ସକାଳେ ବ୍ୟାଙ୍କ ମ୍ୟାନେଜର ଦାୟିତ୍ୱ ନେବାକୁ ଘରୁ ବାହାରିଲେ : ସନ୍ଧ୍ୟାରେ ଆସିଲା ମୃତ୍ୟୁର ଖବର, ସଡକ ଦୁର୍ଘଟଣାରେ ଚାଲିଗଲା ଗଂଜାମ ସୋନାପୁର ୟୁଜିବିର ମ୍ୟାନେଜର ଭଗବାନ ସାହୁଙ୍କ ଜୀବନ
କନକ ବ୍ୟୁରୋ : ଗଞ୍ଜାମ ଜିଲ୍ଲାରୁ ଏପରି ଏକ ଦୁର୍ଘଟଣାର ଖବର ଆସିଛି, ଯାହା ଆପଣଙ୍କୁ ବିଚଳିତ କରିଦେବ । ବ୍ୟାଙ୍କ ମ୍ୟାନେଜର ଭାବେ ଦାୟତ୍ୱ ନେବାକୁ ସକାଳୁ ସକାଳୁ ଘରୁ ବାହାରି ଆସିଲେ । ହେଲେ ରାତିରେ ଆଉ ଘରକୁ ଫେରିଲେ ନାହିଁ । ଫେରିଲା ତାଙ୍କର ମୃତଦେହ । ଶନବାର ସଂଧ୍ୟାରେ ବ୍ରହ୍ମପୁର ଉପକଣ୍ଠ ଗୋଳନ୍ଥରା ଥାନା ନିକଟ ଜାତୀୟ ରାଜପଥରେ ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି ସୋନପୁର ଉତ୍କଳ ଗ୍ରାମ୍ୟ ବ୍ୟାଙ୍କର ମ୍ୟାନେଜର ଭଗବାନ ସାହୁ ।
Kanak News is now on WhatsApp
Join and get latest news updates delivered to you via WhatsApp
ଶନିବାର ଦିନ ଗଞ୍ଜାମ ଜିଲ୍ଲାର ସୋନାପୁର ଉକ୍ରଳ ଗ୍ରାମ୍ୟ ବ୍ୟାଙ୍କ ମ୍ୟାନେଜର ଭାବେ ଦାୟିତ୍ୱ ନେଇଥିଲେ ଭଗବାନ ସାହୁ । ଏହି ବ୍ୟାଙ୍କର ମ୍ୟାନେଜର ପଦବୀରୁ ଅବସର ନେଇଥିଲେ ମହେନ୍ଦ୍ର ତ୍ରିପାଠୀ । ମହେନ୍ଦ୍ରଙ୍କୁ ବିଦାୟୀ ସମ୍ବର୍ଦ୍ଧନା ଓ ଭଗବାନଙ୍କୁ ସ୍ୱାଗତ ସମ୍ବର୍ଦ୍ଧନାରେ ଉତ୍ସବ ମୁଖର ହୋଇ ପଡ଼ିଥିଲା ବ୍ୟାଙ୍କ ପରିସର । ହେଲେ ସଂଧ୍ୟା ବେଳେ ଏପରି ଖବର ଆସିଥିଲା, ଯାହା ସମସ୍ତଙ୍କ ଆଖିରେ ଲୁହ ଭରି ଦେଇଥିଲା ।
ନୂଆ ଦାୟିତ୍ୱ ନେବା ପରେ ସଂଧ୍ୟାରେ ଅବସରପ୍ରାପ୍ତ ବ୍ୟାଙ୍କ ମ୍ୟାନେଜର ମହେନ୍ଦ୍ର ତ୍ରିପାଠୀଙ୍କ ସହ ଗୋଟିଏ ବାଇକରେ ବ୍ରହ୍ମପୁର ଅଭିମୁଖେ ଘରକୁ ବାହାରିଥିଲେ ଭଗବାନ । ହେଲେ ବିଧି ବିଧାନ ଥିଲା ଅଲଗା । ଗୋଳନ୍ଥରା ଥାନା ନିକଟ ୧୬ ନମ୍ବର ଜାତୀୟ ରାଜପଥ ଉପରେ ବାଇକକୁ ଧକ୍କା ଦେଇଥିଲା ଟ୍ରକ । ବାଇକ୍ ଚଳାଉଥିବା ମହେନ୍ଦ୍ର ତ୍ରିପାଠୀ ରାସ୍ତାର ଅପର ପାଶ୍ୱର୍ରେ ଛିଟିକି ପଡ଼ିଥିବା ବେଳେ ରାସ୍ତା ଉପରେ ପଡିଥିଲେ ଭଗବାନ ସାହୁ । ଦ୍ରୁତ ଗତିରେ ଆସୁଥିବା ଟ୍ରକ, ଭଗବାନଙ୍କ ଉପରେ ଚଢ଼ି ଯାଇଥିଲା । ଘଟଣା ସ୍ଥଳରେ ହିଁ ସେ ପ୍ରାଣ ହରାଇଥିଲେ । ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲା ଗୋଳନ୍ଥରା ପୋଲିସ ।
ମୃତ ଭଗବାନ ସାହୁ ଦୀର୍ଘଦିନ ଧରି ବ୍ରହ୍ମପୁର ବିଏମସି ପରିସରରେ ଥିବା ଉତ୍କଳ ଗ୍ରାମ୍ୟ ବ୍ୟାଙ୍କରେ କାର୍ଯ୍ୟରତ ଥିଲେ । ଶନିବାର ଦିନ ସକାଳେ ବ୍ରହ୍ମପୁର ଖୋଡ଼ାସିଙ୍ଗି ବାଂଛାନିଧି ନଗର ସ୍ଥିତ ବାସଭବନରୁ ନୂଆ କର୍ମକ୍ଷେତ୍ରକୁ ବାହାରିଥିଲେ । ଘରୁ ବାହାରିବା ବେଳେ ସ୍ତ୍ରୀଙ୍କୁ କହିଥିଲେ, ଆଉ ଦୁଇ ବର୍ଷ ଏହି ନୂଆ ଦାୟିତ୍ୱ ତୁଲାଇବେ । କିନ୍ତୁ କେହି ଭାବିନଥିଲେ, ଏହି କେଇ ପଦ କଥା ତାଙ୍କ ଜୀବନର ଶେଷ କଥା ହୋଇଯିବ ବୋଲି ।