ଦିଲ୍ଲୀପ ରାୟ ବିଜେପି ଛାଡିବା ନେଇ ସଙ୍କେତ ଦେବାପରେ ପ୍ରତିକ୍ରିୟା ରଖିଲେ ଜୁଏଲ ଓରାମ : କହିଲେ କ୍ଷତି ହେବ, ହେଲେ ଭରଣା ବି ହେବ

କନକ ବ୍ୟୁରୋ : ବିଜେପିରେ ଅପରାଜିତାଙ୍କ ଯୋଗଦାନ ଦଳକୁ ଯେତିକି ଉତ୍ସାହିତ କରିଛି, ବିଜେପିଠୁ ଦିଲ୍ଲୀପ ଦୂରେଇ ଯିବା ନେଇ ଦେଇଥିବା ଇସାରା ଦଳକୁ ସେତିକି ବଡ ଝଟକା ଦେଇଛି । ବ୍ରାହ୍ମଣୀ ଉପରେ ଦ୍ୱିତୀୟ ପୋଲ ଏବଂ ଆଇଜିଏଚକୁ ସୁପର ସ୍ପେଶାଲିଟି ହସ୍ପିଟାଲ କାମକୁ ନେଇ ଅସନ୍ତୁଷ୍ଟ ଥିବା ଦିଲ୍ଲୀପ ରାୟ, ବିଧାୟକ ପଦ ଛାଡିବା ପାଇଁ ଖୋଲାଖୋଲି ଇସାରା ଦେଇଛନ୍ତି । ହେଲେ ବିଧାୟକଙ୍କ ଯୁକ୍ତି ସତ୍ୟ ନୁହେଁ ବରଂ ଦଳ ଛାଡିବା ପଛରେ ଆଉ କିଛି କାରଣ ରହିଥିବା କହିଛନ୍ତି ସୁନ୍ଦରଗଡ଼ ସାଂସଦ ତଥା କେନ୍ଦ୍ରମନ୍ତ୍ରୀ ଜୁଏଲ ଓରାମ ।

ରାଉରକେଲା ବିଧାୟକ ଆଣିଥିବା ଅଭିଯୋଗକୁ ସୁନ୍ଦରଗଡ଼ ସାଂସଦ ତଥା କେନ୍ଦ୍ରମନ୍ତ୍ରୀ ଜୁଏଲ୍ ଓରାମ ସିଧାସଳଖ ଖଣ୍ଡନ କରିଥିବା ବେଳେ ଦଳ କିମ୍ବା ପଦଠୁ ଦୂରେଇ ଯିବା ପ୍ରସଙ୍ଗରେ ଆଉ କିଛି କାରଣ ଥାଇପାରେ ବୋଲି କହିଛନ୍ତି ଜୁଏଲ ଓରାମ । ଉଭୟ ଆଇଜିଏଚ୍ ଏବଂ ବ୍ରାହ୍ମଣୀ ପୋଲ କାମ ସୁରୁଖୁରରେ ଚାଲିଛି । କିନ୍ତୁ ଜଳ, ଜଙ୍ଗଲ ଓ ଜମି ଯୋଗୁଁ କିଛି ଲୋକ ଜାଣିଶୁଣି ବିଳମ୍ବ କରୁଛନ୍ତି । ହେଲେ କାମ ହେଉ ନାହିଁ କହିବା ଠିକ୍ ନୁହେଁ ବୋଲି କେନ୍ଦ୍ରମନ୍ତ୍ରୀ କହିଛନ୍ତି । କିନ୍ତୁ ଦୁଇ ଦିନ ତଳେ ଠିକ୍ ଓଟଲା କଥା କହିଥିଲେ ଦିଲ୍ଲୀପ ।

ଏପଟେ ଆଇଜିଏଚକୁ ସୁପର ସ୍ପେଶାଲିଟି ହସ୍ପିଟାଲ ନେଇ ୱାର୍କ ଅଡର ହୋଇଛି, କିଛି ବିଭାଗର କାମ ଛାତ ପଡ଼ିବା ଯାଏଁ ଗଲାଣି । ଏପଟେ ଆଡ଼ମିନିଷ୍ଟ୍ରେଟିଭ୍ ବିଲ୍ଡିଂ ଓ ଟିଚିଂ ବ୍ଲକ୍ କାମ ଚାଲିଥିବା କେନ୍ଦ୍ରମନ୍ତ୍ରୀ ସମ୍ବାଦିକ ସମ୍ମିଳନୀରେ କହିଛନ୍ତି । ଦିଲ୍ଲୀପଙ୍କ ଅଭିଯୋଗ ଏବଂ ଜୁଏଲଙ୍କ ସ୍ପଷ୍ଟୀକରଣ ଭିତରେ କିନ୍ତୁ ସୁନ୍ଦରଗଡ଼ ରାଜନୀତି ଏକ ଭିନ୍ନ ମୋଡ ନେଉଛି । କାରଣ ୨୦୧୪ ନିର୍ବାଚନରେ ଦିଲ୍ଲୀପ, ବିଜେପି ପାଇଁ ରାଉରକେଲାରେ ଏକ ବିପୁଳ ବିଜୟ ଆଣି ଦେଇଥିଲେ । ଆଉ ଯଦି ଦିଲ୍ଲୀପ ବିଜେପିର ହାତ ଛାଡନ୍ତି, ତେବେ ୨୦୧୯ରେ ରାଉରକେଲା ରାଜନୀତି ନିଶ୍ଚିତ ଭାବରେ ଏକ ରୋଚକ ମୋଡରେ ପହଂଚିବ ।