କରୋନା ମୁକାବିଲା ପାଇଁ ଦେଶର ଉଦ୍ୟମକୁ ନେଇ ସ୍ୱାସ୍ଥ୍ୟମନ୍ତ୍ରୀଙ୍କ ଦୃଢୋକ୍ତି : ବେନେଟ୍ ୟୁନିଭରସିଟି କନଫରେନ୍ସରେ ହର୍ଷବର୍ଦ୍ଧନ କହିଲେ, କରୋନା ଯୋଗୁଁ ଭାରତରେ ଆସିବ ନାହିଁ ଖରାପ ସ୍ଥିତି . . ସେପଟେ ଗୋଟିଏ ଦିନରେ ଚିହ୍ନଟ ହେଲେ ୭ଶହରୁ ଅଧିକ ନୂଆ ରୋଗୀ
କନକ ବ୍ୟୁରୋ : ଭାରତ ପାଇଁ କରୋନା ଅତି ମାରାତ୍ମକ ପରିସ୍ଥିତି ସୃଷ୍ଟି କରି ନପାରେ । ଏହା କହିଛନ୍ତି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡାକ୍ତର ହର୍ଷବର୍ଦ୍ଧନ । ସେ କହିଛନ୍ତି, ସରକାର କରୋନା ମୁକାବିଲା ପାଇଁ ନେଉଥିବା ପଦକ୍ଷେପ ସଠିକ ଦିଗରେ ରହିଛି । ବେନେଟ୍ ବିଶ୍ୱବିଦ୍ୟାଳୟର ଗ୍ଲୋବାଲ୍ ଅନଲାଇନ୍ କନଫରେନ୍ସରେ ଭାଗ ନେଇ କେନ୍ଦ୍ରମନ୍ତ୍ରୀ ଏହା କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଯେଉଁଭଳି ଭାବରେ ସାରାଦେଶରେ ଯାଂଚ କରାଗଲା, ଗୋଷ୍ଠୀ ଉପରେ ନଜର ରଖାଗଲା, ଆଶା ମାନଙ୍କ ଦକ୍ଷତା ବୃଦ୍ଧି କରାଗଲା ଏବଂ ସ୍ୱାସ୍ଥ୍ୟ ଭିତ୍ତିଭୂମିର ବିକାଶ କରାଗଲା, ଫଳରେ କରୋନା ସଂକ୍ରମଣ ଉପରେ ରୋକ ଲଗାଯାଇ ପାରିଛି । ତେଣୁ ଏହି ମାରାତ୍ମକ ଭୂତାଣୁ ଯୋଗୁଁ ଦେଶରେ ଅତିଖରାପ ସ୍ଥିତି ସୃଷ୍ଟି ହେବା ସମ୍ଭାବନା ନଥିବା କହିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ । ସବୁଠୁ ବଡ କଥା ହେଉଛି ସାରା ଦେଶରେ ଚାଲିଥିବା ଲକ୍ ଡାଉନ୍ ବା ତାଲାବନ୍ଦ ସଫଳ ସାମାଜିକ ଟିକା ଭଳି କାମ କରୁଛି । ଏହାରି ଯୋଗୁଁ କରୋନା ଭୂତାଣୁକୁ ବ୍ୟାପିବାରେ ରୋକ ଲଗାଯାଇ ପାରିଛି ।
ସେପଟେ ଦେଶରେ ତୀବ୍ର ବେଗରେ ବଢିଚାଲିଛି କରୋନା ଆକ୍ରାନ୍ତଙ୍କ ସଂଖ୍ୟା । ଗତକାଲି ଗୋଟିଏ ଦିନରେ ସର୍ବାଧିକ ୭୮୧ ଜଣ ନୂଆ କରୋନା ରୋଗୀ ଚିହ୍ନଟ ହୋଇଛନ୍ତି । ପୂର୍ବରୁ କେବେ ବି ଏତେ ସଂଖ୍ୟାରେ ରୋଗୀ ଗୋଟିଏ ଦିନରେ ଚିହ୍ନଟ ହୋଇ ନଥିଲେ । ଏହା ପୂର୍ବରୁ ବୁଧବାର ଦିନ ୫୯୮ ଜଣ ନୂଆ ରୋଗୀ ଚିହ୍ନଟ ହୋଇଥିଲେ । କିନ୍ତୁ ଗତକାଲି ଏଥିରେ ୩୦ ପ୍ରତିଶତ ବୃଦ୍ଧି ଘଟିଛି । କେବଳ ମହାରାଷ୍ଟ୍ରରେ ୨୨୯ଟି ନୂଆ ରୋଗୀ ଚିହ୍ନଟ ହୋଇଛନ୍ତି । କୌଣସି ରାଜ୍ୟରେ ପ୍ରଥମ ଥର ପାଇଁ ଏତେ ସଂଖ୍ୟକ ରୋଗୀ ଗୋଟିଏ ଦିନରେ ଚିହ୍ନଟ ହୋଇଛନ୍ତି ।
ଏହାଛଡା ତାମିଲନାଡୁରେ ୯୬ ଜଣ, ରାଜସ୍ଥାନରେ ୮୦ ଜଣ, ଗୁଜରାଟରେ ୭୬ ଜଣ ଓ ଦିଲ୍ଲୀରେ ୫୧ ଜଣ ନୂଆ କୋଭିଡ-୧୯ ରୋଗୀ ଚିହ୍ନଟ ହୋଇଛନ୍ତି । କରୋନା ସଂକ୍ରମଣ ଦୃଷ୍ଟିରୁ ଗତକାଲି ଦେଶର ସବୁଠାରୁ ଖରାପ ଦିନ ଥିଲା ବୋଲି କୁହାଯାଇପାରେ । ଗୋଟିଏ ଦିନରେ ୭ଶହରୁ ଅଧିକ ନୂଆ ରୋଗୀ ଚିହ୍ନଟ ହେବା ସାଧାରଣରେ ଚିନ୍ତା ବଢାଇ ଦେଇଛି । ଅନ୍ୟପଟେ ଗତକାଲି ଗୋଟିଏ ଦିନରେ ୩୧ ଜଣ ବ୍ୟକ୍ତି କରୋନା ସଂକ୍ରମଣରୁ ପ୍ରାଣ ହରାଇଛନ୍ତି । ଭାରତ ସରକାରଙ୍କ ସ୍ୱାସ୍ଥ୍ୟ ବିଭାଗ ଅନୁସାରେ ଏଯାଏଁ ୫୮୬୫ ଜଣ କରୋନା ଆକ୍ରାନ୍ତ ଥିବା ବେଳେ ୧୬୯ ଜଣ ଏଥିରେ ପ୍ରାଣ ହରାଇଛନ୍ତି ।