କଳାହାଣ୍ଡି କୋକସରାରେ ଡେଙ୍ଗୁ ଆତଙ୍କ : ଆକ୍ରାନ୍ତଙ୍କ ସଂଖ୍ୟା ୪୫କୁ ବଢିଲା
କନକ ବ୍ୟୁରୋ : କଳାହାଣ୍ଡି କୋକସରାରେ ଅଣାୟତ ହେଉଛି ଡେଙ୍ଗୁ । କଳାହାଣ୍ଡି ଜିଲ୍ଲା କୋକସରା ବ୍ଲକ୍ ଲଡୁଗାଁରେ ଡେଙ୍ଗୁ ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ରକ୍ତ ନମୂନା ମଧ୍ୟରୁ ୪୫ଟି ରିପୋର୍ଟରେ ଡେଙ୍ଗୁ ପଜିଟିଭ୍ ଆସିଛି । ପ୍ରଥମ ଦିନରେ ୨୪ଟି ପଜିଟିଭ୍ ବାହାରିଥିବାବେଳେ ଦ୍ୱିତୀୟ ଦିନରେ ୩୦ଟି ନମୁନାରୁ ୨୧ଟି ପଜିଟିଭ୍ ବାହାରିଛି । ସେମାନଙ୍କ ମଧ୍ୟରୁ ଅଧିକାଂଶ ଡେଙ୍ଗୁ ରୋଗୀ ବିଶାଖାପାଟଣାରେ ଚିକିତ୍ସିତ ହେଉଛନ୍ତି । ଲଡୁଗାଁରେ ପହଂଚି ଡାକ୍ତରୀଦଳ ପରୀକ୍ଷା ନୀରିକ୍ଷା ଜାରି ରଖିଛନ୍ତି । ଆହୁରି ଅଧିକ ଲୋକଙ୍କ ଠାରୁ ରକ୍ତ ନମୂନା ସଂଗ୍ରହ କରାଯାଉଛି । ରକ୍ତ ନମୂନା ସବୁ କଳାହାଣ୍ଡି ଓ ବଲାଙ୍ଗିର ମେଡିକାଲକୁ ପରୀକ୍ଷା ପାଇଁ ପଠାଯାଉଛି । ଲଡୁଗାଁରେ ଡେଙ୍ଗୁ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବା ଆଶଙ୍କା କରାଯାଉଛି । ଫଳରେ ସ୍ଥାନୀୟ ଅଂଚଳରେ ଆତଙ୍କ ଖେଳିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଗତ ୮ତାରିଖରୁ ସ୍ୱାସ୍ଥ୍ୟ ବିଭାଗ ତରଫରୁ ରୋଗୀଙ୍କ ରକ୍ତ ନମୁନା ସଂଗ୍ରହ କରି ଭବାନୀପାଟଣା ପଠା ଯାଇଥିଲା । ୪୫ ଜଣଙ୍କ ରକ୍ତ ନମୁନାରେ ଡେଙ୍ଗୁ ପଜିଟିଭ ଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି । ଡେଙ୍ଗୁ ଜ୍ୱରରେ ଆକ୍ରାନ୍ତ ୭ ଜଣଙ୍କୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭିର୍ତ୍ତି କରାଯାଇଥିବା ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ସରୋଜ ତିହାଡି ପ୍ରକାଶ କରିଛନ୍ତି । ସେମାନେ ହେଲେ ଲଡୁଗାଁ ଗ୍ରାମର ନୀତେଶ କୁମାର, ଦେବୀଶ୍ୱର ପାଣିଗ୍ରାହୀ, ମେନକା ପାଣିଗ୍ରାହୀ, ବଣ୍ଟୁ ପାଣିଗ୍ରାହୀ, ହାରାବତୀ ନାଏକ, ସାଗର ବାଗ, କାଇ ପାଣିଗ୍ରାହୀ। ଅନ୍ୟପଟେ ବେସରକାରୀ ହିସାବରେ ରୋଗୀଙ୍କ ସଂଖ୍ୟା ୫୦ରୁ ଅଧିକ ହେବ ବୋଲି ଜଣାପଡ଼ିଛି । ସେହିପରି ମ୍ୟାଲେରିଆରେ ମଧ୍ୟ ଅନେକ ଲୋକ ଆକ୍ରାନ୍ତ ଥିବା ଜଣାପଡ଼ିଛି।