କର୍ଣ୍ଣାଟକର ଭାବି ମୁଖ୍ୟମନ୍ତ୍ରୀ କୁମାରସ୍ୱାମୀଙ୍କ ଅଭିନେତ୍ରୀ ପତ୍ନୀଙ୍କୁ ନେଇ ସାରା ଦେଶରେ ଚର୍ଚ୍ଚା ! ଗୁଗୁଲ୍ ସର୍ଚ୍ଚରେ ରାଧିକା ଏବେ ଅଧିକ ଖୋଜାଯାଉଥିବା ସେଲିବ୍ରିଟି
କନକ ବ୍ୟୁରୋ : କର୍ଣ୍ଣାଟକକୁ ନେଇ ସାରା ଦେଶର ରାଜନୈତିକ ମାହୋଲ ସରଗରମ ଥିବାବେଳେ ଗୁଗଲରେ ଟ୍ରେଂଡ୍ କରୁଛନ୍ତି କୁମାରସ୍ୱାମୀଙ୍କ ଅଭିନେତ୍ରୀ ପତ୍ନୀ ରାଧିକା କୁମାରସ୍ୱାମୀ । ରାଧିକା କନ୍ନଡ ସିନେ ଜଗତର ଜଣେ ଜଣାଶୁଣା ଚେହେରା । ୨୦୦୬ରେ କୁମାରସ୍ୱାମୀ, ରାଧିକାଙ୍କୁ ବିବାହ କରିଥିଲେ । ଏବେ ପୁଣି ରାଧିକାଙ୍କୁ ନେଇ ଚର୍ଚ୍ଚା । ରାଧିକା ନିଜ ଅଭିନୟ ଓ ଗ୍ଲାମର ଜରିଆରେ ଦର୍ଶକଙ୍କ ମନ କିଣୁଥିବା ସହ ପଲିଟିକାଲ୍ କରିଡରରେ ମଧ୍ୟ ପ୍ରଭାବଶାଳୀ । କନ୍ନଡ଼ ଫିଲ୍ମର ଏହି ୩୧ ବର୍ଷୀୟା ନାୟିକା ଜଣକ ହେଉଛନ୍ତି କର୍ଣ୍ଣାଟକ ରାଜନୀତିର ଧୁରନ୍ଧର୍ ମହାରଥୀ କୁମାରସ୍ୱାମୀଙ୍କ ୨ୟ ପତ୍ନୀ ରାଧିକା । କୁମାରସ୍ୱାମୀ ଓ ରାଧିକାଙ୍କ ୬ ବର୍ଷର ଏକ ଝିଅ ମଧ୍ୟ ଅଛି ।
Kanak News is now on WhatsApp
Join and get latest news updates delivered to you via WhatsApp
କର୍ଣ୍ଣାଟକ ରାଜନୀତିରେ ଯେତେବେଳେ ବଡ଼ଧରଣର ଆଲୋଡ଼ନ ସୃଷ୍ଟି ହେଉଥାଏ ସେତେବେଳେ ଚର୍ଚ୍ଚାର କେନ୍ଦ୍ର ପାଲଟିଥିବା ଭାବି ମୁଖ୍ୟମନ୍ତ୍ରୀ କୁମାରସ୍ୱାମୀଙ୍କ ରାଧିକା କାହାଣୀ ପୁଣିଥରେ ସାମ୍ନାକୁ ଆସୁ ଥାଏ । ପୂର୍ବରୁ ସିନେମା ପ୍ରତି କୁମାରସ୍ୱାମୀଙ୍କ ବିଶେଷ ଦୁର୍ବଳତା ଥିବାରୁ ରାଧିକାଙ୍କ ସହ ତାଙ୍କ ସମ୍ପର୍କ ଗଢ଼ିଉଠିଥିଲା । ଏକାଧିକ ସୁପରହିଟ୍ କନ୍ନଡ଼ ସିନେମା ନିର୍ମାଣ ଓ ବିତରଣ ଦାୟିତ୍ୱ ତୁଲାଇଥିବା କୁମାରସ୍ୱାମୀ ପରେ ୨୦୦୬ ମସିହାରେ ରାଧିକାଙ୍କୁ ଦ୍ୱିତୀୟ ବିବାହ କରିଥିଲେ ।
ନବମ ଶ୍ରେଣୀରେ ପଢ଼ୁଥିବା ରାଧିକା ୨୦୦୨ ମସିହାରେ ମାତ୍ର ୧୪ ବର୍ଷ ବୟସରେ କନ୍ନଡ଼ ଫିଲ୍ମ ନୀଲା ମେଘା ସମା ଜରିଆରେ ସିନେଦୁନିଆରେ ପାଦ ରଖନ୍ତି । ପରବର୍ତ୍ତୀ ସମୟରେ କନ୍ନଡ଼ ଫିଲ୍ମର ସର୍ବାଧିକ ଲୋକପ୍ରିୟ ନାୟିକା ଭାବେ ସେ ସାମ୍ନାକୁ ଆସନ୍ତି । ଗୁଗୁଲ୍ ସର୍ଚ୍ଚରେ ଏବେ ଟ୍ରେଣ୍ଡ କରୁଛି କୁମାରସ୍ୱାମୀ ଓ ରାଧିକାଙ୍କ ପ୍ରେମକାହାଣୀ । ରାଧିକା ଏବେ ଅଧିକ ଖୋଜାଯାଉଥିବା ସେଲିବ୍ରିଟି ତାଲିକାର ଶୀର୍ଷରେ ।