ପାଖେଇ ଆସୁଛି ମହାବାତ୍ୟା ଅମ୍ଫାନ । ପାରାଦ୍ୱୀପଠାରୁ ୫୭୦ କିଲୋମିଟର ଦକ୍ଷିଣରେ ସମୁଦ୍ର ଭିତରେ ନେଇଛି ଭୟଙ୍କର ରୂପ । ଘଣ୍ଟା ପ୍ରତି ୧୪ କିଲୋମିଟର ବେଗରେ ପଶ୍ଚିମବଙ୍ଗ ଆଡକୁ ହେଉଛି ଅଗ୍ରସର । ସୁନ୍ଦରବନରେ ସ୍ଥଳ ଭାଗ ଛୁଇଁଲା ବେଳକୁ ସାମାନ୍ୟ ଦୁର୍ବଳ ହେବା ପୂର୍ବାନୁମାନ ।
କନକ ବ୍ୟୁରୋ : ମହାବାତ୍ୟା ଅମ୍ପାନ ଭୟଙ୍କର ରୂପରେ ପଶ୍ଚିମବଙ୍ଗ ଓ ବାଂଲାଦେଶ ଆଡକୁ ମୁହାଁଇଛି । ବଙ୍ଗୋପସାଗର ଭିତରେ ଏହା ମହାବାତ୍ୟା ରୂପ ନେଇ ସାରିବା ପରେ ଉତର ଦିଗରେ ଘଂଟାକୁ ପ୍ରାୟ ୧୪ କିଲୋମିଟର ବେଗରେ ଆଗେଇ ଚାଲିଛି । ଭାରତୀୟ ପାଣିପାଗ କେନ୍ଦ୍ର ପକ୍ଷରୁ ଆଜି ସାକଳ ସାଢେ ୫ଟାରେ ଜାରି ଶେଷ ବୁଲେଟିନ୍ ଅନୁଯାୟୀ ଏହା ୬ ଘଂଟା ଧରି ଏହି ବେଗରେ ଗତି କରୁଛି । ବାତ୍ୟାର କେନ୍ଦ୍ର ଓଡିଶାର ପାରାଦୀପର ଦକ୍ଷିଣ ଦିଗରେ ପ୍ରାୟ ୫ଶହ ୭୦ କିଲୋମିଟର ଏବଂ ପଶ୍ଚିମ ବଙ୍ଗ ଦିଘାର ଦକ୍ଷିଣ- ଦକ୍ଷିଣ ପଶ୍ଚିମ ଦିଗରେ ୭୨୦ କିଲୋମିଟର ଦୂରରେ ରହିଛି । ବାତ୍ୟା ଆସନ୍ତା ୨୦ ତାରିଖରେ ପଶ୍ଚିମବଙ୍ଗର ଦିଘାରୁ ବାଂଲାଦେଶର ହାତିଆ ଦ୍ୱୀପ ମଧ୍ୟରେ ସୁନ୍ଦରବନରେ ଭୁଖଣ୍ଡକୁ ଛୁଇଁବ ବୋଲି ଆକଳନ କରାଯାଇଛି । ଏହାର ପ୍ରଭାବ ଓଡିଶା ଉପକୂଳ, ପଶ୍ଚିମ ବଙ୍ଗ ଓ ବାଂଲାଦେଶରେ ଦେଖିବାକୁ ମିଳିବ ବୋଲି ଭାରତୀୟ ପାଣିପାଗ ବିଜ୍ଞାନ କେନ୍ଦ୍ର କହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ବାତ୍ୟା ଏତେ ମାତ୍ରାରେ ଶକ୍ତିଶାଳୀ ଯେ ଏହା ବ୍ୟାପକ କ୍ଷୟକ୍ଷତି କରିବାକୁ ସକ୍ଷମ ବୋଲି ଆଇଏମଡି ମହାନିର୍ଦ୍ଦେଶକ କହିଛନ୍ତି । ବାତ୍ୟା ଅମ୍ଫାନ ଯୋଗୁଁ ମୁଖ୍ୟତଃ ପଶ୍ଚିମବଙ୍ଗର ଦକ୍ଷିଣ ଓ ଉତର ୨୪ ପ୍ରଗଣା, ପୂର୍ବ ମେଦିନାପୁର ଅଂଚଳରେ ବ୍ୟାପକ କ୍ଷୟକ୍ଷତି ହେବା ସମ୍ଭାବନା ରହିଛି । ଅନ୍ୟପଟେ ଏହାର ପ୍ରଭାବ ଓଡିଶା ଉପକୂଳରେ ପଡିବ ବୋଲି ସେ ସୂଚନା ଦେଇଛନ୍ତି । ବିଶେଷ କରି ଉତର ଉପକୂଳ ଓଡିଶାରେ ଏହାର ପ୍ରଭାବ ବେଶ ଅନୁଭୁତ ହେବ । ତେବେ ଓଡିଶାରେ ପଶ୍ଚିମବଙ୍ଗ ତୁଳନାରେ କମ କ୍ଷୟକ୍ଷତି ହେବ ବୋଲି ଆକଳନ କରିଛି ଆଇଏମଡି ।
ସୋମବାର ସକାଳ ପ୍ରାୟ ସାଢେ ୧୧ଟାରେ ଏକ୍ସଟ୍ରିମ୍ଲି ସିଭିୟର ସାଇକ୍ଲୋନ ବା ଅତି ଭିଷଣ ବାତ୍ୟାରୁ ଏହି ଝଡ ସୁପର ସାଇକ୍ଲୋନ ବା ମହାବାତ୍ୟାର ରୂପ ନେଇଛି । ବଙ୍ଗୋପସାଗରର ପଶ୍ଚିିମ କେନ୍ଦ୍ର ଭାଗରେ ବର୍ତମାନ ପ୍ରାୟ ୨୪୦ରୁ ୨୫୦ କିଲୋମିଟର ବେଗରେ ପବନ ବହୁଛି । ପବନର ବେଗ ଘଂଟା ପ୍ରତି ୨୭୫ କିଲୋମିଟର ପର୍ଯ୍ୟନ୍ତ ବି ଯାଉଥିବା ଆକଳନ କରିଛି ଭାରତୀୟ ପାଣିପାଗ ବିଭାଗ । ବଙ୍ଗୋପସାଗରରେ ସୃଷ୍ଟି ହୋଇଥିବା ଏହି ମହାବାତ୍ୟା, ୧୯୯୯ ମହାବାତ୍ୟା ପରେ ଦ୍ୱିତୀୟ ମହାବାତ୍ୟା ବୋଲି କୁହାଯାଉଛି । ଫରକ୍ ହେଉଛି ସେତେବେଳେ ସ୍ଥଳଭାଗ ଅତିକ୍ରମ କରିବା ସମୟରେ ଝଡ ମହାବାତ୍ୟା ରୂପରେ ଆସିଥିଲା, ଏବେ କିନ୍ତୁ ସମୁଦ୍ର ଭିତରେ ଏହି ମହାବାତ୍ୟା ସୃଷ୍ଟି ହୋଇଛି । ଏବଂ ସ୍ଥଳ ଭାଗକୁ ଆସିବା ବେଳକୁ ଏହା କିଛି ପରିମାଣର ଦୁର୍ବଳ ହୋଇ ଅତି ଭିଷଣ ବାତ୍ୟାର ରୂପ ନେଇଥିବ ।
ଆଜି ସଂଧ୍ୟା ସାଢେ ୫ଟାରେ ଏହି ଝଡ ସୁପର ସାଇକ୍ଲୋନରୁ ଏକ୍ସଟ୍ରିମ୍ଲି ସିଭିୟର ସାଇକ୍ଲୋନରେ ପରିଣତ ହେବ । ଏହାପରେ ୨୦ ତାରିଖ ଅର୍ଥାତ୍ ବୁଧବାର ଅପରାହ୍ଣ ଓ ସଂଧ୍ୟା ଭିତରେ ପଶ୍ଚିମବଙ୍ଗର ଦିଘା ଏବଂ ବାଂଲାଦେଶର ହାତିଆ ମଧ୍ୟରେ ସ୍ଥଳଭାଗ ଅତିକ୍ରମ କରିବ । ଅନୁମାନ କରାଯାଉଛି, ସେତେବେଳେ ପବନର ବେଗ ଘଂଟାପ୍ରତି ୧୬୫ରୁ ୧୯୫ କିଲୋମିଟର ରହିବ । ଏବଂ ଝଡର ଆଖି ସୁନ୍ଦରବନ ଦେଇ ଗତି କରିବ । ଯେଉଁ ଝଡର ଆଖି ସୃଷ୍ଟି ହୋଇଥାଏ, ସେଇ ଝଡ ସାଙ୍ଘାତିକ ହୁଏ ବୋଲି କୁହାଯାଏ । ପ୍ରାୟ ୩୦ରୁ ୬୫ କିଲୋମିଟର ଯାଏଁ ଏହି ଆଖି ବ୍ୟାପିଥାଏ । ଏବଂ ଏହା ଗୋଲାକାର ଆକୃତିର ହୋଇଥାଏ । ଝଡ ଯେତେବେଳେ ଗତି କରେ ଏହି ଆଖି ଗତି କରୁଥିବା ସ୍ଥାନ ସଂପୂର୍ଣ୍ଣ ଶାନ୍ତ ଥାଏ, କିନ୍ତୁ ଏହାର ଚାରିପଟେ ଧ୍ୱଂସଲିଳା ଘଟି ଚାଲିଥାଏ ।
ମହାବାତ୍ୟା ଅମ୍ଫାନ ଏବେ ସମୁଦ୍ର ମଧ୍ୟରେ ଗତି କରୁଥିବାବେଳେ ଏହାର ପ୍ରଭାବରେ ଆଜି ଉତର ଓଡିଶା ଉପକୂଳରେ ଘଂଟା ପ୍ରତି ୫୫ରୁ ୬୫ କିଲୋମିଟର ବେଗରେ ପବନ ବହିବା ପୂର୍ବାନୁମାନ କରାଯାଇଛି । ସ୍ଥାନେ ସ୍ଥାନେ ପବନର ବେଗ ୭୫ କିଲୋମିଟର ପର୍ଯ୍ୟନ୍ତ ଯାଇପାରେ । ତେବେ ମେ’ ୨୦ ତାରିଖ ଅର୍ଥାତ ବୁଧବାର ପବନର ବେଗ ବୃଦ୍ଧି ପାଇ ବତାସର ରୂପ ନେବ ଏବଂ ଉତର ଓଡିଶା ଉପକୂଳର ଜଗତସିଂହପୁର, କେନ୍ଦ୍ରାପଡା, ଭଦ୍ରକ, ବାଲେଶ୍ୱର ଓ ମୟୁରଭଞ୍ଜ ଜିଲ୍ଲାରେ ଘଂଟା ପ୍ରତି ୭୫ରୁ ୮୫ ଏବଂ ସ୍ଥାନେ ସ୍ଥାନେ ୯୫ କିଲୋମିଟର ରହିବା ପୂର୍ବାନୁମାନ କରାଯାଇଛି । ପରବର୍ତୀ ସମୟରେ ପବନର ବେଗ ବୃଦ୍ଧି ପାଇ ଉତର ଓଡିଶା ଉପକୂଳରେ ଘଂଟା ପ୍ରତି ୧୧୦ରୁ ୧୨୦ କିଲୋମିଟର ଏବଂ ମଝିରେ ମଝିରେ ୧୩୫ କିଲୋମିଟର ଯାଏଁ ରହିପାରେ ।
ଏଥିପାଇଁ ଆଂଚଳକ ପାଣିପାଗ ବିଭାଗ ପକ୍ଷରୁ ସମ୍ଭାବ୍ୟ କ୍ଷୟକ୍ଷତିର ଆକଳନ କରାଯାଇଛି । ଉତର ଓଡିଶା ଉପକୂଳ ଜିଲ୍ଲାଗୁଡିକରେ ଚାଳ ଛପର, ଝୁମ୍ପୁଡି ଘର ନଷ୍ଟ ହେବା ଆଶଙ୍କା ରହିଛି । ହୋଡିଂ, ଟିଣ ଛପର ପ୍ରଭୃତି ଉଡନ୍ତା ଜିନିଷ ଅତ୍ୟଧିକ କ୍ଷତି କରିବା ଆଶଙ୍କା ରହିଛି । ଟେଲିଫୋନ୍ ଓ ବିଦ୍ୟୁତ ଖୁଂଟ ଉପୁଡି ଯିବା କିମ୍ବା ବଙ୍କା ହୋଇଯିବାର ଆଶଙ୍କା ରହିଛି । ବିଲରେ ଥିବା ଫସଲ, ନଡିଆ ଗଛ, ଖଜୁରୀ ଗଛ ନଷ୍ଟ ହୋଇଯିବାର ଆଶଙ୍କା ରହିଛି । ଝଙ୍କାଳିଆ ଗଛର ଡାଳ ଭାଙ୍ଗୁ ଦୂର ସ୍ଥାନକୁ ଉଡିଯିବାର ଆଶଙ୍କା ଥିବାରୁ ସତର୍କ ରହିବା ପାଇଁ ପାଣିପାଗ ବିଭାଗ ପରାମର୍ଶ ଦେଇଛି ।