ଦୁର୍ଘଟଣା ପୂର୍ବରୁ ଏୟାର ଇଣ୍ଡିଆ ବିମାନ ଅନେକ ଥର ଖରାପ ହୋଇଥିଲା: ଅହମଦାବାଦ ଦୁର୍ଘଟଣା ନେଇ ଆମେରିକୀୟ କଂଗ୍ରେସରେ ରିପୋର୍ଟ ଉପସ୍ଥାପିତ

କନକ ବ୍ୟୁରୋ : ୧୨ ଜୁନ୍, ୨୦୨୫ରେ, ୨୪୨ ଜଣ ଯାତ୍ରୀଙ୍କୁ ନେଇ ଏୟାର ଇଣ୍ଡିଆର ବିମାନ ଏଆଇ-୧୭୧ ହଠାତ୍ ଦୁର୍ଘଟଣାଗ୍ରସ୍ତ ହୋଇଥିଲା। ଗୁଜୁରାଟର ଅହମଦାବାଦ ବିମାନବନ୍ଦରରୁ ଉଡ଼ାଣ ଭରିବାର କିଛି ସମୟ ପରେ, ବିମାନଟି ଏକ ମେଡିକାଲ୍ ହସ୍ପିଟାଲ କୋଠାରେ ଧକ୍କା ଖାଇଥିଲା। ଦୁର୍ଘଟଣାକୁ ୭ ମାସ ବିତିଗଲାଣି। କିନ୍ତୁ ଦୁର୍ଘଟଣାର କାରଣ ଅସ୍ପଷ୍ଟ ରହିଛି।ଆମେରିକା ସ୍ଥିତ ବିମାନ ସୁରକ୍ଷା ଅଭିଯାନ ଗୋଷ୍ଠୀ ଦାବି କରିଛି ଯେ, ଏୟାର ଇଣ୍ଡିଆ ବୋଇଂ ୭୮୭ ବିମାନଟି ଯାନ୍ତ୍ରିକ ସମସ୍ୟାର ସମ୍ମୁଖୀନ ହୋଇଥିଲା। ଅହମଦାବାଦ ବିମାନବନ୍ଦରରୁ ଉଡ଼ାଣ ଆରମ୍ଭ କରିବା ପୂର୍ବରୁ ବିମାନଟି ଅନେକ ଯାନ୍ତ୍ରିକ ସମସ୍ୟାର ସମ୍ମୁଖୀନ ହୋଇଥିଲା।

ଅହମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ରିପୋର୍ଟରେ ବଡ଼ ଖୁଲାସା : ସାମ୍ନାକୁ ଆସିଲା ଦୁଇ ପାଇଲଟଙ୍କ ମଧ୍ୟରେ କଥାବାର୍ତ୍ତା

ଏଫ୍‌ଏଏସ୍‌ ଆମେରିକା ସଂସଦରେ ରିପୋର୍ଟ ଉପସ୍ଥାପନ କରିଥିଲା
ଫାଉଣ୍ଡେସନ୍ ଫର୍ ଏଭିଏସନ୍ ସେଫ୍ଟି (ଏଫ୍‌ଏଏସ୍‌) ୧୨ ଜାନୁଆରି ୨୦୨୬ରେ ଆମେରିକୀୟ କଂଗ୍ରେସରେ ଏକ ରିପୋର୍ଟ ଦାଖଲ କରିଥିଲା। ଏଫ୍‌ଏଏସ୍‌ ତଦନ୍ତରୁ ଜାଣିପାରିଥିଲା ଯେ, ବିମାନଟି ଏୟାର ଇଣ୍ଡିଆରେ କାର୍ୟ୍ୟ କରିବା ପରଠାରୁ ଯାନ୍ତ୍ରିକ ସମସ୍ୟାର ସମ୍ମୁଖୀନ ହେଉଥିଲା। ଏଫ୍‌ଏଏସ୍‌ କହିଛି ଯେ, ବିମାନରେ ଗୁରୁତ୍ୱପୂର୍ଣ୍ଣ ଇଞ୍ଜିନିୟରିଂ, ଗୁଣବତ୍ତା ଓ ରକ୍ଷଣାବେକ୍ଷଣ ତ୍ରୁଟି ଥିଲା। ବିମାନରେ ଅନେକ ସମସ୍ୟା ରିପୋର୍ଟ କରାଯାଇଥିଲା। ସେସବୁ ମଧ୍ୟରେ ଇଲେକ୍ଟ୍ରୋନିକ୍ସ ଓ ସଫ୍ଟୱେର୍, ସର୍କିଟ୍ ବ୍ରେକରର ବାରମ୍ବାର ଟ୍ରିପ୍ ହେବା, ତ୍ରୁଟିପୂର୍ଣ୍ଣ ତାର, ସର୍ଟ ସର୍କିଟ୍, ବିଦ୍ୟୁତ୍ ବିଭ୍ରାଟ ଓ ବିଦ୍ୟୁତ୍ ପ୍ରଣାଳୀର ଅତ୍ୟଧିକ ଗରମ ହେବା ସମସ୍ୟା ଆଦି ରହିଥିଲା। 

ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା : ଏହି କାରଣ ପାଇଁ ହୋଇଥିଲା ପ୍ଲେନ୍ କ୍ରାସ୍

ବୋଇଂ ଉତ୍ତର ଦେଇଥିଲା
ବୋଇଂ ମଧ୍ୟ ଏଫ୍‌ଏଏସ୍‌ର ଦାବିର ଜବାବ ଦେଇଥିଲା। ଜଣେ ବୋଇଂ ମୁଖପାତ୍ର କହିଥିଲେ,ଆମେ ଜାତିସଂଘର ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନର ପ୍ରୋଟୋକଲ ପାଳନ କରିଥିଲୁ। ଭାରତରେ ବିମାନ ଦୁର୍ଘଟଣା ସମ୍ପର୍କରେ ଏଏଆଇବି ଯାହା ନିଷ୍ପତ୍ତି ନେବ ଆମେ ତାହା ପାଳନ କରିବୁ। ତେବେ ଏନେଇ ଏୟାର ଇଣ୍ଡିଆ ନୀରବ ରହିଛି। ଏୟାରକ୍ରାଫ୍ଟ ଦୁର୍ଘଟଣା ତଦନ୍ତ ବ୍ୟୁରୋ (ଏଏଆଇବି) ଏହାର ପ୍ରାଥମିକ ରିପୋର୍ଟରେ ତ୍ରୁଟିପୂର୍ଣ୍ଣ ଇନ୍ଧନ ସ୍ୱିଚ୍ ଯୋଗୁ ଦୁର୍ଘଟଣା ଘଟିଥିବା ସୂଚିତ କରିଥିଲା।