ରାଜ୍ୟର ସମସ୍ତ ସରକାରୀ ଅଫିସରେ କାର୍ଯ୍ୟକାରୀ ହେବ ଡିଜିଟାଲ ପେମେଣ୍ଟ ବ୍ୟବସ୍ଥା : ପ୍ରସ୍ତାବକୁ ମଞ୍ଜୁରି ଦେଲେ ଅର୍ଥମନ୍ତ୍ରୀ ଶଶିଭୂଷଣ ବେହେରା
କନକ ବ୍ୟୁରୋ : ବର୍ତ୍ତମାନ ଚାଲିଛି ଡିଜିଟାଲ ପେମେଣ୍ଟ ଯୁଗ । ବଡ଼ ବଡ଼ ସପିଂ ମଲ ଠାରୁ ଆରମ୍ଭ କରି ଛୋଟ ମୋଟ ଦୋକାନ ଗୁଡ଼ିକରେ ମଧ୍ୟ ଡିଜିଟାଲ ପେମେଣ୍ଟ ମାଧ୍ୟମରେ ନେଣଦେଣ ହେଉଛି । ଏବେ ଭାରତରେ ଡ଼ିଜିଟାଲ ଟ୍ରାନଜାକ୍ସନ ଉପରେ ଅଧିକ ଗୁରୁତ୍ୱ ଦିଆଯାଉଛି । ସରକାର ମଧ୍ୟ ଡିଜିଟାଲ ନେଣଦେଣ ଉପରେ ଅଧିକ ଜୋର ଦେଉଛନ୍ତି । ଦେଶରେ ସ୍ୱଚ୍ଛତା ଆଣିବା ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଲୋକଙ୍କୁ ଏନେଇ ଉତ୍ସାହିତ କରୁଛନ୍ତି । ଭାରତରେ ଧୀରେ ଧୀରେ ଡିଜିଟାଲ ଟ୍ରାନଜାକ୍ସନ ବଢ଼ୁଛି ।
Kanak News is now on WhatsApp
Join and get latest news updates delivered to you via WhatsApp
ଏଣିକି ରାଜ୍ୟ ସରକାରଙ୍କ ସମସ୍ତ କାର୍ଯ୍ୟାଳୟରେ ଡିଜିଟାଲ୍ ପେମେଣ୍ଟ ବ୍ୟବସ୍ଥା କାର୍ଯ୍ୟକାରୀ ହେବ। ଏନେଇ ଅର୍ଥ ବିଭାଗ ଏକ ମାର୍ଗଦର୍ଶିକା ପ୍ରକାଶ କରିଛି । ଏଭଳି ଏକ ପ୍ରସ୍ତାବକୁ ଅର୍ଥମନ୍ତ୍ରୀ ଶଶିଭୂଷଣ ବେହେରା ମଞ୍ଜୁରି ଦେଇଛନ୍ତି । ଏ ନେଇ ଅର୍ଥ ବିଭାଗ ଅତିରିକ୍ତ ମୁଖ୍ୟ ସଚିବ ତୁହିନାକାନ୍ତ ପାଣ୍ଡେ ରାଜ୍ୟ ସରକାରଙ୍କ ସମସ୍ତ ବିଭାଗ ଓ ଏଜେନ୍ସି ବ୍ୟାଙ୍କଗୁଡିକୁ ପତ୍ର ଲେଖିଛନ୍ତି। ଏଣିକି ସରକାରୀ କାର୍ୟ୍ୟାଳୟରେ ଜନସାଧାରଣ ଓ ହିତାଧିକାରୀମାନେ ଡେବିଟ୍ କାର୍ଡ, ଭୀମ୍ ଆପ୍, ଆଧାର ସଂଯୁକ୍ତ ଦେୟ ବ୍ୟବସ୍ଥା ମାଧ୍ୟମରେ ସରକାରୀ ଅର୍ଥ ପୈଠ କରିପାରିବେ । ଏଥିପାଇଁ ବିଭାଗଗୁଡ଼ିକ ୨ଟି ଭିନ୍ନ ଭିନ୍ନ ବ୍ୟାଙ୍କର ପଏଣ୍ଟ ଅଫ୍ ସେଲ୍(ପସ୍) ମେସିନ ବ୍ୟବହାର କରିପାରିବେ । ଡିଜିଟାଲ୍ ପେମେଣ୍ଟକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ଅର୍ଥ ବିଭାଗ ଏଭଳି ନଗଦବିହୀନ ବ୍ୟବସ୍ଥା ପାଇଁ ନିର୍ଦେଶନାମା ଜାରି କରିଛି ।