରୀ ଏବଂ ପ୍ରୋଜେକ୍ଟଗୁଡିକ ବିଷୟରେ, ଯାହା ବିନା ବାଂଲାଦେଶ ଚାଲିବା କଷ୍ଟକର।
ବାଂଲାଦେଶରେ ହିଂସାର ଆରମ୍ଭ ପ୍ରକୃତରେ ଗତ ୧୧ ଡିସେମ୍ବରରେ ଇନକିଲାବ ମଞ୍ଚର ନେତା ଶରିଫ୍ ଉସମାନ ହାଦିଙ୍କ ହତ୍ୟା ପରେ ଦେଖିବାକୁ ମିଳୁଛି । ଅନ୍ୟପଟେ ଜଣେ ହିନ୍ଦୁ ବ୍ୟକ୍ତିଙ୍କ ହତ୍ୟା ଏହି ଘଟଣାକୁ ଆହୁରି ଉସୁକାଇ ଦେଇଛି । ଏହି ସମୟରେ ଭାରତ ବିରୋଧୀ ପ୍ରଦର୍ଶନ ମଧ୍ୟ ଜୋରସୋରରେ ଚାଲିଛି । ତେବେ ମହମ୍ମଦ ୟୁନୁସ ସରକାରଙ୍କ ଅଧିକାରୀମାନେ ଏହି କଥା ଭଲ ଭାବରେ ବୁଝନ୍ତି ଯେ, ଭାରତ ସହିତ ଶତ୍ରୁତା ଦେଶ ପାଇଁ କେତେ ମହଙ୍ଗା ପଡ଼ିପାରେ ।

ଏହି କାରଣରୁ ଭାରତ ସହିତ ସମ୍ପର୍କରେ ତିକ୍ତତା ଆସିଥିଲେ ମଧ୍ୟ ସେଠାକାର ଅନ୍ତରୀଣ ସରକାର ସମାଧାନର ସଂକେତ ଦେଉଛନ୍ତି । ୟୁନୁସ ପ୍ରଶାସନରେ ଆର୍ଥିକ ପରାମର୍ଶଦାତା ସାଲେହୁଦ୍ଦିନ ଅହମ୍ମଦ ମଙ୍ଗଳବାର ଦିନ କହିଛନ୍ତି ଯେ, ମହମ୍ମଦ ୟୁନୁସଙ୍କ ନେତୃତ୍ୱରେ ଗଠିତ ଅନ୍ତରୀଣ ସରକାରର ଭାରତ ଭଳି ଏକ ବଡ଼ ପଡ଼ୋଶୀ ଦେଶ ସହିତ ସମ୍ପର୍କ ଖରାପ କରିବାର କୌଣସି ଉଦ୍ଦେଶ୍ୟ ନାହିଁ । ବାଂଲାଦେଶ ପାଇଁ ଭାରତ ସହିତ ସମ୍ପର୍କ ରଖିବା ଜରୁରୀ, କାରଣ ଏହି ପଡ଼ୋଶୀ ଦେଶ ବହୁ ପରିମାଣରେ ଭାରତରୁ ଆସୁଥିବା ସାମଗ୍ରୀ ଉପରେ ନିର୍ଭର କରେ । ଏହି ସାମଗ୍ରୀଗୁଡିକର ରପ୍ତାନି ବନ୍ଦ ହେବା ଦେଶରେ ଦୁର୍ଭିକ୍ଷର କାରଣ ସାଜିପାରେ । ଏହାର କାରଣ ହେଉଛି ଭାରତ ବାଂଲାଦେଶର ଦ୍ୱିତୀୟ ବୃହତ୍ତମ ରପ୍ତାନି ସହଭାଗୀ । ବାଣିଜ୍ୟିକ ତଥ୍ୟ ଅନୁଯାୟୀ, ଗତ ବର୍ଷ ଭାରତ ୧୧.୩୨ ବିଲିୟନ ଡଲାରର ସାମଗ୍ରୀ ରପ୍ତାନି କରିଥିଲା । ଏଥିରେ କପା, ଶସ୍ୟଠାରୁ ଆରମ୍ଭ କରି ପେଟ୍ରୋଲିୟମ ଉତ୍ପାଦ ପର୍ଯ୍ୟନ୍ତ ସାମଗ୍ରୀ ଅନ୍ତର୍ଭୁକ୍ତ ।

ଅଧିକ ପଢନ୍ତୁ :ରାଜ୍ୟରୁ ବାହାରିବେ ବାଂଲାଦେଶୀ ଅନୁପ୍ରବେଶକାରୀ: ଆଇନ ମନ୍ତ୍ରୀ

ଭାରତରୁ ବାଂଲାଦେଶ କିଣୁଥିବା ପ୍ରମୁଖ ସାମଗ୍ରୀ- 

• କପା ସୂତା: ୨.୭୦ ବିଲିୟନ ଡଲାର
• ପେଟ୍ରୋଲିୟମ ଉତ୍ପାଦ: ୧.୨୯ ବିଲିୟନ ଡଲାର
• ବୈଦ୍ୟୁତିକ ଶକ୍ତି: ୧.୦୮ ବିଲିୟନ ଡଲାର
• ମେସିନାରୀ, ନ୍ୟୁକ୍ଲିୟର ରିଆକ୍ଟର, ବଏଲର: ୫୦୬.୪୩ ମିଲିୟନ ଡଲାର
• ଅର୍ଗାନିକ୍ କେମିକାଲ୍: ୩୮୩.୫୫ ମିଲିୟନ ଡଲାର
• ଚା’, କଫି ଏବଂ ଅନ୍ୟାନ୍ୟ: ୩୧୭.୦୪ ମିଲିୟନ ଡଲାର

ଏହା ବ୍ୟତୀତ ବହୁ ପରିମାଣରେ ଖାଦ୍ୟ ଶସ୍ୟ ମଧ୍ୟ ଭାରତରୁ ବାଂଲାଦେଶକୁ ରପ୍ତାନି କରାଯାଏ । FY2024ର ପରିସଂଖ୍ୟାନ ଅନୁଯାୟୀ, ଚାଉଳ ୮୪.୫୫ ମିଲିୟନ ଡଲାର, ମକା ୧୫.୩୫ ମିଲିୟନ ଡଲାର, ଜୁଆର ୧.୮୭ ମିଲିୟନ ଡଲାର ଏବଂ ଗହମ ୭୩୪.୫୪ ମିଲିୟନ ଡଲାର ରପ୍ତାନି କରାଯାଇଥିଲା । ଏହା ସହିତ ଚିନି ମଧ୍ୟ ବହୁ ପରିମାଣରେ ଭାରତରୁ ବାଂଲାଦେଶକୁ ଯାଇଥାଏ । ବାଂଲାଦେଶ ସରକାରଙ୍କ ଆର୍ଥିକ ପରାମର୍ଶଦାତା ସାଲେହୁଦ୍ଦିନ ଅହମ୍ମଦ କହିଛନ୍ତି ଯେ, ବାଂଲାଦେଶର ସାମ୍ପ୍ରତିକ ରାଜନୈତିକ ସ୍ଥିତିର ଭାରତ ସହିତ ବାଣିଜ୍ୟ ଏବଂ ଅର୍ଥନୈତିକ ସହଯୋଗ ଉପରେ କୌଣସି ପ୍ରଭାବ ପଡ଼ିବ ନାହିଁ । ସେ ଆହୁରି ମଧ୍ୟ କହିଛନ୍ତି ଯେ, ସରକାର ଭାରତରୁ ୫୦,୦୦୦ ମେଟ୍ରିକ ଟନ ଚାଉଳ ଆମଦାନୀ କରିବେ । ସେ ଏହାକୁ ଦୁଇ ଦେଶର ଅର୍ଥନୈତିକ ସମ୍ପର୍କକୁ ମଜବୁତ କରିବା ଦିଗରେ ଏକ ପଦକ୍ଷେପ ବୋଲି କହିଛନ୍ତି । ଏହା ସହ ସାଲେହୁଦ୍ଦିନ କହିଛନ୍ତି ଯେ, ଅତ୍ୟାବଶ୍ୟକ ସାମଗ୍ରୀ ଆମଦାନୀରେ କୌଣସି ପ୍ରକାରର ବାଧା ସୃଷ୍ଟି ହେବ ନାହିଁ ।