୧୦ ଜଣ ମହିଳା ଏକାଠି ହେଲେ, ସୁଭଦ୍ରା ଟଙ୍କାରେ ବ୍ୟବସାୟ କଲେ

କନକ ବ୍ୟୁରୋ:  କୁହାଯାଏ ଇଛା ଥିଲେ ଉପାୟ ଆପେ ଆପେ ଆସେ । ଛୋଟ ବ୍ୟବସାୟ ଦିନେ ବଡ଼ ରୋଜଗାର ଦିଏ । ଆଉ ଏଭଳି କିଛି ଲକ୍ଷ୍ୟ ନେଇ କେନ୍ଦ୍ରାପଡା ଜିଲ୍ଲା କଳାବୁଦା ଗାଁର କହ୍ନେଇ ଗୋସ୍ବାମୀ ସ୍ବୟଂସହାୟିକା ଗୋଷ୍ଠିର ସଦସ୍ୟା ଏକାଠି ହୋଇଛନ୍ତି । ସେମାନଙ୍କୁ ମିଳିଥିବା ସୁଭଦ୍ରା ଟଙ୍କା ଓ ବ୍ୟାଙ୍କରୁ କିଛି ରୁଣ ନେଇ ଆରମ୍ଭ କରିଛନ୍ତି ଫିନାଇଲ, ସଞ୍ଜବତୀ, ଧୁପକାଠି ଓ ବଡ଼ି ବ୍ୟବସାୟ । ୧୦ ଜଣ ମହିଳା ଘରକାମ ପରେ ବଳକା ସମୟକୁ ଉପଯୋଗ କରି ମିଳିମିଶି ଏହିସବୁ ସାମଗ୍ରୀ ତିଆରି କରୁଛନ୍ତି ।
ସାମଗ୍ରୀ ପ୍ରସ୍ତୁତି ପାଇଁ କଞ୍ଚାମାଲ କଟକ ଓ ଭୁବନେଶ୍ଵରରୁ ଆଣୁଛନ୍ତି ।

ଅଧିକ ପଢନ୍ତୁ : ଫିନାଇଲ ଓ ଧୂପକାଠି ପ୍ରସ୍ତୁତ କରି ରୋଜଗାର କରୁଛନ୍ତି ଗାଁର ମହିଳା, ନିଜସ୍ୱ ଉଦ୍ୟମରେ ନିଜେ ହୋଇଛନ୍ତି ସ୍ୱାବଲମ୍ବୀ

 କହ୍ନେଇ ଗୋସ୍ଵାମୀ ଏସ୍‌ଏଚ୍‌ଜିର ସଦସ୍ୟା ମାନେ ଉତ୍ପାଦିତ ସାମଗ୍ରୀକୁ ବିକ୍ରି କରିବା ପାଇଁ ବିଭିନ୍ନ ମେଳା ମହୋତ୍ସବରେ ଷ୍ଟଲ ପକାଉଛନ୍ତି । ଏପରିକି ବ୍ୟବସାୟୀ ମାନେ ଗୋଷ୍ଠି ସଦସ୍ୟାଙ୍କ ନିକଟକୁ ଆସି ଉତ୍ପାଦିତ ସାମଗ୍ରୀ ସବୁ ବିକ୍ରି ପାଇଁ ନେଉଛନ୍ତି । ଗୋଟିଏ ଲିଟର ଫିନାଇଲକୁ ୩୦ ଟଙ୍କା, ବିରିବଡ଼ି କେଜି ୨୦୦ ଟଙ୍କା, କର୍ପୂର ୧୦ ଟଙ୍କା ଓ ୩୦ ଟଙ୍କା ଦାମ୍‌ର ଛୋଟ ପ୍ୟାକେଟ୍‌, ବଳିତା ୨୦ ଟିକିଆ ପ୍ୟାକେଟ୍‌କୁ ୮୦ ଟଙ୍କା ଦାମରେ ବିକ୍ରି କରନ୍ତି ମହିଳା । ସେହିପରି ଗୋଷ୍ଠିର ସଦସ୍ୟା ମାନେ କପଡ଼ା ସିଲେଇ କରି ମଧ୍ୟ ବିକ୍ରି କରୁଛନ୍ତି ।   ଜଣେ ଚାହିଁଲେ ଯାହା କରି ହୁଏନାହିଁ, ୧୦ ଜଣ ମିଶିଲେ ଏହା କରିବା ସମ୍ଭବ ହୋଇଥାଏ । ଯାହା ଏହି ମହିଳା ମାନଙ୍କ କ୍ଷେତ୍ରରେ ଦେଖିବାକୁ ମିଳିଛି ।