କନକ ବ୍ୟୁରୋ : ଜେଏନୟୁ ହିଂସାକାଣ୍ଡ ଘଟଣାରେ ସାମ୍ନାକୁ ଆସୁଛି ନୂଆ ତଥ୍ୟ । ହିଂସାକାଣ୍ଡ ଘଟଣାରେ ବ୍ୟବହାର ହୋଇଥିଲା କୋଡ୍ ୱାର୍ଡ । ହିଂସାକାଣ୍ଡ ହେବା ଆଗରୁ ମୁଖାପିନ୍ଧା ଦୁର୍ବୃତ୍ତ ମାନେ ପରଷ୍ପର ମଧ୍ୟରେ କୋଡ୍ ୱାର୍ଡରେ କଥାବାର୍ତ୍ତା କରୁଥିଲେ । ଏବେ ଏଭଳି କିଛି ତଥ୍ୟ ସାମ୍ନାକୁ ଆସୁଛି । ପୋଲିସ ଗତକାଲି ଠାରୁ ତଦନ୍ତ ଆରମ୍ଭ କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା କାହାକୁ ଗିରଫ କରିନାହିଁ । ସେପଟେ ଦେଶର ବିଭିନ୍ନ ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନେ ବିକ୍ଷୋଭ ପ୍ରଦର୍ଶନ କରିଛନ୍ତି । ଖାଲି ଭାରତ କାହିଁକି, ଲଣ୍ଡନ ଅକ୍ସଫୋର୍ଡ ବିଶ୍ୱବିଦ୍ୟାଳୟରେ ମଧ୍ୟରେ ହିଂସାକାଣ୍ଡ ବିରୋଧରେ ବାହାରିଛି ଶୋଭାଯାତ୍ରା । ଜେଏନୟୁରେ ମଧ୍ୟ ଉତ୍ତେଜନା ଲାଗି ରହିଛି । ଅପ୍ରୀତିକର ପରିସ୍ଥିତିର ମୁକାବିଲା ପାଇଁ ବିଶ୍ୱବିଦ୍ୟାଳୟ ପରିସରରେ ଏବଂ ବାହାରେ ବ୍ୟାପକ ପୋଲିସ ମୁତୟନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହିଂସାକାଣ୍ଡ ପାଇଁ ଜେଏନୟୁ ଛାତ୍ର ସଂଘ ଏବଂ ଏବିଭିପି ପରସ୍ପରକୁ ଦୋଷାରପ କରୁଥିବା ବେଳେ ବର୍ତ୍ତମାନ ସୁଦ୍ଧା କେହି ଗିରଫ ହୋଇନାହାନ୍ତି । ତେବେ ପୋଲିସର କହିବା ହେଲା, ଆକ୍ରମଣକାରୀକୁ ଚିହ୍ନଟ କରାଯାଇଛି ଏବଂ ଖୁବଶୀଘ୍ର କାର୍ଯ୍ୟାନୁଷ୍ଠାନ ହେବ ।ସେପଟେ ଗତକାଲି ରାତିରେ ଇଣ୍ଡିଆନ ୟୁଥ କଂଗ୍ରେସ ପକ୍ଷରୁ ଟର୍ଚ୍ଚଲାଇଟ ମାର୍ଚ୍ଚ କରାଯାଇଥିଲା । ଯେଉଁଥିରେ ହଜାର ହଜାର ସଂଖ୍ୟାରେ କର୍ମୀ ଭାଗ ନେଇଥିଲେ । ଦିଲ୍ଲୀ କଂଗ୍ରେସ ସଭାପତି ସୁବାସ ଚୋପ୍ରା କହିଛନ୍ତି, ଏହି ଆକ୍ରମଣ ପାଇଁ ଗୃହମନ୍ତ୍ରୀ ଅମିତ ଶାହା ଇସ୍ତଫା ଦେବା ଦରକାର । ହିଂସାକାଣ୍ଡକୁ ବିରୋଧ କରି ରାସ୍ତାକୁ ଓହ୍ଲାଇଛି ବଲିଉଡ । ଅନୁରାଗ କସ୍ୟପ, ଅନୁଭବ ସିହ୍ନା, ତାପସି ପନୁ, ଜୋୟା ଅଖତର, ଦିୟା ମିର୍ଜା, ରାହୁଲ ବୋଷ ପ୍ରମୁଖ କାର୍ଟର ରୋଡରେ ବିରୋଧ ପ୍ରଦର୍ଶନ କରିଥିଲେ । ସେପଟେ ତୃଣମୂଳ କଂଗ୍ରେସର କିଛି ସାଂସଦ ଜେଏନୟୁ ଆସିଥିଲେ ମଧ୍ୟ ସେମାନଙ୍କୁ ଭିତରେ ପ୍ରବେଶ ଅନୁମତି ମିଳିନଥିଲା ।
ଏପଟେ ଜେଏନୟୁ ହିଂସାକାଣ୍ଡକୁ ବିରୋଧ କରି ପ୍ରତିବାଦ ଚାଲିଥିବା ବେଳେ ମୁମ୍ବାଇର ଗେଟ ୱେ ଇଣ୍ଡିଆ ନିକଟରେ ଏକ ପୋଷ୍ଟରକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଯାଇଛି । ଏହି ପୋଷ୍ଟରରେ ଲେଖାଅଛି ଫ୍ରି କାଶ୍ମୀର । ଜଣେ ଝିଅ ଏହାକୁ ଧରି ପ୍ରତିବାଦ କରୁଛନ୍ତି । ତେବେ ଫ୍ରି କାଶ୍ମୀର ସହିତ ଜେଏନୟୁ ହିଂସାକାଣ୍ଡ ର ସମ୍ପର୍କ କଣ ରହିଛି ବୋଲି ରାଜନେତାଙ୍କ ଠାରୁ ଆରମ୍ଭ କରି ବଲିଉଡ କଳାକାର ପ୍ରଶ୍ନ ଉଠାଇଛନ୍ତି । ଜେଏନୟୁ ହିଂସାକାଣ୍ଡକୁ ବିରୋଧ କରାଯାଉଥିବା କାଶ୍ମୀର ପ୍ରସଙ୍ଗ କୁଆଡୁ ଆସିଲା ବୋଲି ଅନେକ ପଚାରିଛନ୍ତି । ଭେଟେରାନ ଅଭିନେତା ଅନୁପମ ଖେର ମଧ୍ୟ ଟୁଇଟ କରି ଏହି ପ୍ରସଙ୍ଗ ଉଠାଇଛନ୍ତି ।