ଭାରତରୁ ମିଳିଲା ଏସିଆର ସର୍ବପୁରାତନ କଣ୍ଟା ବାଉଁଶ ଜୀବାଶ୍ମ : ନିଶ୍ଚିହ୍ନ ହୋଇଛି କଣ୍ଟା, କିନ୍ତୁ ବାରି ହେଉଛି ଚିହ୍ନ

କନକବ୍ୟୁରୋ : ଭାରତରୁ ମିଳିଲା ଏସିଆର ସର୍ବପୂରାତନ କଣ୍ଟା ବାଉଁଶ ଜୀବାଶ୍ମ ।  ୩୭ ହଜାର ବର୍ଷ ପୁରୁଣା ବାଉଁଶ ଜୀବାଶ୍ମ ମଣିପୁର ଇମ୍ଫାଲ ଭ୍ୟାଲିର ଚିରାଙ୍ଗ ନଦୀ ଅବବାହିକାରୁ ଠାବ ହୋଇଛି  ।  ଏଥିରେ ଥିବା କଣ୍ଟା ନିଶ୍ଚିହ୍ନ ହୋଇଯାଇଥିଲେ ମଧ୍ୟ ,  ତାହାର ଚିହ୍ନ ସ୍ପଷ୍ଟ ବାରି ହୋଇପଡ଼ୁଛି ।  ବାଉଁଶ ଫମ୍ପା ଓ ଶୀଘ୍ର ନଷ୍ଟ ହୋଇଯାଉଥିବାରୁ, ଏହାର ଜୀବାଶ୍ମ ଖୁବ ବିରଳ ।  ତେବେ ମଣିପୁରରୁ ଏହି ବିରଳ ଜୀବାଶ୍ମ ଆବିଷ୍କୃତ ହେବା ପରେ ,  ଏହା ଭାରତ ତଥା ଏସିଆର ଉଦ୍ଭିଦ ବିଜ୍ଞାନ ଇତିହାସ କ୍ଷେତ୍ରରେ ନୂଆ ଅଧ୍ୟାୟ ଯୋଡ଼ିବ ବୋଲି ଆଶା କରାଯାଉଛି  ।  

ଅଧିକ ପଢନ୍ତୁ.. ବଙ୍ଗୋପସାଗରରେ ସୃଷ୍ଟି ହେଲା ବାତ୍ୟା ଡିଟୱା, ଦକ୍ଷିଣ-ପଶ୍ଚିମ ବଙ୍ଗୋପସାଗର ପାର୍ଶ୍ବବର୍ତ୍ତୀ ଶ୍ରୀଲଙ୍କା ଉପକୂଳରେ ସୃଷ୍ଟି ହେଲା ବାତ୍ୟା

ବୀରବଲ ସାହଣୀ ଇନଷ୍ଟିଚ୍ୟୁସନ୍ ଅଫ୍ ପାଲିଓସାଇନ୍ସେସ୍- ବିଏସ୍ଆଇପିର ବୈଜ୍ଞାନିକମାନେ ଏହି ଜୀବାଶ୍ମ ଉପରେ ପରୀକ୍ଷାନିରୀକ୍ଷା କରୁଛନ୍ତି ।  ହିମ ଯୁଗରେ ବି ଏସିଆରେ ବାଉଁଶ ଥିଲା ଏବଂ ତୃଣଭୋଜିଙ୍କ ଠାରୁ ରକ୍ଷା ପାଇବାକୁ ବାଉଁଶରେ କଣ୍ଟା ବିକଶିତ ହୋଇଥିଲା  ।  ଏଥିସହ ହିମ ଯୁଗରେ ଅତି ନିମ୍ନ ତାପମାତ୍ରା ଓ ଶୁଷ୍କ ବାତାବରଣ ଯୋଗୁ ୟୁରୋପ ସମେତ ପୃଥିବୀର  ଅଧିକାଂଶ  ସ୍ଥାନରୁ ବାଉଁଶ ଲୋପ ପାଇଥିବା  ବେଳେ, ଭାରତର ଉତ୍ତର-ପୂର୍ବାଞ୍ଚଳର ଉଷ୍ମ ଓ ଆର୍ଦ୍ର ଜଳବାୟୁ ଏହାକୁ ବଢ଼ିବା ପାଇଁ ସୁରକ୍ଷିତ ପରିବେଶ ଯୋଗାଇଥିଲା ବୋଲି ସ୍ପଷ୍ଟ ହେଉଛି  ।   ଏଭଳି ଆବିଷ୍କାରକୁ ଉଦ୍ଭିଦ ବିଜ୍ଞାନ ଓ ଜୀବାଶ୍ମ ଗବେଷଣାରେ ମାଇଲଖୁଣ୍ଟ ବୋଲି କୁହାଯାଉଛି  ।