ଆଣ୍ଡାମାନରେ ଅଟକି ଯାଇଛି ମୌସୁମୀ ବାୟୁ : ସକ୍ରିୟ ହେବା ପାଇଁ ଲାଗିବ ସମୟ, ୬ ଦିନ ବିଳମ୍ବରେ କେରଳ ଛୁଇଁବା ସମ୍ଭାବନା
କନକ ବ୍ୟୁରୋ : ସାଧାରଣତଃ ଜୁନ୍ ପହିଲାରେ ଦକ୍ଷିଣ-ପଶ୍ଚିମ ମୌସୁମୀ କେରଳ ଛୁଇଁଥାଏ । ଏଥର ମଧ୍ୟ ସେହି ସମୟରେ କେରଳରେ ମୌସୁମୀ ପହଞ୍ଚିବ ବୋଲି ଆକଳନ କରାଯାଇଥିଲା । ଗତ ମେ’ ୧୮ ତାରିଖରେ ବି ମୌସୁମୀ ଆଣ୍ଡାମାନ ଓ ନିକୋବର ଦୀପପୁଞ୍ଜରେ ପହଞ୍ଚିଲା । ତେବେ ସେଠାରେ ହିଁ ଅଟକିଯାଇଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ । ପୁଣିଥରେ ସକ୍ରିୟ ହେବା ଲାଗି ସମୟ ଲାଗିବ । ତେଣୁ ମୌସୁମୀ ଏଥର ବିଳମ୍ବରେ କେରଳ ଛୁଇଁବ ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗ ବି ମୌସୁମୀଙ୍କୁ ନେଇ ଆଶଙ୍କାରେ ପଡ଼ିଛି । ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି ଯେ ଦକ୍ଷିଣ ପଶ୍ଚିମ ମୌସୁମୀ ଏବେ ଆଣ୍ଡାମାନରେ ରହିଛି । ସୁପ୍ତ ହୋଇଥିବା ମୌସୁମୀ ଆସନ୍ତା ଦୁଇରୁ ତିନି ଦିନ ମଧ୍ୟରେ ପୁଣିଥରେ ସକ୍ରିୟ ହେବ । ଜୁନ୍ ୨ ବେଳକୁ ଦକ୍ଷିଣ ବଙ୍ଗୋପସାଗର, ଉତ୍ତର ଆଣ୍ଡାମାନ ସାଗର, ମାଲଦୀପ-କାମୋରିନ୍ ଅଞ୍ଚଳରେ ମୌସୁମୀ ବାୟୁ ପ୍ରବାହ ଲାଗି ଉପଯୁକ୍ତ ପରିବେଶ ସୃଷ୍ଟି ହେବାର ବହୁତ ସମ୍ଭାବନା ରହିଛି । ସକ୍ରିୟ ହେବା ପରେ ତାହା ଦକ୍ଷିଣ ଭାରତ ତଥା କେରଳ ମୁହାଁ ହେବ । ତେଣୁ ଜୁନ୍ ୬ କିମ୍ବା ୭ ତାରିଖ ବେଳକୁ ମୌସୁମୀ କେରଳରେ ପହଞ୍ଚିପାରେ ।
ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି ଯେ କେରଳ ଓ ସଂଲଗ୍ନ ରାଜ୍ୟରେ ଆସନ୍ତା ୭ ତାରିଖ ପର୍ଯ୍ୟନ୍ତ ପଶ୍ଚିମ ମୁଖ୍ୟତଃ ପଶ୍ଚିମ ଆଡ଼ୁ ପ୍ରବାହିତ ହେବ । ତେବେ ଏକ ଘୁର୍ଣ୍ଣିବଳୟ ଯୋଗୁଁ ୩ ଓ ୪ ତାରିଖରେ ଭଲ ବର୍ଷା ହେବ । କିନ୍ତୁ ସେଥିରେ ମୌସୁମୀ ବର୍ଷାର ଲକ୍ଷଣ ଦେଖାଯାଉ ନାହିଁ । ଓଡ଼ିଶାରେ ରଜ ପୂର୍ବରୁ କିଛି ସ୍ଥାନରେ ବର୍ଷାର ସମ୍ଭାବନା ରହିଛି। ସୂଚନା ମିଳୁଛି କି ବର୍ତମାନ ପୂର୍ବ ବଙ୍ଗୋପସାଗରରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ଯୋଗୁଁ ବର୍ଷା ହେଉଛି । ତାହା ଓଡ଼ିଶା ଉପକୂଳ ନିକଟବର୍ତ୍ତୀ ହେଲେ ଘୂର୍ଣ୍ଣିବଳୟ ଦ୍ବାରା ଓଡ଼ିଶା ଉପକୂଳକୁ ଟାଣିଆଣିବ। ବର୍ଷା ହୋଇପାରେ ।