ରାସନ ବଣ୍ଟାରେ ମହାକେଳେଙ୍କାରୀ, ବର୍ଷକୁ ପାଣିରେ ପଡ଼ୁଥିଲା ୨୧୦ କୋଟି

କନକ ବ୍ୟୁରୋ: ରାସନ ବଣ୍ଟାରେ ଚାଲିଥିଲା ବଡ ଘୋଟାଲା । ଗରିବଙ୍କ ଚାଉଳରେ ଭାଗ ବସାଉଥିଲେ ଧନୀ ଲୋକ । ରାସନ କାର୍ଡ ପ୍ରସଙ୍ଗରେ ବିଧାନସଭାରେ ବିଜେଡି ମୂଲତବୀ ପ୍ରସ୍ତାବ ଆଣିବା ପରେ ଗୁମର ଖୋଲିଛନ୍ତି ଯୋଗାଣ ମନ୍ତ୍ରୀ । ଆଉ ମନ୍ତ୍ରୀ ଯେଉଁ ତଥ୍ୟ ରଖିଛନ୍ତି ସେଥିରୁ ବାରି ହୋଇଛି ଦୁର୍ନୀତିର ଗନ୍ଧ । ରାସନ କାର୍ଡ କଟାଯିବା ପ୍ରସଙ୍ଗରେ ବିଜେଡି ଆଣିଥିବା ମୁଲତବୀ ପ୍ରସ୍ତାବ ଉପରେ ବିଧାନସଭାରେ ଉତ୍ତର ରଖିଛନ୍ତି ଯୋଗାଣ ମନ୍ତ୍ରୀ । ଆଉ ଯେଉଁ ତଥ୍ୟ ଉପସ୍ଥାପନ କରିଛନ୍ତି, ରାସନ ବଣ୍ଟନରେ ବର୍ଷ ବର୍ଷ ଧରି ଚାଲିଥିବା ବଡ କେଳେଙ୍କାରୀକୁ ପଦାରେ ପକାଇଛି । ମନ୍ତ୍ରୀ କହିଛନ୍ତି, ମୃତ, ସରକାରୀ ଚାକିରିଆ ଓ ଆୟକରଦାତା ମାନେ ଚାଉଳ ନେଉଥିଲେ ।

ଅଧିକ ପଢନ୍ତୁ: ଭୂତ ନେଉଛି ରାସନ ଚାଉଳ ; ଅନ୍‌ଲାଇନ୍‌ ତଥ୍ୟ ଖୋଲିଦେଲା ଗୁମର

ଯୋଗାଣ ମନ୍ତ୍ରୀ ଦେଇଥିବା ତଥ୍ୟ     

ମୋଟ ୮ଲକ୍ଷ ୧୬ ହଜାର ୫୬ଜଣ ଅଯୋଗ୍ୟ ହିତାଧିକାରୀଙ୍କ ରାସନ୍‌ କାର୍ଡ କଟିଛି 
ସେଥିରୁ ୭୫ ହଜାର ୩୦ ଜଣ ସରକାରୀ ଚାକିରିଆ ହାତେଇଥିଲେ ରାସନ୍‌ କାର୍ଡ 
୪୫ ହଜାର ୪୯୬ ଜଣ ଆୟକର ଦେଉଥିବା ଲୋକଙ୍କର ରାସନ୍‌ କାର୍ଡ କଟିଛି 
ଆଉ ପାଦେ ଆଗକୁ ଯାଇ ମନ୍ତ୍ରୀ ଅଯୋଗ୍ୟ ହିତାଧିକାରୀ ଚୟନ ଯୋଗୁଁ ରାଜକୋଷରୁ କେମିତି କୋଟି କୋଟି ଟଙ୍କାର ପାଣିରେ ପଡିଛି ତାର ହିସାବ ଦେଇଛନ୍ତି। ରାଜକୋଷରୁ ବର୍ଷକୁ ଯାଉଥିଲା ୨୧୦ କୋଟି ଟଙ୍କା । ପାଞ୍ଚ ବର୍ଷରେ ରାଜକୋଷରୁ ଯାଇଛି ହଜାରେ କୋଟିରୁ ଅଧିକ ଟଙ୍କା । ତେବେ ବିଜେଡି କହିଛି, ରାଜନୈତିକ ଉଦ୍ଦେଶ୍ୟ ରଖି ରାସନ କାର୍ଡ କଟାଯାଉଛି । ରାସନ ବଣ୍ଟନରେ ସ୍ବଛତା ଆଣିବା ପାଇଁ ସରକାର ବଦଳିବା ପରେ ଇ-କେୱାଇସି ଅପଡେଟ୍ ପ୍ରକ୍ରିୟା ଆରମ୍ଭ ହୋଇଥିଲା। କିନ୍ତୁ ଏପର୍ଯ୍ୟନ୍ତ ୧୫ଲକ୍ଷରୁ ଅଧିକ ହିତାଧିକାରୀ ଇ-କେୱାଇସି ଅପଡେଟ୍ କରି ନାହାନ୍ତି ।