ନିର୍ବାଚନୀ ସତ୍ୟପାଠ ନେଇ ଅଡୁଆରେ ସାଂସଦ ବୈଜୟନ୍ତ ପଣ୍ଡା ! ଥାନାରେ ମାମଲା ରୁଜୁ କରି ତଦନ୍ତ ପାଇଁ ନିର୍ଦ୍ଦେଶ ଦେଲେ କୋର୍ଟ
କନକ ବ୍ୟୁରୋ : ଅଡୁଆରେ ପଡିଯାଇଛନ୍ତି କେନ୍ଦ୍ରାପଡା ସାଂସଦ ବୈଜୟନ୍ତ ପଣ୍ଡା । ୨୦୧୪ ନିର୍ବାଚନରେ ମିଥ୍ୟା ସତ୍ୟପାଠ ଅଭିଯୋଗ ମାମଲାରେ କୋର୍ଟ ତାଙ୍କ ବିରୋଧରେ ମାମଲା ରୁଜୁ ପାଇଁ ନିର୍ଦ୍ଦେଶ ଦେଇଛନ୍ତି । କୋର୍ଟ କହିଛନ୍ତି, ସାଂସଦ ପଣ୍ଡାଙ୍କ ବିରୋଧରେ ଯେଉଁ ଅଭିଯୋଗ ଆସିଛି ତାହାର ତଦନ୍ତ ହେବା ଦରକାର । ଜୁଲାଇ ୨୫ ତାରିଖ ସୁଦ୍ଧା ତଦନ୍ତ କରି ରିପୋର୍ଟ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ସେପଟେ ବୈଜୟନ୍ତଙ୍କ କାର୍ଯ୍ୟାଳୟ କହିଛି, ଆଇନ୍ ତା ବାଟରେ ଯିବ ଏବଂ ସତ୍ୟର ଜୟ ହେବ ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ରାଜନୀତିରେ ଚହଳ ସୃଷ୍ଟିକରି ବେଶ ଚର୍ଚ୍ଚାକୁ ଆସିଥିବା ବୈଜୟନ୍ତ ପଣ୍ଡା, ଏବେ ଅଡୁଆ ଜାଲରେ ଛନ୍ଦି ହୋଇଯାଇଛନ୍ତି । ଗତ ସାଧାରଣ ନିର୍ବାଚନରେ ନିର୍ବାଚନ କମିଶନଙ୍କ ନିକଟରେ ମିଛ ତଥ୍ୟ ଦେଇଥିବା ଅଭିଯୋଗରେ ଏବେ କାଠଗଡ଼ାକୁ ଆସିଯାଇଛନ୍ତି ସାଂସଦ । କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡାଙ୍କ ବିରୋଧରେ ଆସିଥିବା ମାମଲାକୁ ଗ୍ରହଣ କରି ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ରାପଡ଼ା ଏସଡିଜେଏମ୍ କୋର୍ଟ । ଏହି ମାମଲାରେ ପୁଲିସକୁ ତଦନ୍ତ ନିର୍ଦ୍ଦେଶ ଦେବା ସହ ଆସନ୍ତା ଜୁଲାଇ ୨୫ ତାରିଖ ସୁଦ୍ଧା ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ ।
ଜନପ୍ରତିନିଧି ଆଇନ୍ ୧୨୫(ଏ) ଧାରାରେ, ନିର୍ବାଚନୀ ସତ୍ୟପାଠରେ ତଥ୍ୟ ଲୁଚାଇଥିବା ଅଭିଯୋଗ କରି ଏହି ମାମଲା ଦାଏର ହୋଇଛି । ଅବେନଦକାରୀଙ୍କ ଅଭିଯୋଗ ଅନୁସାରେ- ବୈଜୟନ୍ତ ପଣ୍ଡା ଇମ୍ଫାର ଉପାଧ୍ୟକ୍ଷ ଥାଇ ଦରମା ଆକାରରେ କୋଟି କୋଟି କଂପାନୀରୁ ଗ୍ରହଣ କରିଛନ୍ତି । ଯାହା ୨୦୧୪ ନିର୍ବାଚନୀ ସତ୍ୟପାଠରେ ଉଲ୍ଲେଖ କରିନଥିଲେ ।
ଏସଡିଜେମ୍ କୋର୍ଟରେ ମାମଲା ନମ୍ବର ୨୬୦/୨୦୧୮ରେ ମାମଲା ଦାଏର ହୋଇଥିବା ବେଳେ ସାଂସଦଙ୍କ ବିରୋଧରେ ଆଇପିସିର ୪୧୫ରୁ ୪୨୦ ଧାରାରେ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । କୋର୍ଟ କହିଛନ୍ତି-ଆଇନ ଅନୁଯାଇ ଏହା ଅନୁସନ୍ଧାନ ଯୋଗ୍ୟ ଏବଂ ପୁଲିସ୍ ଏହାର ତଦନ୍ତ କରିବା ଦରକାର । ଆବେଦନକୁ ଟାଉନ୍ ଥାନା ପଠାଇବାକୁ ଆଦେଶ ଦେଇ କୋର୍ଟ ମାମଲା ରୁଜୁ କରି ତଦନ୍ତ ଆଗକୁ ବଢ଼ାଇବାକୁ ନିର୍ଦ୍ଦେଶ ଦେଇଛନ୍ତି ।
ସେପଟେ ସାଂସଦ ବୈଜୟନ୍ତ ପଣ୍ଡାଙ୍କ କାର୍ଯ୍ୟାଳୟ କୋର୍ଟଙ୍କ ନିର୍ଦ୍ଦେଶ ପରେ ପ୍ରତିକ୍ରିୟା ରଖିଛି । ତାଙ୍କର ରାଜନୈତିକ ସଚିବ କହିଛନ୍ତି-ଏହି ମାମଲାରେ ଆଇନ ତା’ ବାଟରେ ଯିବ ଏବଂ ସତ୍ୟର ଜୟ ହେବ । ତେବେ ଏନେଇ ସାଂସଦ ବୈଜୟନ୍ତ ପଣ୍ଡାଙ୍କ କାର୍ଯ୍ୟାଳୟ ପକ୍ଷରୁ ଅଭିଯୋଗକୁ ଖଣ୍ଡନ କରାଯାଇଛି । କୁହାଯାଇଛି-ଏହି ମାମଲାରେ ଆଇନ ତା’ ବାଟରେ ଯିବ ଏବଂ ସତ୍ୟର ଜୟ ହେବ ।
୨୦୧୪ ନିର୍ବାଚନ ସମୟରେ ଦେଇଥିବା ନିର୍ବାଚନୀ ସତ୍ୟପାଠରେ ସାଂସଦ ତଥ୍ୟ ଲୁଚାଇବା ନେଇ ଅଭିଯୋଗ ଆଣି, ମାମଲା ଦାଏର୍ କରିଛନ୍ତି ଉଦିତନଗର ଅଂଚଳର ଦିଲ୍ଲୀପ ନାୟକ । ଯାହା ବିଜେଡିରୁ ନିଲମ୍ବିତ କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡାଙ୍କୁ ଏକ ପ୍ରକାର ଅଡୁଆ ସ୍ଥିତିରେ ପକାଇ ଦେଇଛି ।