କନକ ବ୍ୟୁରୋ : ଛିଡୁନି ମନ୍ତ୍ରୀ ଦାମୋଦର ରାଉତଙ୍କ ଅଡୁଆ । ସ୍ୱାମୀ ଛାଡି ଅଙ୍ଗନବାଡି ମନ୍ତବ୍ୟ ପରେ ବିବାଦ ଜୋର ଧରିବାରୁ ନିଜ ପକ୍ଷରୁ ଏକ ଭିଡିଓ ଜାରି କରି ଦୁଃଖପ୍ରକାଶ କରିଛନ୍ତି ଦାମବାବୁ । ହେଲେ ଦାମବାବୁ ଭୁଲ ମାଗିବାକୁ ଦାବି କରିଛି ବିଜେପି ମହିଳା ମୋର୍ଚ୍ଚା । ସେପଟେ ବିଜେଡିର ନେତାମାନେ ମଧ୍ୟ ଏହି ପ୍ରସଙ୍ଗରେ ଦାମବାବୁଙ୍କ ହାତ ଛାଡିଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବରିଷ୍ଠ ମନ୍ତ୍ରୀ ଦାମୋଦର ରାଉତଙ୍କ ସ୍ୱାମୀ ଛାଡି ଅଙ୍ଗନବାଡି ମନ୍ତବ୍ୟ, ଗତ ତିନି ଦିନ ହେଲା ରାଜ୍ୟ ରାଜନୀତିରେ ନିଆଁ ଲଗାଇଦେଇଛି । ସ୍ଥିତି ହାତରୁ ଖସି ଯାଉଥିବା ଦେଖି ଏକ ଭିଡିଓ ପ୍ରତିକ୍ରିୟା ରଖି ଏଭଳି ମନ୍ତବ୍ୟ ପାଇଁ ଦୁଃଖ ପ୍ରକାଶ କରିଛନ୍ତି ଦାମବାବୁ । ତେବେ ଦାମବାବୁଙ୍କ ଏହି ଭିଡିଓ ସନ୍ତୁଷ୍ଟ କରିପାରିନାହିଁ, ବିଜେପି ମହିଳା ମୋର୍ଚ୍ଚାକୁ । ଅଙ୍ଗନବାଡ଼ି କର୍ମୀଙ୍କୁ ଭୁଲ ନମାଗିବା ପର୍ଯ୍ୟନ୍ତ ଆନ୍ଦୋଳନ ଚାଲିବ ବୋଲି ଚେତାବନୀ ଦେଇଛନ୍ତି ମହିଳା ମୋର୍ଚ୍ଚା ସଭାନେତ୍ରୀ ।
ରାଜଧାନୀରେ ବିଜେପି ନେତୃତ୍ୱରେ ବହୁ ସଂଖ୍ୟାରେ ଅଙ୍ଗନବାଡ଼ି କର୍ମୀ ଏକଜୁଟ ହୋଇ ଦାମଙ୍କ ମନ୍ତବ୍ୟର ଜୋରଦାର ପ୍ରତିବାଦ କରିଥିଲେ । ଏତିକିରେ ଦାମଙ୍କ ଅଡୁଆ ଛିଡିନାହିଁ । ବିଜେପି ଏହି ପ୍ରସଙ୍ଗକୁ ଆହୁରି ତେଜୁଥିବା ବେଳେ ନିଜ ଦଳର ନେତାମାନେ ମଧ୍ୟ ଏହି ପ୍ରସଙ୍ଗରେ ଦାମଙ୍କ ହାତ ଛାଡିଦେଇଛନ୍ତି ।
ସେପଟେ ଦାମ-ବିଜେପି କଳି ଭିତରେ ମନ୍ତବ୍ୟ ରଖିଛନ୍ତି ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ । ସେ ତାଙ୍କର ଚିରାଚରିତ ଢଙ୍ଗରେ କହିଛନ୍ତି ଦାମଙ୍କୁ ଶ୍ରୀଖଣ୍ଡି ବୋଲି ଆକ୍ଷେପ କରିବା ଠିକ୍ ନୁହେଁ । ସେ କହିଛନ୍ତି, ଶ୍ରୀଖଣ୍ଡି ନୁହେଁ, ମହାଭାରତର ଶ୍ରୀକୃଷ୍ଣ ଭଳି ହେଉଛି ଦାମବାବୁଙ୍କ ଭୂମିକା । ଦାମଙ୍କ ବୟାନକୁ ନେଇ ବିବାଦ ଉଠିବା କିଛି ନୂଆ କଥା ନୁହେଁ । କିନ୍ତୁ ଯାଜପୁର ଭାଷଣରେ ଦାମଙ୍କ ବୟାନ ତାଙ୍କୁ ଅଡୁଆ ଜାଲରେ ପକାଇଦେଇଥିବା ଅନୁମାନ କରାଯାଉଛି । ନହେଲେ ରାଜନୀତିରେ ଦାମବାବୁଙ୍କ ଭଳି ଖେଳୁଆଡ କେବେ ବି ଭିଡିଓ ଜାରି କରି ସଫେଇ ରଖିନଥାନ୍ତେ ।