କନକ ବ୍ୟୁରୋ; ଆସାମରୁ ଏକ ଅତ୍ୟନ୍ତ ଦୁଃଖଦାୟକ ଏବଂ ଭୟଙ୍କର ରେଳ ଦୁର୍ଘଟଣା ଖବର ସାମ୍ନାକୁ ଆସିଛି । ଦ୍ରୁତ ଗତିରେ ଆସୁଥିବା ରାଜଧାନୀ ଏକ୍ସପ୍ରେସ୍‌ ଧକ୍କାରେ ଏକ ହାତୀ ପଲର ଅନେକ ହାତୀ ପ୍ରାଣ ହରାଇଥିବା ବେଳେ, ଏହି ଶକ୍ତିଶାଳୀ ଧକ୍କା ଯୋଗୁଁ ଟ୍ରେନର ୫ଟି ବଗି ରେଳ ଧାରଣାରୁ ଚ୍ୟୁତ ହୋଇଛି । ଏହି ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ସୂଚନା ଅନୁସାରେ, ଏହି ମର୍ମନ୍ତୁଦ ଦୁର୍ଘଟଣା ଅସମର ଏକ ଜଙ୍ଗଲିଆ ଅଞ୍ଚଳରେ ଘଟିଛି, ଯେଉଁଠାରେ ରେଳ ଧାରଣାଟି ବନ୍ୟଜନ୍ତୁଙ୍କ ଯାତାୟାତ ପଥ ବା 'ଏଲିଫ୍ୟାଣ୍ଟ କରିଡର' ଦେଇ ଯାଇଛି । ବିଳମ୍ବିତ ରାତିରେ ଯେତେବେଳେ ହାତୀ ପଲ ରେଳ ଧାରଣା ପାର ହେଉଥିଲେ, ସେହି ସମୟରେ ଅତି ଦ୍ରୁତ ଗତିରେ ଆସୁଥିବା ରାଜଧାନୀ ଏକ୍ସପ୍ରେସ୍ ସେମାନଙ୍କ ସହ ଧକ୍କା ହୋଇଥିଲା । ଟ୍ରେନର ଗତି ଏତେ ଅଧିକ ଥିଲା ଯେ, ହାତୀମାନଙ୍କୁ ଦେଖିବା ପରେ ମଧ୍ୟ ଲୋକୋ ପାଇଲଟ୍ ଟ୍ରେନକୁ ରୋକିବାରେ ସଫଳ ହୋଇନଥିଲେ । 

Advertisment

ସ୍ଥାନୀୟ ଲୋକମାନେ କହିଛନ୍ତି ଯେ ଏହା ଆଠଟି ହାତୀର ଏକ ପଲ ଥିଲା, ଯେଉଁଥିରୁ ଅଧିକାଂଶଙ୍କର ମୃତ୍ୟୁ ହୋଇଛି । ତେବେ କୁହାଯାଉଛି  ଏହି ଦୁର୍ଘଟଣାରେ ୮ ଟି ହାତୀର ମୃତ୍ୟୁ ଘଟିଛି ।   ଏହି ଘଟଣା ଏପରି ଏକ ଅଞ୍ଚଳରେ ଘଟିଛି ଯେଉଁଠାରେ ହାତୀ କରିଡର ନାହିଁ । ହାତୀ ପଲକୁ ଦେଖିବା ପରେ ଲୋକୋ ପାଇଲଟ୍ ଜରୁରୀକାଳୀନ ବ୍ରେକ୍ ଲଗାଇଥିଲେ । ଟ୍ରେନ୍‌ଟି ହାତୀ ପଲ ସହିତ ଧକ୍କା ଖାଇଥିଲା, ଯାହା ଫଳରେ ଦୁର୍ଘଟଣା ଘଟିଥିଲା । ଏହି ଦୁର୍ଘଟଣାରେ ଅନେକ ହାତୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । କୁହାଯାଉଛି ଯେ, ମୃତ ହାତୀଙ୍କ ମଧ୍ୟରେ ମାଈ ହାତୀ ଏବଂ ଛୋଟ ହାତୀ ଛୁଆ ମଧ୍ୟ ସାମିଲ ଅଛନ୍ତି ।

ଅଧିକ ପଢନ୍ତୁ: ହାତୀ ମୃତ୍ୟୁ ତଦନ୍ତ ନେଇ ମନ୍ତ୍ରୀଙ୍କ ନିର୍ଦ୍ଦେଶ ପରେ ପିସିସିଏଫଙ୍କ ପ୍ରତିକ୍ରିୟା । ଖାଦ୍ୟାଭାବ, ବିଦ୍ୟୁତ ଆଘାତ ଓ ଟ୍ରେନ ଦୁର୍ଘଟଣାକୁ ଦାୟୀ

ଧକ୍କା ଏତେ ଜୋରଦାର ଥିଲା ଯେ ହାତୀଙ୍କ ଶରୀର ଖଣ୍ଡ ବିଖଣ୍ଡିତ ହୋଇ ରେଳ ଧାରଣା ଚାରିପଟେ ବିଛାଡ଼ି ହୋଇ ପଡ଼ିଥିଲା। ଏହି ଦୃଶ୍ୟ ଏତେ ଭୟଙ୍କର ଥିଲା ଯେ ଦେଖଣାହାରୀଙ୍କ ଆଖିରୁ ଲୁହ ଝରି ଆସିଥିଲା । ବନ୍ୟଜନ୍ତୁ ପ୍ରେମୀ ଏବଂ ସ୍ଥାନୀୟ ଲୋକେ ଏହି ଘଟଣାକୁ ନେଇ ଗଭୀର ଶୋକ ପ୍ରକାଶ କରିଛନ୍ତି । ତେବେ ଯାତ୍ରୀମାନଙ୍କର କୌଣସି କ୍ଷତି ହୋଇନି  ।  ଏହି ଦୁର୍ଘଟଣା ପ୍ରକୃତି ଏବଂ ଆଧୁନିକ ବିକାଶ ମଧ୍ୟରେ ଥିବା ସଂଘର୍ଷର ଏକ କରୁଣ ଚିତ୍ର । ଗୋଟିଏ ପଟେ ଯାତ୍ରୀଙ୍କ ସୁରକ୍ଷା ଏବଂ ଅନ୍ୟପଟେ ନିରୀହ ବନ୍ୟଜନ୍ତୁଙ୍କ ଜୀବନ । ଏହି ସମସ୍ୟାର ସ୍ଥାୟୀ ସମାଧାନ ପାଇଁ ରେଳବାଇ ଏବଂ ବନ ବିଭାଗ ମଧ୍ୟରେ ଅଧିକ ସମନ୍ୱୟ ରହିବା ଜରୁରୀ, ଯେପରି ଆଗାମୀ ଦିନରେ କୌଣସି "ଗଜରାଜ"ଙ୍କୁ ଏଭଳି ଅକାଳ ମୃତ୍ୟୁ ବରଣ କରିବାକୁ ନପଡ଼େ । ଏହି ଘଟଣା ଯୋଗୁଁ ସମ୍ପୃକ୍ତ ରୁଟ୍‌ରେ ରେଳ ଚଳାଚଳ କିଛି ସମୟ ପାଇଁ ବାଧାପ୍ରାପ୍ତ ହୋଇଛି ଏବଂ ଅନେକ ଟ୍ରେନକୁ ଅନ୍ୟ ପଥରେ ଡାଇଭର୍ଟ କରାଯାଇଛି ।