ପ୍ରଧାନମନ୍ତ୍ରୀ ମୋଦିଙ୍କ ପରି ଦୁଇଟି ଆସନରୁ ଲଢିପାରନ୍ତି ରାହୁଲ ଗାନ୍ଧୀ ! ଆମେଠି ସହ ଦକ୍ଷିଣ ଭାରତର କୌଣସି ଆସନକୁ ଦ୍ୱିତୀୟ ସିଟ ଭାବେ ବାଛିପାରନ୍ତି କଂଗ୍ରେସ ଅଧ୍ୟକ୍ଷ
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପରି ୨ଟି ଲୋକସଭା ଆସନରୁ ଲଢିପାରନ୍ତି ରାହୁଲ ଗାନ୍ଧୀ । ଏଭଳି ସମ୍ଭାବନାକୁ ନେଇ ଚର୍ଚ୍ଚା ଜୋରଦାର ହୋଇଛି । ନିର୍ବାଚନ ତାରିଖ ଘୋଷଣା ପରେ ପ୍ରଥମ ରାଜନୈତିକ ଦଳ ଭାବେ କଂଗ୍ରେସ ୧୫ଜଣିଆ ପ୍ରାର୍ଥୀ ତାଲିକା ଘୋଷଣା କରିଥିଲା । ଏଥିରେ ରାହୁଲ ଗାନ୍ଧୀ ଆମେଠିରୁ ଓ ମା’ ସୋନିଆ ଗାନ୍ଧୀ ରାଇବରେଲିରୁ ଲଢିବା ନେଇ ଘୋଷଣା କରାଯାଇଥିଲା । ୟୁପିର ୧୧ ଓ ଗୁଜରାଟ ୪ଟି ଆସନ ପାଇଁ ଲୋକସଭା ପ୍ରାର୍ଥୀ ଘୋଷଣା କରିଥିଲା କଂଗ୍ରେସ ଦଳ । ଆମ ତା’ପରେ ଦ୍ୱିତୀୟ ପର୍ଯ୍ୟାୟ ଆଉ ଗତକାଲି ତୃତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ତେବେ ଚଳିତ ନିର୍ବାଚନରେ ରାହୁଲ ଗାନ୍ଧୀ ୨୦୧୯ର ନିର୍ଣ୍ଣାୟକ ଲଢେଇ ପାଇଁ କୌଣସି ରିସ୍କ ନୋବକୁ ଚାହୁଁ ନାହାନ୍ତି । ସେଥିଲାଗି ୟୁପିର ଆମେଠି ସମେତ ଦକ୍ଷିଣ ଭାରତର କୌଣସି ଏକ ଲୋକସଭା ଆସନରୁ ମଧ୍ୟ ଲଢିପାରନ୍ତି ବୋଲି ଚର୍ଚ୍ଚା ହେଉଛି । ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ଖବର ଅନୁସାରେ ମହାରାଷ୍ଟ୍ରର କୌଣସି ଆସନକୁ ଦ୍ୱିତୀୟ ଆସନ ଭାବେ ବାଛିପାରନ୍ତି ରାହୁଲ ଗାନ୍ଧୀ । ବିଶ୍ୱସ୍ତ ସୂଚନା ଅନୁସାରେ ରାହୁଲ ଗାନ୍ଧୀ ଆଉ ଏକ ଆସନରୁ ନିର୍ବାଚନ ଲଢ଼ିଲେ ଆଖପାଖ ସିଟରେ ମଧ୍ୟ ଲାଭ ମିଳିବାର ସମ୍ଭାବନା ରହିଛି ।
ବିଶେଷତଃ ଦକ୍ଷିଣ ଭାରତରେ ଯଦି ରାହୁଲ ନିଜର ଅସ୍ଥିତ୍ଵ ଜାହିର କରନ୍ତି ତେବେ ହିନ୍ଦୀ ଭାଷାଭାଷି ଅଞ୍ଚଳରେ କଂଗ୍ରେସକୁ ହେଉଥିବା କ୍ଷତି ଭରଣା ହୋଇପାରିବ ବୋଲି ଆଶା କରାଯାଉଛି । ରାହୁଲ ଗାନ୍ଧୀ କ୍ରମାଗତ ଭାବେ ତିନି ଥର ଉତ୍ତର ପ୍ରଦେଶର ଆମେଠି ଲୋକସଭା କ୍ଷେତ୍ରରୁ ସାଂସଦ ଭାବେ ନିର୍ବାଚିତ ହୋଇ ଆସୁଛନ୍ତି। ୨୦୦୪,୨୦୦୯,୨୦୦୧୪ରେ ସେ ନିର୍ବାଚନ ଜିତିଛନ୍ତି । ପ୍ରଥମ ଥର ଏହି ସିଟରୁ ସେ ୨୦୦୪ ମେରେ ନିର୍ବାଚିତ ହୋଇଥିଲେ।
ସୂଚନାଯୋଗ୍ୟ ୨୦୧୪ ଲୋକସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରଣାସୀ ଓ ବଡ଼ଦୋରା ଦୁଇଟି ଲୋକସଭା ଆସନରୁ ନିର୍ବାଚନ ଲଢିଥିଲେ। ରାହୁଲ ମଧ୍ୟ ଦୁଇଟି ଆସନରୁ ଲଢନ୍ତୁ ବୋଲି ଚାହୁଁଛି କଂଗ୍ରେସ ।