ଜେଏନୟୁ ହିଂସା ନେଇ ସକ୍ରିୟ ହେଲା ଦିଲ୍ଲୀ ପୋଲିସ୍ : ଅଭିଯୁକ୍ତଙ୍କ ବିରୋଧରେ ଖୋଳତାଡ଼ ଆରମ୍ଭ
କନକ ବ୍ୟୁରୋ : ଦିଲ୍ଲୀ ଜବାହାରଲାଲ୍ ନେହେରୁ ବିଶ୍ୱବିଦ୍ୟାଳୟରେ ମୁଖା ପିନ୍ଧା ଦୁର୍ବୃତ୍ତଙ୍କ ସଂଘବଦ୍ଧ ଆକ୍ରମଣ ପରେ ସକ୍ରିୟ ହେଲା ପୋଲିସ୍ । ଆକ୍ରମଣରେ ସମ୍ପୃକ୍ତ ଅଭିଯୁକ୍ତଙ୍କୁ ଖୋଜୁଛି ପୋଲିସ୍ । ଘଟଣାକୁ ନେଇ ପୋଲିସ ନିକଟରେ ତିନିଟି ଏତଲା ଦିଆଯାଇଛି । ପୋଲିସ୍ ସୂତ୍ର ଅନୁସାରେ ଜେଏନୟୁ ଆକ୍ରମଣ ମାମଲାରେ ଅନେକ ଅଭିଯୋଗ ଆସୁଛି । ଅଭିଯୋଗ ଆଧାରରେ ଯାଂଚ ଆରମ୍ଭ ହେବ ବୋଲି କୁହାଯାଇଛି । ଜେଏନୟୁ ହିଂସା ନେଇ କେନ୍ଦ୍ର ସରକାର ମଧ୍ୟ ସକ୍ରିୟ ହୋଇଯାଇଛନ୍ତି । ଶିକ୍ଷା ମନ୍ତ୍ରାଳୟ ତରଫରୁ ବିଶ୍ୱବିଦ୍ୟାଳୟର ରେଜିଷ୍ଟାର, ପ୍ରକ୍ଟର ଓ ରିକ୍ଟରଙ୍କୁ ନୋଟିସ ଜାରି କରି ଘଟଣାର ତଦନ୍ତ ରିପୋର୍ଟ ମଗାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଦିଲ୍ଲୀର ଜେଏନୟୁ ହଷ୍ଟେଲ ଭିତରେ ପଶି ଛାତ୍ରଛାତ୍ରୀଙ୍କୁ ଆକ୍ରମଣ ଘଟଣା ସାମ୍ନାକୁ ଆସିବା ପରେ ତେଜିଲାଣି ବିରୋଧ । ଦେଶର ବିଭିନ୍ନ ସ୍ଥାନରୁ ସାମ୍ନାକୁ ଆସିଛି ଛାତ୍ରଛାତ୍ରୀଙ୍କ ବିରୋଧର ଚିତ୍ର । ମୁମ୍ୱାଇରେ ବିଭିନ୍ନ କଲେଜର ଛାତ୍ରଛାତ୍ରୀ ଗେଟ୍ ୱେ ଅଫ୍ ଇଣ୍ଡିଆ ନିକଟରେ ଏକାଠି ହୋଇ ଏପରି ଆକ୍ରମଣକୁ ପ୍ରତିବାଦ କରିଛନ୍ତି । ସେହିପରି ତାଜହୋଟଲ ଆଗରେ ମଧ୍ୟ ଛାତ୍ରଛାତ୍ରୀ କରିଛନ୍ତି ପ୍ରତିବାଦ । ସମାନ ବିରୋଧ ପ୍ରଦର୍ଶନ ଦେଖିବାକୁ ମିଳିଛି ପୁନେରେ । ଦିଲ୍ଲୀ ଜେଏନୟୁରେ ଛାତ୍ରଛାତ୍ରୀଙ୍କ ଉପରେ ମୁଖାପିନ୍ଧା ଦୁର୍ବୃତଙ୍କ ଆକ୍ରମଣକୁ ବିରୋଧ କରି ଦେଶର ଅନ୍ୟ ସ୍ଥାନରେ ମଧ୍ୟ ସମାନ ବିରୋଧ ଦେଖିବାକୁ ମିଳିଛି ।