ଏକବିଂଶ ଶତାବ୍ଦୀରେ ବି ଯାଉନି ଅନ୍ଧବିଶ୍ୱାସ : ଅନୁଗୁଳ ନତଡା ଗାଁରେ କୁଆଡେ ମହିଳାଙ୍କ ଦେହକୁ ଆସିଯାଉଛି ମୃତ ଯୁବକର ଆତ୍ମା, ହତ୍ୟାକାଣ୍ଡର କାହାଣୀ କହୁଛି
କନକ ବ୍ୟୁରୋ : ଏକବିଂଶ ଶତାଦ୍ଦୀରେ ବି ଯାଉନି ଅନ୍ଧବିଶ୍ୱାସ । କାନ୍ଦୁଛି ଅତୃପ୍ତ ଆତ୍ମା । ଅନୁଗୁଳ ନତଡା ଗାଁରେ କୁଆଡେ ମହିଳାଙ୍କ ଦେହକୁ ଆସିଯାଉଛି ମୃତ ଯୁବକର ଆତ୍ମା । କାନ୍ଦି କାନ୍ଦି କହୁଛି, କେମିତି କରାଯାଇଥିଲା ତାକୁ ହତ୍ୟା । ଘଟଣାକୁ ଗ୍ରାମବାସୀ ଓ ମୃତ ଯୁବକଙ୍କ ପରିବାର ଲୋକ ବିଶ୍ୱାସ କରୁଥିବା ବେଳେ ବୁଦ୍ଧିଜୀବୀ କହୁଛନ୍ତି ଏହା ଅନ୍ଧବିଶ୍ୱାସ । ଆଉ ଏହି ବିଶ୍ୱାସ-ଅବିଶ୍ୱସର ଦୋଛକିରେ ଗାଁରେ ପହଂଚି ସ୍ଥିତି ସମୀକ୍ଷା କରିଛି କନକ ନ୍ୟୁଜ ।
Kanak News is now on WhatsApp
Join and get latest news updates delivered to you via WhatsApp
ମୃତ ବ୍ୟକ୍ତି ଉଠିଆସିବ, ଆଉ ସେ କେମିତି ମଲା ସେ କଥା ସମସ୍ତଙ୍କୁ କହି ବୁଲିବ ଏହା ଅସମ୍ଭବ । କିନ୍ତୁ ଲୋକମତରେ ଗୋଟିଏ ଧାରଣା ଅଛି, ଆତ୍ମା ଅମର । ଏହି ଧାରଣା ଗରିବ, ଅଶିକ୍ଷିତ, ଅସହାୟ ଓ ପଛୁଆ ଲୋକଙ୍କ ଭିତରେ ଅନ୍ଧବିଶ୍ୱାସ ଆକାରରେ ଘର କରି ରହିଛି । ଏପରି ଘଟଣା ଅନୁଗୁଳରେ ଦେଖିବାକୁ ମିଳିଛି । ଜଣେ ମହିଳା ଖୁବ ଅସ୍ୱାଭାବିକ ଆଚରଣ କରୁଛନ୍ତି । ଚୁଟି ସବୁ ମୁକୁଳା, ଇଆଡୁ ସିଆଡୁ ଗପୁଛନ୍ତି । ସ୍ଥାନୀୟ ଲୋକେ କହୁଛନ୍ତି ତାଙ୍କ ଦେହରେ ଭୂତ ଲାଗିବା ପରେ ସେ ଏମିତି ଅସ୍ୱାଭାବିକ ବ୍ୟବହାର କରୁଛନ୍ତି । ମହିଳା ଜଣଙ୍କ କହୁଛନ୍ତି, ତାଙ୍କୁ ମାରି ଦିଆଯାଇଛି । ମାରିବା ପରେ ଏକ ପରିତ୍ୟକ୍ତ ପାଇଖାନାରେ ରଖିବା ସହ କୂଅକୁ ଫିଙ୍ଗି ଦିଆଯାଇଛି । ତାଙ୍କୁ ନ୍ୟାୟ ଦରକାର । ଲୋକ କହୁଛନ୍ତି ମହିଳାଙ୍କ ଦେହରେ ଜଣେ ଯୁବକଙ୍କ ଭୂତ ଲାଗିଛି ଆଉ ସେ ନିଜ ମୃତ୍ୟୁ କାହାଣୀ କହୁଛି । ମହିଳାଙ୍କ କଥାକୁ ବିଶ୍ୱାସ କରି ମୃତ ଯୁବତଙ୍କୁ ନ୍ୟାୟ ଦେବା ପାଇଁ ଦାବି ହେଉଛି ।
ମହିଳାଙ୍କ ଦେହରେ ଭୂତ ସବାର ହେଉଥିବା ଖବର ଚାରିଆଡେ ଚର୍ଚ୍ଚା ହେବା ପରେ ଘଟଣାର ସତ୍ୟାସତ୍ୟ ଜାଣିବା ପାଇଁ ରାତି ପ୍ରାୟ ଗୋଟାଏରେ ଅନୁଗୁଳ ଥାନା ନତଡା ଗାଁରେ ପହଂଚିଥିଲେ କନକ ନ୍ୟୁଜ୍ ପ୍ରତିନିଧି ପ୍ରକାଶ ପ୍ରଧାନ । ଗାଁରେ ପହଂଚିବା ପରେ ଆମ ପ୍ରତିନିଧି ଜାଣିବାକୁ ପାଇଲେ, ଗତ ସେପଟେମ୍ବର ୧୮ ତାରିଖରେ ନତଡା ଗାଁର ଯୁବକ ପଂଚାନନ ଖଟୁଆଙ୍କ ମୃତ୍ୟୁ ହୋଇଥିଲା । ତାଙ୍କ ମୃତଦେହ ପଡୋଶୀଙ୍କ କୁଅରୁ ଉଦ୍ଧାର କରାଯାଇଥିଲା । ୨ ଦିନ ପୂର୍ବରୁ ସେ ନିଖୋଜ ଥିଲେ । ଆଉ ଅଚାନକ ତାଙ୍କ ମୃତ୍ୟୁକୁ ନେଇ ପରିବାର ଲୋକେ ହତବାଗ ହୋଇଯାଇଥିଲେ । ସବୁଠୁ ବଡ଼ କଥା ହେଉଛି, ଏବେ କୁଆଡେ ପଂଚାନନଙ୍କ ଭୂତ ଗାଁର ୪ ଜଣ ମହିଳାଙ୍କୁ ଜଣକ ପରେ ଜଣକୁ ଲାଗୁଛି ଏବଂ ହତ୍ୟାର କାହାଣୀ କହୁଛି । ଏକବିଂଶ ଶତାଦ୍ଦୀରେ ଏଭଳି ଅନ୍ଧବିଶ୍ୱାସକୁ ନେଇ ସାରା ଅନୁଗୁଳ ଜିଲ୍ଲାର ଚହଳ ପଡିଛି ।