କମିବ କଟକ-ଭୁବନେଶ୍ୱରର ସ୍ୱେରେଜ୍ ଯନ୍ତ୍ରଣା ! ୨୦୧୮ ଶେଷ ସୁଦ୍ଧା କାର୍ଯ୍ୟକ୍ଷମ ହେବ ଜାଇକା ପ୍ରକଳ୍ପ
କନକ ବ୍ୟୁରୋ : କଟକ ଓ ଭୁବନେଶ୍ୱରର ବର୍ଜ୍ୟଜଳ ନିଷ୍କାସନ ଓ ପରିଚାଳନା ପାଇଁ କାର୍ଯ୍ୟ କରୁଥିବା ଜାଇକାର ସମସ୍ତ ପ୍ରକଳ୍ପ କାର୍ଯ୍ୟ ଆସନ୍ତା ବର୍ଷ ଅକ୍ଟୋବର ସୁଦ୍ଧା ଶେଷ ହେବ । ଆଉ ଡିସେମ୍ବର ଶେଷ ସୁଦ୍ଧା ଏଗୁଡ଼ିକ ପୂର୍ଣ୍ଣ କାର୍ଯ୍ୟକ୍ଷମ ହେବ ବୋଲି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ ବୈଠକରେ ନିଷ୍ପତ୍ତି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସଚିବାଳୟରେ ବସିଥିବା ବୈଠକରେ ଏହି ଦୁଇ ସହରରେ ସ୍ୱେରେଜ୍ ପ୍ରକଳ୍ପ କାର୍ଯ୍ୟକାରୀ କରିବାରେ ବାଧକ ସାଜିଥିବା ରେଲେଓ୍ଵ ଏବଂ ଜାତୀୟ ରାଜପଥ କର୍ତ୍ତୃପକ୍ଷଙ୍କ ଜମି ଉପରେ ଆଲୋଚନା ହୋଇଥିଲା । ରେଲେଓ୍ଵ ଓ ଜାତୀୟ ରାଜପଥ କର୍ତ୍ତୃପକ୍ଷ ଖୁବ୍ଶୀଘ୍ର ଜମି ଯୋଗାଇ ଦେବାକୁ ରାଜି ହେବା ପରେ ଜାଇକା ପ୍ରକଳ୍ପର ଡେଡଲାଇନ୍ ସ୍ଥିର ହୋଇଛି । ଜାଇକା ପ୍ରକଳ୍ପ ନେଇ ରେଲେଓ୍ଵର ଖାନନଗରରେ ପମ୍ପିଂ ଷ୍ଟେସନ, ଗଣ୍ଡରପୁରରୁ ଓଏମ୍ପି ଛକ ପର୍ଯ୍ୟନ୍ତ କାର୍ଯ୍ୟ ଉପରେ ରୋକ୍ ଲଗାଯାଇଥିଲା । ସେହିପରି ଓଏମ୍ପି, ପ୍ରେସ୍ ଛକ, ତାଳଦଣ୍ଡା କେନାଲ, ଓଏମ୍ପି-ଓଏଫ୍ଏସ୍ସି ଅଫିସ, ଲିଙ୍କରୋଡ୍-ମାଛ ଗୋଦାମ ନିକଟରେ ରାସ୍ତା ଅତିକ୍ରମ ନେଇ ଜାତୀୟ ରାଜପଥ କର୍ତ୍ତୃପକ୍ଷଙ୍କ ଅନୁମତି ଦରକାର ଥିଲା । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଦୁଇ ସଂସ୍ଥା ଜାଇକାକୁ ସହଯୋଗ କରିବାକୁ ରାଜି ହୋଇଛନ୍ତି ।
ଜାଇକା କଟକରେ ୩୮୨କିମି ଏବଂ ଭୁବନେଶ୍ୱରରେ ୨୫୨କିମି ସ୍ୱେରେଜ୍ ପ୍ରକଳ୍ପ କରୁଥିବା ବେଳେ ମୋଟ ପ୍ରକଳ୍ପର ୫୫% କାର୍ଯ୍ୟ ଶେଷ ହୋଇଛି । ଜୋନ୍ ୧ ପ୍ରକଳ୍ପ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବାରୁ ଏହାକୁ ଆସନ୍ତା ଡିସେମ୍ବରରେ କାର୍ୟ୍ୟକ୍ଷମ କରାଯିବ । ଜାଇକା ପୂରା କଟକ ଏବଂ ଭୁବନେଶ୍ୱରର ଡିଷ୍ଟ୍ରିକ୍ଟ ୬ (ପଳାସୁଣିରୁ ସିଆରପି ଛକ ପର୍ଯ୍ୟନ୍ତ ରାସ୍ତାର ଡାହାଣ ପାର୍ଶ୍ୱ ଅଞ୍ଚଳ)ରେ କାର୍ଯ୍ୟ କରୁଥିବା ବେଳେ ବାକି ଅଞ୍ଚଳରେ ସ୍ୱେରେଜ୍ ବୋର୍ଡ କରୁଛି । ଜାଇକା କଟକରେ ୩୮୨କିମି ଏବଂ ଭୁବନେଶ୍ୱରରେ ୨୫୨କିମି କାର୍ଯ୍ୟ କରୁଥିବା ବେଳେ ଏଥିରେ ତିନିଟି ସ୍ୱେରେଜ୍ ଟ୍ରିଟ୍ମେଣ୍ଟ ପ୍ଲାଣ୍ଟ ରହିଛି । ଏଥିରେ କଟକ ପାଇଁ ଦୁଇଟି ଟ୍ରିଟମେଣ୍ଟ ପ୍ଲାଣ୍ଟ ଥିବା ବେଳେ ଭୁବନେଶ୍ୱର ପାଇଁ ଗୋଟିଏ ରହିଛି । ସେହିପରି ୪୮ଟି ପମ୍ପିଂ ଷ୍ଟେସନ୍ ଏବଂ ୭ଟି ସୁଇସ୍ ଗେଟ୍ ଦୁଇ ସହରରେ ରହିଛି । ଏହାସହ କଟକରେ ୨୩୦୪୩ ମିଟର ବା ୨୩.୦୪୩ କିମି ଡ୍ରେନେଜ୍ ବ୍ୟବସ୍ଥା ହେଉଛି । ଏହି ପ୍ରକଳ୍ପ ପାଇଁ ୨୯୭୪କୋଟି ଖର୍ଚ୍ଚ ବରାଦ ହୋଇଥିବା ବେଳେ ରାଜ୍ୟ ସରକାର ୫୯୪କୋଟି ଏବଂ ଜାଇକା ୨୩୮୦କୋଟି ଅର୍ଥ ସହାୟତା ଦେଉଛି ।
ବୈଠକରୁ ମିଳିଥିବା ସୂଚନା ଅନୁଯାୟୀ, ଦୁଇ ସହରରେ ମୋଟ ପ୍ରକଳ୍ପର ୫୫% କାର୍ଯ୍ୟ ଶେଷ ହୋଇଥିବା ବେଳେ ସ୍ୱେରେଜ୍ ଲାଇନ୍ ବିଛାଇବା କାର୍ଯ୍ୟ ୬୧ରୁ ୫୦% ପର୍ୟ୍ୟନ୍ତ ଶେଷ ହୋଇଛି । ପମ୍ପିଂ ଷ୍ଟେସନ କାର୍ଯ୍ୟ ୬୩% ଶେଷ ହୋଇଛି । ଡ୍ରେନେଜ୍ କାର୍ଯ୍ୟ ବି ଦ୍ରୁତ ଗତିରେ ଚାଲିଛି । ଏପରିକି କେଉଁଦିନ କେତେ ପ୍ରକଳ୍ପ କାର୍ଯ୍ୟ ହେଉଛି, କେଉଁ ଘରକୁ ସଂଯୋଗ ଦିଆଯାଉଛି ତା’ର ଜିଆଇଏସ୍ ଭିତ୍ତିକ ତଥ୍ୟ ରଖାଯାଉଛି । ଆଜିର ବୈଠକରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ସଚିବ ଜି. ମାଥିଭାଥନନ୍, ପୂର୍ତ୍ତ ସଚିବ ନଳିନୀକାନ୍ତ ପ୍ରଧାନ, ବାଣିଜ୍ୟ ଓ ପରିବହନ ବିଭାଗର ସ୍ୱତନ୍ତ୍ର ସଚିବ ମନୋଜ କୁମାର ମିଶ୍ର, ଜାଇକାର ବସନ୍ତ କୁମାର ପରିଡ଼ାଙ୍କ ସମେତ ରେଲେଓ୍ଵ, ଜାତୀୟ ରାଜପଥ କର୍ତ୍ତୃପକ୍ଷ, ସ୍ୱେରେଜ୍ ବୋର୍ଡ ଏବଂ ଜାଇକାର ଅଧିକାରୀମାନେ ଉପସ୍ଥିତ ଥିଲେ ।