ଭାରତୀୟ ବାୟୁସେନା ଆକ୍ରମଣରେ ୨୫ ଟପ୍ କମାଣ୍ଡର ନିହତ ! ସିସିଏକୁ ଜଣାଇଲେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ
କନକ ବ୍ୟୁରୋ : ପୁଲୱାମା ଆକ୍ରମଣର ପ୍ରତିଶୋଧ ନେଇଛି ଭାରତ । ପାକିସ୍ତାନ ମାଟିରେ ୪୦ କିଲୋମିଟର ଭିତରକୁ ପଶି ଆତଙ୍କବାଦୀ ଶିବିରକୁ ମାଟିରେ ମିଶାଇ ଦେଇଛି ଭାରତୀୟ ବାୟୁ ସେନା । ଏହି ଆକ୍ରମଣରେ ଜୈଶ-ଏ-ମହମ୍ମଦ ଆତଙ୍କବାଦୀ ସଂଗଠନ ଆତଙ୍କବାଦୀ ଶିବିରକୁ ଧ୍ୱଂସ କରିବା ସହ ୨୫ଜଣ କୁଖ୍ୟାତ ଆତଙ୍କବାଦୀକୁ ନିପାତ କରିଛି ଭାରତୀୟ ବାୟୁ ସେନା । ଏନେଇ କ୍ୟାବିନେଟ୍ ସୁରକ୍ଷା କମିଟିକୁ ସୂଚନା ଦେଇଛନ୍ତି ଜାତୀୟ ସୁରକ୍ଷା ପରାମର୍ଶ ଦାତା ଅଜିତ୍ ଡୋଭାଲ । ନିହତ ହୋଇଥିବା ଆତଙ୍କବାଦୀଙ୍କ ଭିତରେ ଜୈସ ମୁଖିଆ ମାସୁଦର ଭାଇ ଓ ନିକଟତମ ସମ୍ପର୍କୀୟ ଥିବା ଜଣାପଡିଛି । ନିହତ ହୋଇଥବା ୨୫ଜଣ ଆତଙ୍କବାଦୀ ଭାରତର ମୋଷ୍ଟ ୱାଣ୍ଟେଡ଼୍ ତାଲିକାରେ ରହିଥିଲେ । ଏମାନଙ୍କ ମଧ୍ୟରୁ କେତେଜଣ ୧୯୯୯ କାନ୍ଦହାର ବିମାନ ଅପହରଣ ମାମଲାରେ ସମ୍ପୃକ୍ତ ଥିଲେ । କୁହାଯାଉଛି ଏହି ଆକ୍ରମଣ ଦ୍ୱାରା ଜୈସ-ଏ-ମହମ୍ମଦ ଆତଙ୍କବାଦୀ ସଂଗଠନର ସବୁଠାରୁ ବଡ କ୍ୟାମ୍ପକୁ ଧ୍ୱଂସ କରି ଦେଇଛି ଭାରତୀୟ ସେନା ।
Kanak News is now on WhatsApp
Join and get latest news updates delivered to you via WhatsApp
ଗତ ୧୪ତାରିଖରେ କଶ୍ମୀରର ଅବନ୍ତିପୁରାରେ ସିଆରପିଏଫ ଯବାନଙ୍କ ଉପରେ ଆତଙ୍କବାଦୀଙ୍କ ଆକ୍ରମଣ ପରେ ଦେଶବ୍ୟାପି ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଆଉ ଏକ ସ୍ୱରରେ ଏହି ଆକ୍ରମଣ ପାଇଁ ସମସ୍ତେ ପାକିସ୍ତାନକୁ ଦାୟୀ କରିଥିଲେ । ଆତଙ୍କବାଦୀଙ୍କୁ ପ୍ରଶୟ ଦେଉଥିବା ପାକିସ୍ତାନ ବିରୋଧରେ କଡା କାର୍ଯ୍ୟାନୁଷ୍ଠାନ ନେବା ପାଇଁ ଦଳ ବଳ ନିର୍ବିଶେଷରେ ମତ ପ୍ରକାଶ ପାଇଥିଲା । ଆଉ ଦେଶର ଜନତାଙ୍କ ଆକ୍ରୋଶକୁ ଦେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେନାକୁ କାର୍ଯ୍ୟାନୁଷ୍ଠାନ ପାଇଁ ପୂର୍ଣ୍ଣ ସ୍ୱାଧୀନତା ଦେଇଥିଲେ । ସେନା ସୁବିଧା ସୁଯୋଗ ଦେଖି ଜବାବ ଦେବ ବୋଲି ଦେଶବାସୀଙ୍କୁ ପ୍ରତିଶ୍ରୁତି ଦେଇଥିଲେ ପ୍ରଧାନମନ୍ତ୍ରୀ । ସେପଟେ ଏହି ଆକ୍ରମଣ ପରେ ପାକିସ୍ତାନରେ ହଲଚଲ ସୃଷ୍ଟି ହୋଇଛି ।