ମାସକୁ ତିଆରି ହେଉଛି ୫୦ କ୍ବିଣ୍ଟାଲ ଲଡ଼ୁ, ରାଜ୍ୟ ତଥା ରାଜ୍ୟ ବାହାରେ କରୁଛନ୍ତି ବିକ୍ରି

କନକ ବ୍ୟୁରୋ:  ରାଶିଲଡ଼ୁ ଦେଇଛି ରୋଜଗାର । ଯାଜପୁର ଜିଲ୍ଳା ଧର୍ମଶାଳା ବ୍ଲକ ପାଟପୁର ଗାଁର ସଫଳ ମହିଳା ଉଦ୍ୟୋଗୀ ଶାନ୍ତିଲତା ଦାଶ । ଛତୁଆ, ମୁଢି ପରେ ଏବେ ରାଶିଲଡୁ ତିଆରି କରି ବଢାଇଛନ୍ତି ନିଜର ରୋଜଗାର । ଅନ୍ୟୁନ ପନ୍ଦର ଜଣ ମହିଳା ଓ ପୁରୁଷମାନଙ୍କୁ ଦେଖାଇଛନ୍ତି ରୋଜଗାରର ବାଟ । ମାସିକ ପଚାଶ କୁଇଂଟାଲ ଲଡୁ ତିଆରି କରି ରାଜ୍ୟ ଓ ରାଜ୍ୟ ବାହାରେ ବିକ୍ରି କରୁଛନ୍ତି । ଯାଜପୁର ଜିଲ୍ଲା ଧର୍ମଶାଳା ବ୍ଲକ ପାଟପୁର ଗାଁର ଶାନ୍ତିଲତା ଦାଶ । ଅଳ୍ପପାଠ ପଢିଥିବା ଶାନ୍ତିଲତା ବିବାହ କରିବା ପରେ ଖୁସିରେ ଘର ସାଂସାର କରିବା ନେଇ ଅନେକ ସ୍ୱପ୍ନ ଦେଖିଥିଲେ । ମାତ୍ର ତାହା ବେଶିଦିନ ରହିଲା ନାହିଁ । ବିବାହ ବିଛେଦ ପରେ ଶାନ୍ତିଲତା ନିଜ ଉପରୁ ବିଶ୍ୱାସ ଓ ଭରଷା ତୁଟାଇ ନଥିଲେ। ନିଜେ କିଛି କରିବା ପାଇଁ ଉଦ୍ୟମ ଆରମ୍ଭ କରିଥିଲେ  ।

ଅଧିକ ପଢନ୍ତୁ :  ମହୁଲ ଫୁଲରୁ ତିଆରି ହେଉଛି କେକ୍‌, ବିସ୍କୁଟ ଓ ଲଡ଼ୁ : କେବେ ଟେଷ୍ଟ୍‌ କରିଛନ୍ତି କି ନାହିଁ ?

୨୦୦୧ ମସିହାରେ ଗାଁର ମହିଳାମାନଙ୍କୁ ଏକାଠି କରି ଆରମ୍ଭ କଲେ ମା’ ସିଦ୍ଧଚଣ୍ଡୀ ସ୍ୱୟଂ ସହାୟକ ଗୋଷ୍ଠୀ। ଏହି ଗ୍ରୁପ୍‌ ଗଠନ କରି ସ୍ୱଳ୍ପ ବିନିଯୋଗରେ ଛତୁଆ ଯୋଗାଣ ଆରମ୍ଭ କରିଥିଲେ । ଏଥିରେ ସଫଳତା ମିଳିବା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି । ଚାହିଦା ଓ ଆବଶ୍ୟକତାକୁ ଦେଖି ଏବେ ରାଶିଲଡୁ ତିଆରି କରି ବ୍ୟବସାୟ କରୁଛନ୍ତି । ମାସକୁ ପଚାଶ କୁଇଂଟାଲ ରାଶିଲଡୁ ତିଆରି କରି ନିଜର ସ୍ଥିତି ମଜଭୁତ କରିପାରିଛନ୍ତି ଶାନ୍ତିଲତା । ଶାନ୍ତିଲତାଙ୍କ ଏହି ୟୁନିଟ୍‌ରୁ ପ୍ରସ୍ତୁତ ରାଶିଲଡୁ ଛତିଶଗଡ଼, ବାରିପଦା, କେନ୍ଦୁଝର, ଯାଜପୁର ଜିଲ୍ଲାର ବିଭିନ୍ନ ଅଞ୍ଚଳକୁ ଯୋଗାଣ ହେଉଛି। ବଜାରରୁ ରାଶି, ବାଦାମ, ଗୁଡ ସଂଗ୍ରହ କରି ସେଥିରୁ ରାଶିଲଡୁ ପ୍ରସ୍ତୁତ କରୁଛନ୍ତି । 

ଶାନ୍ତିଲତାଙ୍କ ଏହି ରାଶିଲଡ଼ୁ ପ୍ରସ୍ତୁତି ୟୁନିଟ୍‌ରେ ୧୫ ଜଣ ପୁରୁଷ ଓ ମହିଳା କାମକରି ମାସକୁ ୪ରୁ ୫ ହଜାର ଟଙ୍କା ରୋଜଗାର କରିପାରୁଛନ୍ତି । ପ୍ରସ୍ତୁତ ରାଶିଲଡ଼ୁ ଜରିରେ ପ୍ୟାକେଟ୍‌ କରି ବାହାରକୁ ଯୋଗାଣ କରାଯାଉଛି । ରାଶିଲଡ଼ୁ କ୍ବିଣ୍ଟାଲ ପିଛା ୧୩ ହଜାର ଟଙ୍କାରେ ବିକ୍ରି ହେଉଥିବା କୁହନ୍ତି ଶାନ୍ତିଲତା । ଏହି ରାଶିଲଡୁ ବ୍ୟବସାୟରୁ ଶାନ୍ତିଲତା ବାର୍ଷିକ ୧୪ରୁ ୧୫ଲକ୍ଷ ପର୍ଯ୍ୟନ୍ତ ଟଙ୍କା ଲାଭ ପାଇପାରୁଛନ୍ତି ।  ଆତ୍ମନିର୍ଭରଶୀଳ ହେବା ପାଇଁ ଶାନ୍ତିଲତାଙ୍କ ଏହି ଉଦ୍ୟମ ଅନ୍ୟ ଗ୍ରାମୀଣ ମହିଳାମାନଙ୍କ ପାଇଁ ପ୍ରେରଣାଦାୟୀ ନିଶ୍ଚୟ ।