ଶ୍ରାବଣ ମାସରେ ମାଟି ଶୁଖିଲା : ୨୫ ଜିଲ୍ଲାରେ ନିଅଣ୍ଟିଆ ବର୍ଷା, ଚାଷୀ ମୁଣ୍ଡରେ ଚଡ଼କ
କନକ ବ୍ୟୁରୋ : ଶ୍ରାବଣ ମାସରେ ମାଟି ଶୁଖିଲା । ଜମିରେ ପାଣି ନାହିଁ । ଚାଷୀ ମୁଣ୍ଡରେ ହାତ ଦେଲାଣି । ସ୍ଥିତି ଏମିତି ହେଲାଣି ଯେ ୧୦ଟି ଜିଲ୍ଲାରେ ଗଜା ମରୁଡ଼ି ଆଶଙ୍କା ସୃଷ୍ଟି ହୋଇଛି । ଯଦି ଆସନ୍ତା ଏକ ସପ୍ତାହରେ ସ୍ବାଭାବିକ ବର୍ଷା ନ ହେବ ତେବେ ମରୁଡ଼ି ହେବା ଏକପ୍ରକାର ଥୟ । ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ଲଘୁଚାପ ବଳୟ ମରୁଡ଼ି ଆଶଙ୍କାକୁ କିଛି ଦିନ ଟାଳିପାରିବ ବୋଲି ପାଣିପାଗ ବିଶେଷଜ୍ଞମାନେ ଆକଳନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସ୍ବତନ୍ତ୍ର ରିଲିଫ୍ କମିସନରଙ୍କ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁଯାୟୀ ଜୁଲାଇ ୧ରୁ ୨୩ ତାରିଖ ମଧ୍ୟରେ ଯେତିକି ପରିମାଣରେ ବର୍ଷା ହେବା କଥା ତାହା ହୋଇପାରିନି । ମାତ୍ର ୫ଟି ଜିଲ୍ଲାରେ ସ୍ବାଭାବିକ ବର୍ଷା ହୋଇଛି । ବାକି ସମସ୍ତ ଜିଲ୍ଲାରେ ବର୍ଷା ନିଅଣ୍ଟିଆ ରହିଛି । କଟକ, ଖୋର୍ଧା, କଳାହାଣ୍ଡି, ନବରଙ୍ଗପୁର ଓ କୋରାପୁଟରେ ସ୍ବାଭାବିକ ବର୍ଷା ହୋଇଛି। ତେବେ ଉକ୍ତ ଜିଲ୍ଲାଗୁଡ଼ିକ ବ୍ୟତୀତ ୧୫ଟି ଜିଲ୍ଲାରେ ନିଅଣ୍ଟିଆ ଓ ୧୦ଟି ଜିଲ୍ଲାରେ ଅତି ନିଅଣ୍ଟିଆ ବର୍ଷା ହୋଇଥିବା କୁହାଯାଇଛି । ତଥ୍ୟ କହୁଛି ଯେ ସୁନ୍ଦରଗଡ଼ରେ ୫୨.୨% ପ୍ରତିଶତ କମ୍ ବର୍ଷା ହୋଇଥିବା ବେଳେ ଅନୁଗୁଳରେ ୪୫.୨%, ମୟୂରଭଞ୍ଜରେ ୪୫%, ଦେବଗଡ଼ରେ ୪୪.୮%, ଗଜପତିରେ ୪୪.୮%, ବୌଦ୍ଧରେ ୪୨.୮%, କନ୍ଧମାଳରେ ୪୨.୬%, ରାୟଗଡ଼ାରେ ୪୦.୯%, କେନ୍ଦୁଝରରେ ୩୯.୯% ଓ ବାଲେଶ୍ବରରେ ସ୍ବାଭାବିକଠାରୁ ୩୯.୨ ପ୍ରତିଶତ କମ୍ ବର୍ଷା ହୋଇଛି ।