କନକ ବ୍ୟୁରୋ: ପୁଷ୍ଟିକର ପଦାର୍ଥରେ ପରିପୂର୍ଣ୍ଣ ଅଣ୍ଡା ଖାଇବାକୁ କିଏ ନ ଭଲ ପାଏ କହିଲେ । ପ୍ରୋଟିନ, ଭିଟାମିନ୍ ଏବଂ ଖଣିଜ ପଦାର୍ଥ ଯୋଗାଉଥିବା ଅଣ୍ଡାକୁ ଶୀତ ଋତୁରେ ଅଧିକାଂଶ ଲୋକ ଖାଇଥା’ନ୍ତି । ଉଷ୍ମତା ପ୍ରଦାନ କରୁଥିବାରୁ ଶୀତରେ ଅଣ୍ଡାର ବିକ୍ରି ମଧ୍ୟ ଅଧିକ ହୋଇଥାଏ । ତେବେ ଭାରତରେ ଦେଶୀ ଅଣ୍ଡାର ଅଭାବ ଯୋଗୁଁ ଲୋକମାନେ ବଢ଼ୁଥିବା ବ୍ରଏଲର କୁକୁଡ଼ାର ଅଣ୍ଡାକୁ ଖାଇଥା’ନ୍ତି । ନିକଟରେ ମୋରାଦାବାଦର ଏକ କାରଖାନାରୁ ନକଲି ଅଣ୍ଡାକୁ କେମିତି ଦେଶୀ ଅଣ୍ଡାର ରୂପ ଦିଆଯାଏ ତାହା ଦେଖାଯାଇଥିଲା । ଖାଦ୍ୟ ସୁରକ୍ଷା ବିଭାଗ ଏହି ଗୋଦାମରୁ ୮0,000 ରୁ ଅଧିକ ଅଣ୍ଡା ଜବତ କରିଛି, ଯେଉଁଥିରେ ୪୫,୩୬୦ ରଙ୍ଗୀନ ଅଣ୍ଡା ଏବଂ ୩୫,୬୪୦ ଧଳା ଅଣ୍ଡା ଥିଲା । ଏହାକୁ କୃତ୍ରିମ ରଙ୍ଗରେ ରଙ୍ଗ କରାଯାଇ ଦେଶୀ ଅଣ୍ଡାର ରୂପ ଦିଆଯାଇଥିଲା । ଯାହାକୁ ଚା’ ପତି ଏବଂ ସିଦନୁର ରାସାୟନିକ ପଦାର୍ଥର ଦ୍ରବଣରେ ରଙ୍ଗ କରାଯାଉଥିଲା । ପରେ ଦେଶୀ ଅଣ୍ଡା ଭଳି ଦେଖାଯାଉଥିବା ଏହି ନକଲି ଅଣ୍ଡାକୁ ବଜାରକୁ ଛଡ଼ା ଯାଉଥିଲା ।

Advertisment

ଭଦ୍ରକ ବିଜେଡିରେ କମ୍ପନ: ଥରକେ ଛାଡ଼ିଲେ ୩ ବ୍ଲକ୍‌ ଅଧ୍ୟକ୍ଷ

ଏତେ ନକଲି ଅଣ୍ଡା ଧରାପଡ଼ିବା ପରେ ଲୋକମାନେ ପ୍ରକୃତ ଏବଂ ନକଲି ଅଣ୍ଡା ମଧ୍ୟରେ କିପରି ପାର୍ଥକ୍ୟ କରିବେ ତାହା ଭାବୁଛନ୍ତି । ତେବେ ଆସନ୍ତୁ ଜାଣିବା କେମିତି ଚିହ୍ନିବେ ପ୍ରକୃତ ଅଣ୍ଡା । ପ୍ରକୃତ ଦେଶୀ ଅଣ୍ଡା ହାଲୁକା ବାଦାମୀ କିମ୍ବା ଧଳା ରଙ୍ଗର ହୋଇଥାଏ ଏବଂ ଏହାର ପୃଷ୍ଠ ଚିକ୍କଣିଆ ତଥା ମସୃଣ ହୋଇଥାଏ । ନକଲି ଅଣ୍ଡାର ପୃଷ୍ଠ କେତେକ ସମୟରେ ଅତ୍ୟଧିକ ମସୃଣ କିମ୍ବା ପ୍ଲାଷ୍ଟିକ୍ ପରି ଦେଖାଯାଇପାରେ । ଅସାଧାରଣ କିମ୍ବା ଅତ୍ୟଧିକ ଉଜ୍ଜ୍ୱଳ ରଙ୍ଗ ମଧ୍ୟ ନକଲି ଅଣ୍ଡାର ଏକ ଲକ୍ଷଣ ହୋଇପାରେ । ଓଜନ କଥା ଯଦି କହିବା ଅସଲି ଅଣ୍ଡା ହାତକୁ ଟିକେ ଭାରୀ ଲାଗିଥାଏ ଅନ୍ୟପକ୍ଷରେ ନକଲି ଅଣ୍ଡା ହାତକୁ ହାଲୁକା ଲାଗିଥାଏ । ପାଣି ଭିତରେ ଛାଡ଼ି ଆପଣ ଅଣ୍ଡା ଅସଲି କି ନକଲି ଚିହ୍ନିପାରିବେ । ଯଦି ଅଣ୍ଡା ପ୍ରକୃତରେ ଅସଲି ହୋଇଥିବ ତା’ହେଲେ ଏହା ପାତ୍ରର ତଳ ଭାଗରେ ଜମିଯିବ କିନ୍ତୁ ନକଲି ଅଣ୍ଡା ପାଣିରେ ଭାସିବ । ଅସଲି ଦେଶୀ ଅଣ୍ଡାରୁ କଞ୍ଚା ଏବଂ ରନ୍ଧା ଉଭୟ ପ୍ରକାରର ପ୍ରାକୃତିକ ଗନ୍ଧ ବାହାରିଥାଏ ଅନ୍ୟପକ୍ଷରେ ନକଲି ଅଣ୍ଡା ଶୁଙ୍ଘିଲେ ରାସାୟନିକ ଗନ୍ଧ ବାରି ହୁଏ । ପ୍ରକୃତ ଅଣ୍ଡାର ଧଳା ଅଂଶ ସ୍ୱଚ୍ଛ ଏବଂ ମସୃଣ ହୋଇଥାଏ, ଯେତେବେଳେ ନକଲି ଅଣ୍ଡାର ଧଳା ଅଂଶ ଘନ, ଚିପଚିପା ଏବଂ ନକଲି ଭଳି ଶୀଘ୍ର ଜଣାପଡ଼ିଯାଏ ।