ମିଗ-୨୭ର ଭାବୁକ ବିଦାୟ : ଯୋଧପୁର ଏୟାରବେସରୁ ଶେଷ ଉଡାଣ ଭରିଲା ବାୟୁସେନା ଯୁଦ୍ଧ ବିମାନ
କନକ ବ୍ୟୁରୋ : ଅବସର ନେଲା ବାୟୁସେନାରୁ ଲଢୁଆ ଯୁଦ୍ଧ ବିମାନ ମିଗ୍-୨୭ । କାରଗିଲ୍ ଯୁଦ୍ଧର ହିରୋ ଓ ଭାରତର ବାହାଦୁର’ ଭାବେ ପରିଚିତ ‘ମିଗ୍ – ୨୭’ ଲଢ଼ୁଆ ଯୁଦ୍ଧ ବିମାନ ଆଜି ରାଜସ୍ଥାନର ଯୋଧପୁରର ଏୟାର ଫୋର୍ସ ଷ୍ଟେସନରେ ଭରିଛି ଶେଷ ଉଡାଣ । ଏହି ଅବସରରେ ବାୟୁସେନା ଦେଇଛି ଶେଷ ବିଦାୟ । ମିଗ୍ ୨୭କୁ ବିଦାୟ ଦେବା ଅବସରରେ ଭବ୍ୟ ପରେଡ ପ୍ରଦର୍ଶନ କରିଛନ୍ତି ବାୟୁସେନାର ଯବାନ ।
Kanak News is now on WhatsApp
Join and get latest news updates delivered to you via WhatsApp
୧୯୮୧ ମସିହାରେ ପ୍ରଥମ କରି ଭାରତୀୟ ବାୟୁସେନାରେ ସାମିଲ ହୋଇଥିଲା ଶକ୍ତିଶାଳୀ ମିଗ୍ ୨୭ ଲଢୁଆ ଯୁଦ୍ଧ ବିମାନ । ୪ ଦଶନ୍ଧି ଧରି ଭାରତୀୟ ପ୍ରତିରକ୍ଷା ବିଭାଗକୁ ମିଗ୍ ଦେଇଛି ଅନେକ ରୋମାଞ୍ଚଭରା କ୍ଷଣ । ବିଶେଷ କରି କାରଗିଲ ଯୁଦ୍ଧ ସମୟରେ ବାହାଦୁର ନିଭାଇଥିଲା ବଡ ଭୂମିକା । ଏହା ବଳରେ ଭାରତୀୟ ବାୟୁସେନା ତାର ଶକ୍ତି ବଳରେ ପାକିସ୍ତାନକୁ ଧୂଳି ଚଟେଇଥିଲା । ଆଜି ଏହାକୁ ଡି-କମିସନ୍ ଅର୍ଥାତ ସେବାନିବୃତ କରାଯାଇଛି ।
ଶେଷ ଉଡ଼ାଣ ସହ ଭାରତୀୟ ବାୟୁସେନାରୁ ଅବସର ଗ୍ରହଣ କରିଛି ‘ବାହାଦୁର’ ନାମରେ ପରିଚିତ ଥିବା ଯୁଦ୍ଧ ବିମାନ । ଅର୍ଥାତ୍ ଆଗକୁ ଆଉ କେବେ ଭାରତୀୟ ଆକାଶରେ ଦେଖିବାକୁ ମିଳିବ ନାହିଁ ଏହି ଯୁଦ୍ଧ ବିମାନକୁ । ଗୌରବମୟ ୪ ଦଶନ୍ଧୀ ପରେ ଏହାକୁ ଅବସର ଦେବାକୁ ଗତ ୪ ବର୍ଷ ଧରି ପ୍ରସ୍ତୁତି ଚଳାଇଥିଲା ବାୟୁସେନା । ଯୋଧପୁର ବାୟୁସେନା ଘାଟିରେ ମିଗ୍-୨୭ର ଶେଷ ସ୍କ୍ୱାଡ୍ରନର ୭ଟି ବିମାନକୁ ଆଜି ସେବାନିବୃତ କରାଯାଇଛି । ଏହା ସହିତ ସାରା ବିଶ୍ୱରେ ଏହି ବିମାନ ଏବେ ଇତିହାସ ପାଲଟିଯାଇଛି । କାରଣ ଅନ୍ୟ କୌଣସି ଦେଶରେ ବର୍ତମାନ ଏହି ଯୁଦ୍ଧ ବିମାନ ଆଉ ସେବାରେ ନାହିଁ ।