ପୁରୀ : ସମୁଦ୍ରରେ ଜୀବନ ରକ୍ଷକ ଜେଟସ୍କି, ଅଗ୍ନିଶମ ସେବା ସଂସ୍ଥା ପକ୍ଷରୁ ହେଲା ବ୍ୟବସ୍ଥା
କନକ ବ୍ୟୁରୋ : ପୁରୀ ସମୁଦ୍ରରେ ପହଞ୍ଚିଲା ଜୀବନ ରକ୍ଷକ ଜେଟ୍ସ୍କି । ରାଜ୍ୟରେ ପ୍ରଥମ ଥର ପାଇଁ ଏଭଳି ଏକ ବ୍ୟବସ୍ଥା କରାଯାଇଛି । ସମୁଦ୍ରରେ ସ୍ନାନ ବେଳେ ମୃତାହତଙ୍କ ସଂଖ୍ୟା ଉଦ୍ବେଗଜନକ ହେବାରୁ ଅଗ୍ନିଶମ ସେବା ସଂସ୍ଥା ଏହି ବ୍ୟବସ୍ଥା କରିଛି । ଆଜି ଠାରୁ ଏହା ପୁରୀ ସମୁଦ୍ରରେ କାମ କରିବା ଆରମ୍ଭ କରିଛି। ସମୁଦ୍ର ପାଣିରେ ଏହା ସବୁବେଳେ ପ୍ରସ୍ତୁତ ହୋଇ ରହିବ । ସ୍ନାନ ବେଳେ ବୁଡ଼ିଯାଉଥିବା ପର୍ଯ୍ୟଟକଙ୍କୁ ଏହି ଜେଟସ୍କି ତତକ୍ଷଣାତ୍ ପାଣିରୁ ଉଠାଇ ଆଣି ହେବ । ଫଳରେ ସମୁଦ୍ର ସ୍ନାନ ଜନିତ ମୃତ୍ୟୁ ସଂଖ୍ୟା କମିବ ବୋଲି ଅଗ୍ନିଶମ ସେବା ସଂସ୍ଥା ଡିଜି ବିନୟ ବେହେରା ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବୁଧବାର ଏଠାରେ ଏହି ଅତ୍ୟାଧୁନିକ ବ୍ୟବସ୍ଥାକୁ ଲୋକାର୍ପଣ କରି ଶ୍ରୀ ବେହେରା କହିଛନ୍ତି ଯେ ଏବେ ଏହି ଗୋଟିଏ ଜେଟ୍ ପର୍ଯ୍ୟଟକଙ୍କ ଜୀବନ ରକ୍ଷା କାର୍ଯ୍ୟରେ ନିୟୋଜିତ ହୋଇଥିବା ବେଳେ ଖୁବଶୀଘ୍ର ଆଉ ଗୋଟିଏ ଆସିବାର ଯୋଜନା ରହିଛି । ଏହି ମେସିନ୍ର ବଜାର ଦର ୧୯ ଲକ୍ଷ ଟଙ୍କା ରହିଛି । ରାଜ୍ୟରେ ପ୍ରଥମ ଥର ପାଇଁ ଏହି ବ୍ୟବସ୍ଥା କାର୍ଯ୍ୟକାରୀ ହୋଇଥିବାରୁ ପର୍ଯ୍ୟଟକମାନେ ଏହାକୁ ସ୍ୱାଗତ କରିଛନ୍ତି । କିନ୍ତୁ ସୁଦୀର୍ଘ ସ୍ନାନ ଅଞ୍ଚଳ ପାଇଁ ଗୋଟିଏ ଜେଟ୍ସ୍କି ଯଥେଷ୍ଟ ହେବ ନାହିଁ ବୋଲି ମତପ୍ରକାଶ ପାଇଛି । ଏହି କାର୍ଯ୍ୟକ୍ରମରେ ପୁରୀ ଏସପି ଡା. ସାର୍ଥକ ଷଡ଼ଙ୍ଗୀ, ଆଇଜି ଡା. ସନ୍ତୋଷ ବାଲା, ମୁଖ୍ୟ ଅଗ୍ନିଶମ ଅଧିକାରୀ ସୁକାନ୍ତ ସେଠୀ, ବ୍ରଜେନ୍ଦୁ ଭୁଷଣ ଦାସ, ଅଗ୍ନିଶମ ଅଧିକାରୀ ଭାବଗ୍ରାହୀ ଘଡ଼େଇ ଏବଂ ଡେପୁଟି ଉପ-ଅଗ୍ନିଶମ ଅଧିକାରୀ ବିଚିତ୍ର କୁମାର ପଣ୍ଡା ପ୍ରମୁଖଙ୍କ ଉପସ୍ଥିତ ଥିଲେ ।
ସୂଚାନାଯୋଗ୍ୟ ପୁରୀ ସମୁଦ୍ରରେ ସ୍ନାନ ବେଳେ ଦୁର୍ଘଟଣା ସ୍ଥିତି ଉଦ୍ବେଗଜନକ ରହିଛି । ୨୦୧୭ରେ ଏ ପର୍ଯ୍ୟନ୍ତ ସମୁଦ୍ରରେ ସ୍ନାନ ବେଳେ ୭ଜଣଙ୍କର ମୃତ୍ୟୁ ଘଟିଛି । ପ୍ରତ୍ୟେକ ବର୍ଷ ଡକରା, ଉଦ୍ଧାର ଓ ମୃତ୍ୟୁସଂଖ୍ୟା ଉଦ୍ବେଗ ଜନକ ଭାବରେ ବଢ଼ି ବଢ଼ି ଚାଲିଛି । ଏହି ଜେଟସ୍କିଟି ସମୁଦ୍ରଜଳରେ ଭାସି ସ୍ନାନରତ ପର୍ଯ୍ୟଟକମାନଙ୍କ ଉପରେ କଡ଼ା ନଜର ରଖିବ । ଯଦି ଅଘଟଣ ଘଟିବା ଆଶଙ୍କା ସୃଷ୍ଟି ହୁଏ ତେବେ ଝପଟି ଯାଇ ଉଦ୍ଧାର କରିବ ।