ନିଷ୍କାସିତ ହୋଇପାରୁନି ଚାଷଜମିରୁ ପାଣି । ନଦୀକୁ ସଂଯୋଗ କରୁଥିବା ନାଳକୁ ଅବରୋଧ କଲେ ଗାଁ ଲୋକେ । ଅସ୍ତରଙ୍ଗ କାକଟରୁ ଶହ ଶହ ଏକ ଜମିରେ ଜମିଛି ଆଣ୍ଠୁଏ ପାଣ । ଦୁଇ ଗାଁ ମୁହାଁମୁହିଁ
କନକ ବ୍ୟୁରୋ : ମାଛ ମାରିବା ପାଇଁ ସଫେଇ ନାଳକୁ ବନ୍ଦ କରିଦେଲେ ଲୋକେ । ଏପଟେ ଚାଷ ଜମିରେ ବର୍ଷା ଜଳ ନିଷ୍କାସନ ହୋଇନପାରି ଗତ ୬ ଦିନ ହେଲାଣି ଆଣ୍ଠୁଏ ପାଣି ଜମିରହିଛି । ରୁଆ ରୁଇ କରିଥିବା ତଳି ଏବେ ଶଢିବାକୁ ବସିଲାଣି । ଯାହାକୁ ନେଇ କାକଟପୁର ବ୍ଲକର ଟେଲିକୁଦ ଓ ପଲାବସ୍ତ ଗାଁର ଲୋକେ ମୁହାଁମୁହିଁ ହୋଇଛନ୍ତି । ପ୍ରଶାସନ ଲୋକଙ୍କୁ ବୁଝାସୁଝା କରି ନାଳର ଅବରୋଧକୁ ହଟାଇଛି, ହେଲେ ପ୍ରାଚୀ ନଦୀ ଏବେ ଜୁଆରିଆ ହୋଇଥିବାରୁ ଜଳ ନିଷ୍କାସନ ହୋଇପାରୁ ନାହିଁ । ଲଘୁଚାପ ବର୍ଷା ପରେ ବିଲରେ ପାଣି ଜମି ରହିଛି ।
Kanak News is now on WhatsApp
Join and get latest news updates delivered to you via WhatsApp
ଆଉ ବିଲରୁ ବର୍ଷା ପାଣି ନିଷ୍କାନ ପାଇଁ ଥିବା ସଫେଇ ନାଳକୁ ମାଛ ମାରିବା ପାଇଁ ବନ୍ଦ କରିଦେଇଥିଲେ ଟେଲିକୁଦ ଗାଁର ଲୋକେ । ଫଳରେ କାକଟପୁର ବ୍ଲକର ୩ଟି ପଂଚାୟତର ପ୍ରାୟ ୧୦ଟି ଗାଁର ଶହ ଶହ ଏକର ଚାଷ ଜମିରେ ଅଂଟାଏ ପାଣି ଜମିରହିଛି । ପଲାବସ୍ତା ଗାଁର ଲୋକେ ସଂଘବଦ୍ଧ ହୋଇ ସଫେଇ ନାଳ ନିକଟରେ ପହଂଚି ଅବରୋଧ ହଟାଇବାକୁ ଉଦ୍ୟମ କରିଥିଲେ । ଯାହାକୁ ଟେଲିକୁଦ ଗାଁର ଲୋକେ ବିରୋଧ କରିବାରୁ ଉତେଜନା ପ୍ରକାଶ ପାଇଥିଲା । ଖବର ପାଇ ଘଟଣାସ୍ଥଳରେ କୋଣାର୍କ ଥାନା ପୁଲିସ ସହ ପହଂଚିଥିଲେ ଚିତରେଶ୍ୱର ଆରଆଇ । ଲୋକଙ୍କୁ ବୁଝାସୁଝା କରି ନାଳର ଅବରୋଧକୁ ହଟାଇ ଦେଇଛନ୍ତି ।