ଅଧା କଟକ ଅନ୍ଧାର ! ରକ୍ଷଣାବେକ୍ଷଣ ପାଇଁ ଜଣେ ଯନ୍ତ୍ରୀଙ୍କ ଦାୟିତ୍ବରେ ୩୦ ହଜାରରୁ ଅଧିକ ଏଲ୍ଇଡି ଲାଇଟ
କନକ ବ୍ୟୁରୋ : କଟକ ମହାନଗର ଅଞ୍ଚଳର ଅଧା ରାସ୍ତା ଅନ୍ଧାର । ରାତି ଅଧରେ ତ ସ୍ଥିତି ଆହୁରି ସଂଗୀନ । ରାସ୍ତାରେ ଲାଗିଥିବା ଆଧୁନିକ ଏଲ୍ଇଡି ଲାଇଟ ଜଳୁନି । ରକ୍ଷଣାବେକ୍ଷଣ ପାଇଁ ଜଣେ ଯନ୍ତ୍ରୀଙ୍କ ଦାୟିତ୍ବରେ ୩୦ ହଜାରରୁ ଅଧିକ ଏଲ୍ଇଡି ଲାଇଟ ରହିଥିବାରୁ ଏଭଳି ସ୍ଥିତି ସୃଷ୍ଟି ହୋଇଥିବା କୁହାଯାଉଛି । କିନ୍ତୁ ଅଚଳ ଲାଇଟ ସଜାଡ଼ିବା ଦିଗରେ ସିଏମ୍ସି କୌଣସି ପଦକ୍ଷେପ ନେଉ ନଥିବା ଅଭିଯୋଗ ହେଉଛି ।
Kanak News is now on WhatsApp
Join and get latest news updates delivered to you via WhatsApp
କଟକ ସହରକୁ ଉଜ୍ବଳ ଏଲଇଡି ଆଲୋକରେ ଆଲୋକିତ କରିବା ପାଇଁ ୨୦୧୭ ଡିସେମ୍ବର ୩୦ ତାରିଖରେ ଯୋଜନାର ଶୁଭାରମ୍ଭ ହୋଇଥିଲା । ପ୍ରଥମ ପର୍ଯ୍ୟାୟରେ ୧୦ କୋଟି ୮୨ ଲକ୍ଷ ଟଙ୍କା ବ୍ୟୟରେ ସିଏମ୍ସିକୁ ୧୬ ହଜାର ୬୯ଟି ଲାଇଟ ଆସିଥିବାବେଳେ ପରେ ଆଉ ୧୪ ହଜାର ଲାଇଟ ଯୋଗାଇ ଦିଆଯାଇଥିଲା । ୧୦୦ଟି କାର୍ଯ୍ୟ ଦିବସରେ ପ୍ରକଳ୍ପ ଶେଷ ପାଇଁ ନିର୍ଦ୍ଦେଶ ରହିଥିଲା । ତେବେ ମରାମତି ଓ ରକ୍ଷଣାବେକ୍ଷଣ ଦାୟିତ୍ବ ଡେନମାର୍କର ନିଭ ଏର୍ନଜୀକୁ ଦିଆଯାଇଥିଲା । ଚୁକ୍ତିନାମା ଅନୁଯାୟୀ, ୭ ବର୍ଷ ପାଇଁ କମ୍ପାନି ରକ୍ଷଣାବେକ୍ଷଣ ଦାୟିତ୍ବ ତୁଲାଇବ ଏବଂ ଏଥିପାଇଁ ସିଏମ୍ସି ବର୍ଷକୁ ୩୦ କୋଟି ଟଙ୍କା କମ୍ପାନିକୁ ଦେବ । କିନ୍ତୁ ବହୁ ବିଳମ୍ବରେ ପ୍ରକଳ୍ପ ଶେଷ ହୋଇଥିଲା । ମାତ୍ର ରକ୍ଷଣାବେକ୍ଷଣ ଅଭାବ ଯୋଗୁ ସିଏମ୍ସିରେ ଏଲଇଡି ଲାଇଟ ଏବେ ଠିକ ଭାବେ କାମ କରୁ ନ ଥିବା ଅଭିଯୋଗ ହୋଇଛି ।