ଅଦିନିଆ ରଥଯାତ୍ରା କରିବନି ଇସ୍କନ : ନଭେମ୍ବର ୧୭ ପରିବର୍ତ୍ତେ ପୁରୀ ବିଧି ଅନୁସାରେ ଆଷାଢ଼ ଦ୍ୱିତୀୟା ତିଥିରେ ରଥଯାତ୍ରା କରିବା ପାଇଁ ରାଜିହେଲେ ଲୁଧିଆନା ଇସ୍କନର କର୍ତ୍ତୃପକ୍ଷ
କନକ ବ୍ୟୁରୋ : ଚାପ ଆଗରେ ନଇଁଲା ଇସ୍କନ । ଆସନ୍ତା ନଭେମ୍ବର ମାସରେ ପଂଜାବର ଲୁଧିଆନାରେ ହେବାକୁ ଥିବା ଅଦିନିଆ ରଥଯାତ୍ରାର ନିଷ୍ପତିରୁ ଓହରିଛି ଇସ୍କନ । ଏନେଇ ଏକ ପ୍ରେସ ବିଜ୍ଞପ୍ତି ସହ ସାମ୍ବାଦିକ ସମ୍ମିଳନୀ ଜରିଆରେ ଜଣାଇଛି ଇସ୍କନ । ଶ୍ରୀଜଗନ୍ନାଥ ସଂସ୍କୃତି ଓ ପରମ୍ପରା ପ୍ରତି ଇସ୍କନର ଗଭୀର ସମ୍ମାନ ରହିଛି । ଏହାକୁ ଅବମାନନା କରିବା କେବେ ବି ଏହି ସଂଗଠନ ଚାହିଁ ନାହିଁ ବୋଲି କୁହାଯାଇଛି । ବରଂ ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ପାଇଁ ସାରା ବିଶ୍ୱରେ ମନ୍ଦିର ସ୍ଥାପନ ସହ ବହୁ ଆଧ୍ୟାତ୍ମିକ କାର୍ଯ୍ୟକ୍ରମମାନ କରାଯାଉଥିବା ଇସ୍କନ କହିଛି । ତେଣୁ ଲୁଧିଆନା ଇସ୍କନ ପକ୍ଷରୁ ଆସନ୍ତା ନଭେମ୍ବର ୧୭ ତାରିଖରେ କରାଯିବାକୁ ଥିବା ରଥଯାତ୍ରାକୁ ବନ୍ଦ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବରଂ ପାରମ୍ପରିକ ଭାବେ ୨୦୨୦ ମସିହା ଆଷାଢ ମାସରେ ନିର୍ଧାରିତ ତିଥିରେ ରଥଯାତ୍ରା ଆୟୋଜିତ ହେବ ବୋଲି କହିଛନ୍ତି ଇସ୍କନ କର୍ତୃପକ୍ଷ । ପୂର୍ବରୁ ଏହି ଅଦିନିଆ ରଥଯାତ୍ରା ପ୍ରସଙ୍ଗକୁ ବିଧାନସଭାରେ ଉଠାଇଥିଲେ ଖଣ୍ଡପଡା ବିଧାୟକ ସୌମ୍ୟରଂଜନ ପଟ୍ଟନାୟକ । ଅନ୍ୟପଟେ ଏହାକୁ ନେଇ ରାଜ୍ୟର ବିଭିନ୍ନ ସ୍ଥାନରେ ଏତଲାମାନ ଦିଆଯାଇଥିଲା । ତେବେ ଏହି ସମସ୍ୟା ଭାବାବେଗ ସହ ଯୋଡା ହୋଇଥିବାରୁ ବୁଝାମଣା ମାଧ୍ୟମରେ ସମଧାନ କରିବାକୁ ଅପିଲ କରିଥିଲେ ସୌମ୍ୟରଂଜନ । ଏପରିକି ପଂଜାବ ମୁଖ୍ୟମନ୍ତ୍ରୀ ଓ ଓଡିଶା ମୁଖ୍ୟମନ୍ତ୍ରୀ ମଧ୍ୟ ଅଦିନିଆ ରଥଯାତ୍ରା ବନ୍ଦ ପାଇଁ ପଦକ୍ଷେପ ନେବାକୁ ସେ ଅନୁରୋଧ କରିଥିଲେ । ଶେଷରେ ଆଜି ସାମ୍ବାଦିକ ସମ୍ମିଳନୀ କରି ଏହି କାର୍ଯ୍ୟକ୍ରମ ବାତିଲ କରିବା ନେଇ ସୂଚନା ଦେଇଛନ୍ତି ଇସ୍କନର ପଦାଧିକାରୀ ।