ଆପରୁ ଇସ୍ତଫା ଦେଲେ ବିଦ୍ରୋହୀ ବିଧାୟିକା ଅଳକା ଲାମ୍ବା : ଖୁବ ଶୀଘ୍ର କଂଗ୍ରେସରେ ସାମିଲ ହୋଇପାରନ୍ତି
କନକ ବ୍ୟୁରୋ : ଆପରୁ ଇସ୍ତଫା ଦେଲେ ବିଦ୍ରୋହୀ ବିଧାୟିକା ଅଳକା ଲାମ୍ବା । ଆପର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ଚାନ୍ଦିନୀଚୌକ ବିଧାୟିକା ଅଳକା ଲାମ୍ବା । ଇସ୍ତଫା ଦେବାପରେ ଟ୍ୱିଟ କରି ଲେଖିଛନ୍ତି ‘ଆପକୁ ବିଦାୟ କହିବାର ସମୟ ଆସିଛି’ । ଖୁବଶୀଘ୍ର ସେ କଂଗ୍ରେସରେ ଯୋଗଦେବେ ବୋଲି ଅଟକଳ ଲଗାଯାଉଛି । କାରଣ କିଛି ଦିନ ପୂର୍ବରୁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଥିଲେ ଅଳକା ଲାମ୍ବା ।
Kanak News is now on WhatsApp
Join and get latest news updates delivered to you via WhatsApp
ଲୋକସଭା ନିର୍ବାଚନରେ ଆପର ନୈରାଶ୍ୟଜନକ ପ୍ରଦର୍ଶନ ପାଇଁ ଅଳକା ମୁଖ୍ୟମନ୍ତ୍ରୀ କେଜ୍ରିୱାଲଙ୍କୁ ଦାୟୀ କରିବା ସହ ନିନ୍ଦା ମଧ୍ୟ କରିଥିଲେ । ମୁଖ୍ୟମନ୍ତ୍ରୀ ଏହାର ଉତ୍ତର ଦିଅନ୍ତୁ ବୋଲି ଦାବି କରିଥିଲେ । ଆଉ ତା’ପରେ ଅଳକାଙ୍କୁ ବିଦ୍ରୋହୀ ଆଖ୍ୟା ଦିଆଯାଇ ଆପର ହୱାଟସଆପ ଗ୍ରୁପ୍ରୁ ବାହାର କରିଦିଆଯାଇଥିଲା । ଏହାକୁ ନେଇ ସେ ଦଳ ଉପରେ ଖପ୍ପା ହୋଇଥିଲେ। ବେଶ କିଛି ଦିନ ହେବ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଓ ତାଙ୍କ କାର୍ଯ୍ୟଶୈଳୀକୁ ନେଇ ପ୍ରଶ୍ନ କରୁଥିଲେ । ସେ ଅଗଷ୍ଟ ମାସର ପ୍ରାରମ୍ଭରେ ଆପରୁ ଇସ୍ତଫା ଦେବେ ବୋଲି ନିଷ୍ପତ୍ତି ନେଇଥିଲେ । ଆସନ୍ତା ବିଧାନସଭା ନିର୍ବାଚନରେ ସ୍ବାଧୀନ ଭାବେ ଲଢିବେ ବୋଲି କହିଥିଲେ । ତେବେ ଅଳକାଙ୍କ ଏପରି ବୟାନ ପରେ ଆପ ପକ୍ଷରୁ ମଧ୍ୟ ତାଙ୍କ ଇସ୍ତଫାପତ୍ରକୁ ଗ୍ରହଣ କରାଯିବ ବୋଲି କୁହାଯାଇଥିଲା ।
୧୯୯୪ରେ ସେ କଂଗ୍ରେସ ଦଳରେ ତାଙ୍କର ରାଜନୈତିକ ଜୀବନ ଆରମ୍ଭ କରିଥିଲେ। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିବାର ମାତ୍ର ୨ ଦିନ ପରେ ସେ ଇସ୍ତଫା ଦେଇଛନ୍ତି । ସୋନିଆଙ୍କୁ ଭେଟିବାପରେ ସେ ଟୁଇଟ୍ କରିଥିଲେ, ସାମ୍ପ୍ରତିକ ପରିସ୍ଥିତି ବିଷୟରେ ଶ୍ରୀମତୀ ସୋନିଆ ଗାନ୍ଧୀଙ୍କ ସହ ଆଲୋଚନା କରିବା କଥା ବହୁ ଦିନରୁ ବାକି ଥିଲା । ଆଜି ତାଙ୍କ ସହ ସବୁ ସମସ୍ୟା ଆଲୋଚନା କରିବାକୁ ସୁଯୋଗ ପାଇଲି । ରାଜନୀତିରେ ଏଭଳି ଆଲୋଚନା ଚାଲୁ ରହିଛି ଏବଂ ଚାଲୁ ରହିବ ।