ତାଲାବନ୍ଦ ଭିତରେ ମାତିଛନ୍ତି ଲୁଟେରା । ଖୋର୍ଦ୍ଧା ବାଲିପାଟଣାରେ ବୃଦ୍ଧାଙ୍କୁ କରାଯାଉଛି ଟାର୍ଗେଟ । ୩ମାସରେ ଘଟିଲା ୩ଟି ଘଟଣା
କନକ ବ୍ୟୁରୋ : ରାଜଧାନୀ ଉପକଣ୍ଠରେ ଲୁଟେରାଙ୍କ ଆତଙ୍କ । ଗତ ଅଢେଇ ମାସ ଭିତରେ ରାଜଧାନୀ ଉପକଣ୍ଠ ବାଲିପାଟଣା ଥାନା ଅଂଚଳରେ ତିନିଟି ଲୁଟ ଘଟଣା ଲୋକଙ୍କୁ ଭୟଭୀତ କରିଛି । ଫଳରେ ଗହଣା ପିନ୍ଧି ରାସ୍ତାରେ କିମ୍ବା ଦାଣ୍ଡ ଦୁଆରେ ବାହାରିବାକୁ ମହିଳାମାନେ ସୁରକ୍ଷତି ମଣୁ ନାହାନ୍ତି । ଲୁଟେରାମାନେ ରାସ୍ତାରେ ଯାଉଥିବା ବୟସ୍କ ମହିଳାଙ୍କ ଟାର୍ଗେଟ କରି ସୁନା ଅଲଙ୍କାର ଲୁଟ କରି ଫେରାର ହୋଇଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ଗିରିଙ୍ଗ ମହାନ୍ତି ସାହିରେ ଦିନ ସାଢେ ୧୨ଟାରେ ଦାଣ୍ଡ ଦୁଆରୁ ମହିଳାଙ୍କ ବେକରୁ ଚେନ ଲୁଟିନେଲେ ଦୁର୍ବୃତ୍ତ । ଘଟଣାକୁ ୨୪ ଘଂଟା ବିତି ଯାଇଥିବା ବେଳେ ପୁଲିସର ହାତ ଖାଲି । ମାର୍ଥାପୁର ପଂଚାୟତ ପଦ୍ମପୁର ଗାଁରେ ଗତ ମେ ମାସରେ ନିରୁପମା ମହାପାତ୍ରଙ୍କ ବେକରୁ ଚେନ ଲୁଟିନେଇଥିଲେ ଲୁଟେରା । ଠିକଣା ପଚାରିବା ବାହାନାରେ ମହିଳାଙ୍କ ପାଖକୁ ଯାଇ ଚେନ ଝାଂପି ନେଇ ଚମ୍ପଟ ହୋଇଯାଇଥିଲେ ଦୁର୍ବୃତ୍ତ । ସେହିପରି ଅପ୍ରେଲ ୧୫ରେ ବନମାଳୀପୁର ଡେରା ସାହିରେ ଫୁଲ ତୋଳୁଥିବା ଜଣେ ମହିଳାଙ୍କ ବେକରୁ ଚେନ ଛିଣ୍ଡାରେ ଫେରାର ହୋଇଥିଲେ ଦୁଇ ଦୁର୍ବୃତ୍ତ ।
ଅପ୍ରେଲରୁ ଜୁନ ଭିତରେ ବାଲିପାଟଣା ଥାନା ଅଂଚଳରେ ୩ଟି ଲୁଟ ଘଟଣା ଘଟିଥିଲେ ମଧ୍ୟ ପୁଲିସର ହାତ ଖାଲି । ପୁଲିସ ତଦନ୍ତ ଚାଲିଛି, ଲୁଟେରାଙ୍କୁ ଧରାଯିବ କହୁଥିବା ବେଳେ ଲୋକେ ତୁରନ୍ତ ଚୋରି ଘଟଣାର ପର୍ଦ୍ଦଫାସ କରିବାକୁ ଦାବି ହେଉଛି ।