ମଇଁଷିକୁ ବଂଚାଇବାକୁ ଯାଇ ମହାନଦୀ ପୋଲ ତଳକୁ ଖସି ପଡିଥାଇପାରେ ବସ୍ : ଘଟଣାସ୍ଥଳକୁ ଯାଇ ଅନୁଧ୍ୟାନ ପରେ କହିଲେ ଯାଂଚକାରୀ ଦଳ
ବସରେ ଲାଗିଥିଲା ସ୍ପିଡ କଂଟ୍ରୋଲର,ସଂନ୍ଧ୍ୟା ସୁଦ୍ଧା ଦିଆଯିବ ରିପୋର୍ଟ
କନକ ବ୍ୟୁରୋ : ଦ୍ରୁତ ଗତି ପାଇଁ ନୁହେଁ, ମଇଁଷିକୁ ବଂଚାଇବାକୁ ଯାଇ ମହାନଦୀ ପୋଲ ତଳକୁ ଖସି ପଡିଥାଇପାରେ ବସ୍ । ଘଟଣାସ୍ଥଳକୁ ଯାଇ ଯାଂଚ ପରେ ଏଭଳି ପ୍ରତିକ୍ରିୟା ରଖିଛନ୍ତି ତଦନ୍ତକାରୀ ଦଳ । ଏହା ସହିତ ସେ କହିଛନ୍ତି ବସଟି ୨୦୧୬ର ଓ ଏହି ବସ୍ରେ ସ୍ପିଡ୍ କଂଟ୍ରୋଲର ଲାଗିଥିଲା । ତେଣୁ ଘଂଟାପ୍ରତି ୬୦ କିମିରୁ ଅଧିକ ବେଗରେ ଗାଡି ଚଳାଇଲେ ସେ ଆପେ ଆପେ ବନ୍ଦ ହୋଇଯିବ । ସେହିପରି ଘଂଟାପ୍ରତି ୮୦ କିମିରୁ ଅଧିକ ବେଗରେ ଏହି ଗାଡିକୁ ଚାଳକ ଚଳାଇପାରିବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଏହା ସହିତ ପୁରୁଣା ପୋଲର ଦୁର୍ବଳ ବାଡ ଯୋଗୁଁ ମଧ୍ୟ ବସଟି ତଳକୁ ଖସିପଡିବାର ଆଉ ଏକ କାରଣ ବୋଲି ମଧ୍ୟ କହିଛନ୍ତି ଯାଂଚକାରୀ । ରାଧାକ୍ରିଷ୍ଣନ କମିଟିର ନିର୍ଦ୍ଦେଶ ଆଧାରରେ ଗଠିତ ୩ ଜଣିଆ କମିଟି ଘଟଣାସ୍ଥଳକୁ ଯାଇ ଆଜି ତଦନ୍ତ କରିଛନ୍ତି । ଏଥିରେ ରୋଡ ସେଫଟି ଅଫିସର ଭାବେ ଜୁନିଅର ଏମଭିଆଇ, ଘଟଣାର ତଦନ୍ତ କରୁଥିବା ଜଗତପୁର ଥାନାର ଅଧିକାରୀ ଏବଂ ଏନଏଚଆଇର ଅଧିକାରୀ ସାମିଲ ହୋଇଥିଲେ । ଆଜି ଏହି ଟିମ୍ ମହାନଦୀ ଭିତରକୁ ବୋଟ ଯୋଗେ ଯାଇ ତଦନ୍ତ କରିଛନ୍ତି ।
ଯାନ୍ତ୍ରିକ ତ୍ରୁଟି ପାଇଁ ଏକ ପ୍ରକାର ଦୁର୍ଘଟଣା ଘଟିଛି କି ନାହିଁ, ସେ ସମ୍ପର୍କରେ ଯାଂଚ ଚାଲିଛି । ଏହି କମିଟି ତଦନ୍ତ ରିପୋର୍ଟ ଆରଟିଓଙ୍କ ମାଧ୍ୟମରେ ରୋଡ ଟ୍ରାନ୍ସପୋର୍ଟ ଅଥରିଟିରେ ଥିବା ରୋଡ୍ ସେଫ୍ଟି ସେଲର ଯୁଗ୍ମ କମିସନରଙ୍କ ନିକଟରେ ଦାଖଲ କରିବେ । ମଙ୍ଗଳବାର ଦିନ ସନ୍ଧ୍ୟାରେ ମହାନଦୀ ପୋଲ ଉପରେ ଦୁର୍ଘଟଣାରେ ଜଗନ୍ନାଥ ନାମକ ଏକ ବସ ୩୦ ଫଟ ତଳକୁ ଖସପଡିଥିଲା । ଏଥିରେ ୧୦ ଜଣ ପ୍ରାଣ ହରାଇଥିଲେ ।