ଦିଲ୍ଲୀ ବ୍ଲାଷ୍ଟ ପଛରେ ରହିଛି କି ପାକିସ୍ତାନର ହାତ ? ଗିରଫ ଶାହୀନ ଶାହିଦ୍‌ଙ୍କ ଅଛି ମସୁଦ ଅଜହରର ଭଉଣୀ ସହ ଲିଙ୍କ୍

କନକ ବ୍ୟୁରୋ : ଲାଲ୍ କିଲ୍ଲା ନିକଟରେ ହୋଇଥିବା କାର ବିସ୍ଫୋରଣ ସାରା ଦେଶକୁ ଦୋହଲାଇ ଦେଇଛି । ପ୍ରାୟ ୧୪ ବର୍ଷ ପରେ ଦେଶର ରାଜଧାନୀରେ ଏଭଳି ବିସ୍ଫୋରଣ ଘଟିଛି । ବିସ୍ଫୋରଣ ଖବର ସାମ୍ନାକୁ ଆସିବା ପରେ ଦିଲ୍ଲୀ ପୁଲିସ ସହ କେନ୍ଦ୍ରୀୟ ଏଜେନ୍ସିଗୁଡ଼ିକ ସତର୍କ ହୋଇଯାଇଥିଲେ । ତଦନ୍ତ ଜାରି ରହିଛି, ସିସିଟିଭି ଫୁଟେଜ୍ ଯାଞ୍ଚ କରାଯାଉଛି । ଏହି ବିସ୍ଫୋରଣରେ ଏପର୍ଯ୍ୟନ୍ତ ୧୨ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି । ଏହି ବିସ୍ଫୋରଣର ପାକିସ୍ତାନ ସହିତ ଆତଙ୍କବାଦୀ ସମ୍ପର୍କ ଥିବା ଜଣାପଡ଼ିଛି । ଏହା ଫରିଦାବାଦ ଆତଙ୍କବାଦୀ ମଡ୍ୟୁଲ୍ ସହିତ ମଧ୍ୟ ଜଡିତ, ଯେଉଁଥିରେ ବିସ୍ଫୋରଣ ପୂର୍ବରୁ ତିନି ଡାକ୍ତରଙ୍କ ସମେତ ୭ ଜଣ ସନ୍ଦିଗ୍ଧଙ୍କୁ ଗିରଫ କରାଯାଇଥିଲା । ଏଥିରେ ମହିଳା ଡାକ୍ତର ଶାହୀନ ଶାହିଦ୍ ମଧ୍ୟ ସାମିଲ୍ ଅଛନ୍ତି, ଯାହାଙ୍କର ଆତଙ୍କବାଦୀ ସଂଗଠନ ଜୈଶ ସହିତ ସମ୍ପର୍କ ଥିବା ଜଣାପଡ଼ିଛି ।

ଗିରଫ ଲେଡି ଡାକ୍ତର ଶାହୀନଙ୍କ ଜୈଶ ସହିତ ସିଧାସଳଖ ସମ୍ପର୍କ ଥିବା ଜଣାପଡ଼ିଛି । ଦାବି କରାଯାଉଛି ଯେ ଲେଡି ଡାକ୍ତର ଶାହୀନ ଜୈଶର ମହିଳା ୱିଙ୍ଗ ଜମାତ ଉଲ ମୋମିନାତର ଭାରତ ମୁଖ୍ୟ ଭାବରେ କାର୍ଯ୍ୟ କରୁଥିଲେ । ତାଙ୍କର ଲକ୍ଷ୍ୟ ଥିଲା ଭାରତରେ ଅଧିକରୁ ଅଧିକ ମହିଳାଙ୍କୁ ଆତଙ୍କବାଦୀ ଗୋଷ୍ଠୀରେ ସାମିଲ୍ କରିବା । ତେବେ, ଡାକ୍ତର ଶାହୀନଙ୍କ ଗିରଫଦାରୀରେ ଏକ ବଡ଼ ଷଡ଼୍‌ଯନ୍ତ୍ରର ପର୍ଦ୍ଦାଫାଶ ହେବାର ଆଶଙ୍କା କରାଯାଉଛି । ଶାହୀନ ଲକ୍ଷ୍ନୌର ବାସିନ୍ଦା ବୋଲି ଜଣାପଡ଼ିଛି । କାଶ୍ମୀର, ହରିୟାଣା ଏବଂ ଉତ୍ତର ପ୍ରଦେଶରେ ବ୍ୟାପିଥିବା ଆତଙ୍କବାଦୀ ମଡ୍ୟୁଲରେ ସନ୍ଦିଗ୍ଧ ଭୂମିକା ପାଇଁ ତାଙ୍କୁ ଗିରଫ କରାଯାଇଥିଲା । ଅଧିକାରୀମାନେ କହିଛନ୍ତି ଯେ ଗିରଫ ମହିଳା ଡାକ୍ତରଙ୍କ କାରରୁ ଏକ ଏକେ-୪୭ ରାଇଫଲ୍ ମଧ୍ୟ ଜବତ କରାଯାଇଛି । ସେ ଯେଉଁଠାକୁ ଯାଉଥିଲେ କାରରେ ଗୋଟିଏ ଏକେ-୪୭ ନେଇ ଯାଉଥିଲେ ।

ଅଧିକ ପଢ଼ନ୍ତୁ--ମନେପଡ଼େ ୨୦୦୮ ଆକ୍ରମଣ, ଏମିତି ବିସ୍ଫୋରଣ ଘଟାଇଥିଲେ ଆତଙ୍କୀ

ଡାକ୍ତର ଶାହୀନ ଏକା ନୁହଁନ୍ତି, ତାଙ୍କ ସହ ଅନ୍ୟ ସାତ ଜଣଙ୍କୁ ବିଭିନ୍ନ ଅଞ୍ଚଳରୁ ଗିରଫ କରାଯାଇଛି। ଅଧିକାରୀମାନେ କହିଛନ୍ତି ଯେ ଏଥିରେ ଫରିଦାବାଦରେ ରହୁଥିବା କାଶ୍ମୀରର ଡାକ୍ତର ମୁଜାମ୍ମିଲ ଗନି ମଧ୍ୟ ସାମିଲ୍ ଅଛନ୍ତି । ଏହି କାର୍ଯ୍ୟାନୁଷ୍ଠାନରେ ୨୯୦୦ କିଲୋଗ୍ରାମ ବିସ୍ଫୋରକ ଜବତ କରାଯାଇଛି । ଅଧିକାରୀମାନେ କହିଛନ୍ତି ଯେ ଜମ୍ମୁ କାଶ୍ମୀର, ଉତ୍ତର ପ୍ରଦେଶ ଏବଂ ହରିୟାଣାର ପୁଲିସ ବାହିନୀ ସହିତ କେନ୍ଦ୍ରୀୟ ଏଜେନ୍ସିଗୁଡ଼ିକର ମିଳିତ ଅଭିଯାନରେ ଏକ ବଡ଼ ସଫଳତା ମିଳିଛି । ଲେଡି ଡାକ୍ତର ଶାହୀନଙ୍କୁ ପଚରାଉଚରା ପାଇଁ ବିମାନ ଯୋଗେ ଶ୍ରୀନଗର ମଧ୍ୟ ଅଣାଯାଇଥିଲା ।

ଦିଲ୍ଲୀର ଲାଲ୍ କିଲ୍ଲା ନିକଟରେ ହୋଇଥିବା ବିସ୍ଫୋରଣ ଏକ ଜନଗହଳିପୂର୍ଣ୍ଣ ଅଞ୍ଚଳରେ ଘଟିଥିଲା । ଏହି ବିସ୍ଫୋରଣରେ ଏପର୍ଯ୍ୟନ୍ତ ୧୨ ଜଣଙ୍କର ମୃତ୍ୟୁ ଘଟିଛି । ଅନେକ ଆହତ ହୋଇଛନ୍ତି, ଯାହାଙ୍କର ବିଭିନ୍ନ ଡାକ୍ତରଖାନାରେ ଚିକିତ୍ସା ଚାଲିଛି। ଏହି ବିସ୍ଫୋରଣର ଲିଙ୍କ୍ ଫରିଦାବାଦ ଆତଙ୍କବାଦୀ ମଡ୍ୟୁଲ୍ ସହିତ ଜଡିତ । ଯେଉଁଥିରେ ବିସ୍ଫୋରଣ ପୂର୍ବରୁ ତିନି ଡାକ୍ତରଙ୍କୁ ଗିରଫ କରାଯାଇଥିଲା । ଏହି ମଡ୍ୟୁଲରେ ସାମିଲ୍ ଚତୁର୍ଥ ଡାକ୍ତର ମହମ୍ମଦ ଉମର ବୋଲି କୁହାଯାଉଛି, ଯିଏ ଆଇ-୨୦ କାର ବିସ୍ଫୋରଣରେ ମୃତ୍ୟୁବରଣ କରିଥିବା ଖବର ରହିଛି । ବର୍ତ୍ତମାନ ପୁଲିସ ଏବଂ ଏଜେନ୍ସିଗୁଡ଼ିକ ତଦନ୍ତ ଅଭିଯାନରେ ନିୟୋଜିତ ଅଛନ୍ତି ।