କନକ ବ୍ୟୁରୋ : ନିର୍ବାଚନ ଯେତିକି ପାଖଉଛି ବିହାର ପଲିଟିକ୍ସ ସେତିକି ସରଗରମ ହେବାରେ ଲାଗିଛି । ବୟାନବାଜି ବଢ଼ୁଛି, ନେତା ମନ୍ତ୍ରୀଙ୍କ ମୋଡ଼ ବଦଳୁଛି । ବିହାର ରାଜନୀତିରେ ନୂଆ ଦଳଙ୍କ ପ୍ରବେଶ ହେଉଥିବା ଦେଖିବାକୁ ମିଳୁଛି । ଯେଉଁଠି ଏନ୍‌ଡିଏ ଓ ଇଣ୍ଡିଆ ମେଣ୍ଟ ମଧ୍ୟରେ ମୁକାବିଲା ହେବ ବୋଲି ଚର୍ଚ୍ଚା ହେଉଥିଲା, ସେଠାରେ ଏବେ ବାହାର ଦଳ ପ୍ରବେଶ କରିଛନ୍ତି । ଉତ୍ତର ପ୍ରଦେଶର ଭୀମ ସେନା ମୁଖ୍ୟ ଚନ୍ଦ୍ର ଶେଖର ଆଜାଦଙ୍କ ଦଳ ଆଜାଦ ସମାଜ ପାର୍ଟି ମଧ୍ୟ ବିହାରରେ ନିଜର ଶକ୍ତି ପ୍ରଦର୍ଶନ କରିବାକୁ ଘୋଷଣା କରିଛି । ଯାହାକୁ ନେଇ ବିହାର ପଲିଟିକ୍ସ ଆଉ ଟିକେ ଜଟିଳ ହୋଇଯାଇଛି । 

Advertisment

୧୦୦ ଆସନରେ ଲଢ଼ିବାକୁ ପ୍ରସ୍ତୁତି 
୬୦ ଆସନରେ ପ୍ରଭାରୀ ଘୋଷଣା
ବୁଧବାର ଦିନ, ଆଜାଦ ସମାଜ ପାର୍ଟିର ରାଜ୍ୟ ସଭାପତି ଜୋହର ଆଜାଦ ପାଟନାରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ପାର୍ଟି ବିହାରର ୧୦୦ ବିଧାନସଭା ଆସନରେ ନିଜର ପ୍ରାର୍ଥୀ ଦେବ । ଏହି ୧୦୦ ମଧ୍ୟରୁ ୬୦ ଆସନରେ ପ୍ରଭାରୀ ନିଯୁକ୍ତ କରାଯାଇଛି ଏବଂ ବାକି ଆସନ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି ।

ମହା ମେଣ୍ଟକୁ ସିଧା ଚ୍ୟାଲେଞ୍ଜ
ଦଳ ଦାବି କରୁଛି ଯେ ୧୦୦ଟି ଆସନରେ ପ୍ରତିଦ୍ୱନ୍ଦ୍ୱିତା କରିବ । ସେଥିମଧ୍ୟରୁ ୪୬ଟି ଆସନରେ ମହାଗଠବନ୍ଧନ ସହିତ ସିଧାସଳଖ ପ୍ରତିଦ୍ୱନ୍ଦ୍ୱିତା କରିବ । ଜୋହର ଆଜାଦ କହିଛନ୍ତି ଯେ ଏହି ସମସ୍ତ ଆସନରେ ବୁଥ୍ ସ୍ତର ପର୍ଯ୍ୟନ୍ତ ଦଳର ସାଂଗଠନିକ ପ୍ରସ୍ତୁତି ସମ୍ପୂର୍ଣ୍ଣ ହୋଇଛି । ସେ ମହାଗଠବନ୍ଧନ ଉପରେ ବଡ଼ ଅଭିଯୋଗ ଆଣିଛନ୍ତି । ସେ କହିଛନ୍ତି, ମହା ମେଣ୍ଟ ସମସ୍ତ ବର୍ଗଙ୍କୁ ଗୁରୁତ୍ବ ଦେଉନାହିଁ, ଯାହା ଫଳରେ ଜନସାଧାରଣଙ୍କ ମଧ୍ୟରେ ଅସନ୍ତୋଷ ରହିଛି ।

ପାର୍ଟି ଘୋଷଣା କରିଛି ଯେ ଆଜାଦ ସମାଜ ପାର୍ଟିର ଏକ ଜାତୀୟ ସମ୍ମିଳନୀ ୨୧ ଜୁଲାଇରେ ପାଟନାରେ ଅନୁଷ୍ଠିତ ହେବ । ପାର୍ଟି ମୁଖ୍ୟ ଚନ୍ଦ୍ର ଶେଖର ଆଜାଦ ନିଜେ ଏହି ସମ୍ମିଳନୀରେ ଯୋଗ ଦେବେ ଏବଂ ବିହାର ନିର୍ବାଚନ ପାଇଁ ଦଳର ରଣନୀତିକୁ ଚୂଡ଼ାନ୍ତ କରିବେ ।

ଏଲଜେପିର ଜବାବ : କୌଣସି ଫରକ ପଡ଼ିବନି
ଚନ୍ଦ୍ର ଶେଖର ଆଜାଦଙ୍କ ଦଳର ଏହି ଘୋଷଣା ଉପରେ ଏଲଜେପି ପ୍ରତିକ୍ରିୟା ପ୍ରକାଶ କରିଛି । ଦଳର ମୁଖପାତ୍ର ଶଶି ଭୂଷଣ ପ୍ରସାଦ କହିଛନ୍ତି ଯେ ଗଣତନ୍ତ୍ରରେ ସମସ୍ତଙ୍କର ନିର୍ବାଚନ ଲଢ଼ିବାର ଅଧିକାର ଅଛି, କିନ୍ତୁ ଏହା ତାଙ୍କ ଦଳ ଉପରେ କୌଣସି ପ୍ରଭାବ ପକାଇବ ନାହିଁ । ସେ ଦାବି କରିଛନ୍ତି ଯେ ଦଳିତ ସମ୍ପ୍ରଦାୟ ଚିରାଗ ପାସୱାନଙ୍କ ସହିତ ଦୃଢ଼ ଭାବରେ ଠିଆ ହୋଇଛି ଏବଂ ଚିରାଗ ପାସୱାନ ଦଳିତଙ୍କ ସବୁଠାରୁ ବଡ଼ ନେତା ଭାବରେ ଉଭା ହୋଇଛନ୍ତି ।

ବିଶେଷଜ୍ଞଙ୍କ ମତ
'ଏନଡିଏ ଉପରେ ପଡ଼ିବନି ପ୍ରଭାବ, ଭୋଟ ବ୍ୟାଙ୍କ ଭିନ୍ନ'
ବିଶେଷଜ୍ଞଙ୍କ ମତରେ ଚନ୍ଦ୍ର ଶେଖର ଆଜାଦଙ୍କ ଦଳଠାରୁ NDA ସିଧାସଳଖ କୌଣସି କ୍ଷତି ସହିବ ନାହିଁ, କାରଣ ଏନଡିଏର ଭୋଟବ୍ୟାଙ୍କ ଭିନ୍ନ ରହିଛି । ପାସୱାନ ଭୋଟରମାନେ NDA ସହିତ ଅଛନ୍ତି ଏବଂ ଚିରାଗ ପାସୱାନଙ୍କ ଦବଦବା ଦୃଢ଼ ଥିବା ଭଳି ମନେହେଉନି ।