ନର୍ସ ନିହାରୀକା ପାତ୍ର ହତ୍ୟାକାଣ୍ଡ ଘଟଣାରେ ଆସୁଛି ନୂଆ ନୂଆ ତଥ୍ୟ : ବାହାଘର ପାଇଁ ଚାଲିଥିଲା ପ୍ରସ୍ତୁତି, ପ୍ରେମିକ ରାଜା ସହିତ ହୋଇଥାନ୍ତା ନିର୍ବନ୍ଧ
କନକ ବ୍ୟୁରୋ : କଟକ ନର୍ସ ନିହାରୀକା ପାତ୍ର ହତ୍ୟାକାଣ୍ଡ ନେଇ ନୂଆ ନୂଆ ଖିଅ ସାମ୍ନାକୁ ଆସୁଛି । ଗତକାଲି ବିଲୁଆଖାଇ ନଦୀରୁ ମୃତଦେହ ମିଳିଥିଲା । ଏହା ପରେ ପୋଲିସ ତନାଘନା ଆରମ୍ଭ କରିଛି । ହତ୍ୟା ଘଟଣା ପଛରେ ପ୍ରେମିକ ରାଜାର ହାତ ଥିବା ସନ୍ଦେହ ବଢିବାରେ ଲାଗିଛି । ଜଗତସିଂହପୁର ଏସପିଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ ଗଠନ କରାଯାଇଛି । କନକ ନ୍ୟୁଜକୁ ମିଳିଥିବା ଖବର ଅନୁସାରେ,ରାଜା ଓ ନିହାରିକାର ବିବାହ ହୋଇଥାନ୍ତା । ଏଥିପାଇଁ ନିର୍ବନ୍ଧ ମଧ୍ୟ ହୋଇଥାନ୍ତା । ନୂଆ ଘର ତିଆରି ମଧ୍ୟ ଶେଷ ପର୍ଯ୍ୟାୟରେ ପହଂଚିଥିଲା । ନିହାରୀକା ନିଖୋଜ ହେବା ପରେ ୯ ତାରିଖ ଦିନ ରାଜା ହସ୍ପିଟାଲ ଯାଇଥିଲେ । ହେଲେ ୧୩ ତାରିଖରୁ ରାଜା ଘରେ ଫୋନ ଛାଡିଦେଇ ନିଖୋଜ ହୋଇଯାଇଥିବା ଅଭିଯୋଗ ବିରିଡି ଥାନାରେ ତାଙ୍କ ମା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଷ୍ଟାଫ ନର୍ସ ନିହାରୀକାଙ୍କ ହତ୍ୟାକାଣ୍ଡ ନେଇ ପ୍ରେମିକ ଉପରେ ସସପେନ୍ସ ବଢୁଥିବା ବେଳେ ଏକ ସିସିଟିଭି ଫୁଟେଜ ମିଳିଛି । ଏହି ଫୁଟେଜର ନିହାରୀକା ଚାକିରୀ କରୁଥିବା ଏମଏମ ନର୍ସିଂହୋମର ବୋଲି ଜଣାପଡିଛି । ଭିଡିଓ ଗତ ୮ ତାରିଖର, ଯେଉଁଦିନ ସଂଧ୍ୟାରୁ ନିଖୋଜ ହୋଇଯାଇଥିଲେ ନିହାରୀକା । ଭିଡିଓରେ ନିହାରିକା ନର୍ସିଂହୋମରୁ ବାହାରୁଥିବା ଦୃଶ୍ୟ କଏଦ ହୋଇଛି । ଏହି ଭିଡିଓ ଫୁଟେଜ ସନ୍ଧ୍ୟା ସମୟର ବୋଲି ଜଣାପଡିଛି । ନିଖୋଜ ପୂର୍ବରୁ ନିହାରିକାର ଏହି ଭିଡିଓ ଫୁଟେଜର ଖୋଳତାଡ କରାଗଲେ, ଓ ନିକଟସ୍ଥ ଅନ୍ୟ ସିସିଟିଭିର ରେକର୍ଡିଂ ଯାଂଚ କଲେ ମୃତ ନିହାରୀକା କାହାସହ ସେ ଦିନ ସଂଧ୍ୟାରେ ବାହାରିଥିଲେ ତାହା ସ୍ପଷ୍ଟ ହେବ । ନିଖୋଜ ପୂର୍ବରୁନିହାରୀକାର ଶେଷ ଭିଡିଓ ବୋଲି କୁହାଯାଉଛି ।
ସେପଟେ ଏହି ହତ୍ୟାକାଣ୍ଡ ମାମଲାରେ ବିରିଡି ଥାନା ପୁଲିସ ହାଜିପୁର ଅଂଚଳରୁ ଗତକାଲି ୬ ଜଣଙ୍କୁ ଉଠାଇ ଆଣିଛି । ହତ୍ୟାକାଣ୍ଡ ପଛରେ ପ୍ରେମିକର ଭୂମିକା ଥିବା ସନ୍ଦେହ କରାଯାଉଛି । ପ୍ରେମିକ ରାଜା ଫେରାର ହୋଇଯାଇଥିବା ବେଳେ ରାଜାର ବାପା, ତା ଭାଇ, ତାର ସାଙ୍ଗ ଓ ସଂପର୍କୀୟଙ୍କୁ ସନ୍ଦେହରେ ଉଠାଇ ଆଣି ପୁଲିସ ଜେରା କରୁଛି । ବିରିଡି ଥାନାରେ ଅଟକ ରଖି ୬ ଜଣ ସନ୍ଦିଗ୍ଧଙ୍କୁ ପଚରାଉଚରା କରୁଛି ପୁଲିସ । ସନ୍ଦିଗ୍ଧଙ୍କୁ ଜେରା କରିବା ପରେ ହତ୍ୟାକାଣ୍ଡର କାରଣ ଓ କିଏ କାହିଁକି ଷ୍ଟାଫ ନର୍ସ ନିହାରୀକାଙ୍କୁ ହତ୍ୟାକଲା ତାହା ଜଣାପଡିବ ବୋଲି ଆଶା କରାଯାଉଛି ।
ଗତକାଲି ଜଗତସିଂହପୁର ବିଲୁଆଖାଇ ନଈରୁ ଏକ ଅଖାରେ ହାତଗୋଡ ବନ୍ଧା ଅବସ୍ଥାରେ ନିହାରିକାଙ୍କ ମୃତଦେହ ଉଦ୍ଧାର କରାଯାଇଥିଲା । ମିଳିଥିବା ମୃତଦେହ ନିହାରୀକାର ବୋଲି ତାଙ୍କ ମାଆ ଚିହ୍ନଟ କରିଛନ୍ତି । ତେବେ ଦୀର୍ଘ ସମୟ ଧରି ପାଣିରେ ଭାସିଥିବାରୁ ମୃତଦେହ ନିହାରୀକାର ନା ନୁହେଁ ତାହା ସ୍ପଷ୍ଟ ହେବାକୁ ପୁଲିସ ଡିଏନଏ ଟେଷ୍ଟ କରିପାରେ ବୋଲି ସୂଚନା ମିଳିଛି ।