କରତାରପୁର କରିଡର ନେଇ ଭାରତ-ପାକ୍ ଆଲୋଚନା ! ଭିସା ମୁକ୍ତ ପ୍ରବେଶ ଦାବି କଲା ଭାରତ
କନକ ବ୍ୟୁରୋ : ପୁଲ୍ୱାମାରେ ପାକିସ୍ତାନୀ ଆତଙ୍କବାଦୀ ସଂଗଠନ ଜୈସ୍ର ଆକ୍ରମଣ ଏବଂ ବାଲାକୋଟ୍ରେ ଜୈସ୍ ଶିବିର ଉପରେ ଭାରତର ବୋମାମାଡ଼ ପରେ ଭାରତ ଏବଂ ପାକିସ୍ତାନ ମଧ୍ୟରେ ଲାଗି ରହିଥିବା ତୀବ୍ର ଉତ୍ତେଜନାପୂର୍ଣ୍ଣ ସ୍ଥିତିରେ ଏବେ ଯଥେଷ୍ଟ ସୁଧାର ହୋଇଛି । ପୁଲୱାମା ଆକ୍ରମଣ ପରେ ଆଜି ପ୍ରଥମ ଥର ପାଇଁ ଭାରତ ଏବଂ ପାକିସ୍ତାନ ଅଧିକାରୀଙ୍କ ମଧ୍ୟରେ କର୍ତାରପୁର କରିଡରକୁ ନେଇ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି । ଭାରତ କରତାପୁର ଗୁରୁଦ୍ବାରକୁ ଯାଉଥିବା ଶ୍ରଦ୍ଧାଳୁଙ୍କ ପ୍ରବେଶକୁ ସଂପୂର୍ଣ୍ଣ ଭିସା ମୁକ୍ତ କରିବାକୁ ଦାବି କରିଛି ।
Kanak News is now on WhatsApp
Join and get latest news updates delivered to you via WhatsApp
ଦୈନିକ ୫ ହଜାର ଶ୍ରଦ୍ଧାଳୁଙ୍କୁ ବିନା ଭିସାରେ ଯିବା ପାଇଁ ଅନୁମତି ଦେବାକୁ ଭାରତ କହିଛି । ଏହି ବୈଠକରେ ପଂଜାବର ଗୁରୁଦାସପୁର ଜିଲ୍ଲା ସୀମା ଏବଂ କରତାପୁର ସାହିବ ପର୍ଯ୍ୟନ୍ତ ପ୍ରସ୍ତାବିତ କରିଡର ଖୋଲିବା ନେଇ ବିସ୍ତୃତ ଆଲୋଚନା ହୋଇଥିଲା । ଶ୍ରଦ୍ଧାଳୁଙ୍କୁ କରତାପୁର ସାହିବ ପର୍ଯ୍ୟନ୍ତ ଚାଲି ଚାଲି ଯିବାକୁ ଅନୁମତି ଦେବା ଏବଂ ସପ୍ତାହରେ ୭ ଦିନ ଏହି କରିଡର ଖୋଲା ରଖିବାକୁ ଭାରତ ପ୍ରସ୍ତାବ ଦେଇଛି ।
ଏ ବାବଦରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଗୃହ ମନ୍ତ୍ରାଳୟର ଯୁଗ୍ମ ସଚିବ ଏସ୍ସିଏଲ୍ ଦାସ କହିଥିଲେ ଯେ କର୍ତାରପୁର କରିଡରକୁ ସଫଳ କରିବାକୁ ହେଲେ ଶ୍ରଦ୍ଧାଳୁଙ୍କୁ ବିନା ଭିସାରେ ପ୍ରବେଶ ଅନୁମତି ମିଳିବା ଆବଶ୍ୟକ । ଏହା କାର୍ଯ୍ୟକାରୀ ହେଲେ ଅନ୍ୟ ସମସ୍ୟାଗୁଡ଼ିକର ତ୍ବରିତ ସମାଧାନ ହୋଇପାରିବ ବୋଲି ସେ କହିଛନ୍ତି । ଭାରତ-ପାକିସ୍ତାନ ମଧ୍ୟରେ ଏହି ଦ୍ବିପାକ୍ଷିକ ବୈଠକ ପରେ ଆଗକୁ ଅନ୍ୟ ପ୍ରସଙ୍ଗରେ ମଧ୍ୟ କଥାବାର୍ତ୍ତା ପାଇଁ ରାସ୍ତା ଖୋଲିବ ବୋଲି କୁହାଯାଉଛି ।